ଅସରାଏ ବର୍ଷା ହେଲେ ରାସ୍ତାରେ ଜମୁଛି ଆଣ୍ଠୁଏ ଆଣ୍ଠୁଏ ପାଣି, ପ୍ରଶାସନକୁ ଗୁହାରି କଲେ ଶୁଣୁନାହିଁ

ଆନନ୍ଦପୁର: ରାସ୍ତା ପାଲଟିଛି ମରଣ ଯନ୍ତା । ଅସରାଏ ବର୍ଷା ହେଲେ ରାସ୍ତାରେ ଜମୁଛି ଆଣ୍ଠୁଏ ଆଣ୍ଠୁଏ ପାଣି । ପ୍ରଶାସନକୁ ଗୁହାରି କଲେ ଶୁଣୁନାହାନ୍ତି । ଓଲଟା ଏନଏଚର ପିଚୁ ରାସ୍ତା ଉପରେ ମାଟି ପକାଉଛନ୍ତି । ଜାତୀୟ ରାଜପଥ ୨୦ ଘସିପୁ୍ରା ଥାନା ଶାଳପଡା ନିକଟରେ ଅଧପନ୍ତରିଆ ରାସ୍ତାକୁ ନେଇ ପ୍ରବଳ ଉତ୍ତେଜନା ସୃଷ୍ଟି ହୋଇଛି । ଜାତୀୟ ରାଜପଥ କତୃପକ୍ଷଙ୍କ ଦ୍ୱାରା ଅନେକ ଦିନରୁ ଏହି ରାସ୍ତାର ନିର୍ମାଣ କାର୍ଯ୍ୟ ଚାଲିଥିବା ବେଳେ ସର୍ଭିସ ରୋଡ଼କୁ ସଠିକ ଭାବେ ନିର୍ମାଣ ନକରି ସେହି ରାସ୍ତାରେ ସମସ୍ତ ଗାଡି ଯାତାୟାତ କରୁଛି । ସର୍ଭିସ ରୋଡ଼ରେ ଅସରାଏ ବର୍ଷା ହେଲେ ଆଣ୍ଠୁଏ ପାଣି ଜମିଯାଉଛି । ଫଳରେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ସ୍ଥାନୀୟ ବାସିନ୍ଦା । ରାସ୍ତା କାମ ଅଧପନ୍ତରିଆ ହୋଇ ପଡିରହିଥିବାରୁ ବହୁ ଦୁର୍ଘଟଣା ମଧ୍ୟ ଘଟୁଛି । ଅସରାଏ ବର୍ଷା ହେଲେ ପିଲାମାନେ ସ୍କୁଲ ଯାଇପାରୁନାହାନ୍ତି । ଏଥି ସହିତ ଲମ୍ବା ଲାଇନ ରେ ଗାଡି ଗୁଡିକ ଠିଆ ହେଉଥିବାରୁ ଟ୍ରାଫିକ ସମସ୍ୟା ସୃଷ୍ଟି ହେଉଛି । ଯାହାକୁ ନେଇ ତାତିଛନ୍ତି ସ୍ଥାନୀୟ ଲୋକେ। ତୁରନ୍ତ ଏହି ରାସ୍ତାକୁ ନିର୍ମାଣ କରିବାକୁ ଦାବି ରଖିଥିବା ବେଳେ ଯଦି ଏଥିରେ ବିଳମ୍ବ ହୁଏ ତେବେ ଆଗକୁ ରାସ୍ତାରୋକ ସହିତ ଜନ ଆନ୍ଦୋଳନ ର ଚେତାବନୀ ଦେଇଛନ୍ତି ଆନ୍ଦୋଳନକାରୀ ।

ଲୋକଙ୍କ ଯାତାୟତକୁ ଦୃଷ୍ଟିରେ ରଖି ଖୁବ ଶୀଘ୍ର ରାସ୍ତା ମରାମତି କରାଗଲେ ଲୋକ ମାନେ ସୁବିଧାରେ ଯିବାଆସିବା କରିପାରନ୍ତେ l ତେବେ ଏ ରାସ୍ତା ଉପରେ କେବେ ପ୍ରଶାସନର ଶୁଭ ଦୃଷ୍ଟି ପଡୁଛି ତାହା ଦେଖିବାକୁ ବାକି ରହିଲା ।

Also Read: ବନ୍ୟା ପାଣି ଉଜାଡି ଦେଲା ଚାଷୀମାନଙ୍କ ସୁନାର ଫସଲ, ଚିନ୍ତାରେ ଚାଷୀ କୂଳ

The post ଅସରାଏ ବର୍ଷା ହେଲେ ରାସ୍ତାରେ ଜମୁଛି ଆଣ୍ଠୁଏ ଆଣ୍ଠୁଏ ପାଣି, ପ୍ରଶାସନକୁ ଗୁହାରି କଲେ ଶୁଣୁନାହିଁ appeared first on KNews Odisha.