ଅସ୍ବାଭାବିକ ସ୍ଥିତି: ଦିନରେ ତାତି, ରାତିରେ କାକର

ଧରାକୋଟ,୧୧ା୩(ବିଷ୍ଣୁ କେଶରୀ ଆଚାର୍ଯ୍ୟ): ରାଜ୍ୟରେ ଗତ କିଛିଦିନ ହେଲା ଅଧିକାଂଶ ସ୍ଥାନରେ ତାପମାତ୍ରା ୩୭ଂ ଡିଗ୍ରୀ ସେଲସିୟସ ଉପରେ ରହୁଛି। ହେଲେ ଗଞ୍ଜାମ ଜିଲାର ଧରାକୋଟ ଅଞ୍ଚଳରେ ପାଣିପାଗରେ ଅସ୍ବାଭାବିକ ସ୍ଥିତି ଦେଖିବାକୁ ମିଳୁଛି। ଦିନରେ ଉତ୍ତାପ ଅନୁଭୂତ ହେଉଥିବା ବେଳେ ରାତିରେ ଥଣ୍ତା ଅନୁଭୂତ ହେଉଛି। ଏଭଳି ସ୍ଥିତି ଆଗରୁ ଦେଖିବାକୁ ମିଳି ନ ଥିଲା।

ଗତ ଫେବୃଆରୀରେ ଦିନରେ ଖରା ଅନୁଭୂତ ହେଉଥିବା ବେଳେ ରାତିରେ ମଧ୍ୟ ଥଣ୍ଡା କମି ଯାଇଥିଲା। ହେଲେ ମାତ୍ର ମାର୍ଚ୍ଚ ମାସର ପ୍ରଥମ ସପ୍ତାହରେ ପାଣିପାଗ ଓ ଜଳବାୟୁ ପରିବର୍ତ୍ତନର ପ୍ରଭାବ ହେତୁ ଅଞ୍ଚଳରେ ଏଭଳି ଦେଖିବାକୁ ମିଳିଛି।

ଦିନରେ ଉତ୍ତାପ ବଢିବା ଯୋଗୁ ରାସ୍ତା ଘାଟ ଶୂନଶାନ ହୋଇ ପଡୁଛି। ହେଲେ ରାତି ୮ଟା ପରେ ଅଞ୍ଚଳରେ କାକର ପଡୁଛି। ଏହାର ପ୍ରଭାବରେ ଥଣ୍ଡା ଅନୁଭୂତ ହେଉଛି। ଏହା ସକାଳ ପର୍ଯ୍ୟନ୍ତ ଜାରି ରହୁଛି। ରାତିରେ ବାହାରକୁ ଗଲେ ଦେହ ଥରୁଛି।

ସୂଚନା ଯୋଗ୍ୟ, ସୋମବାର ଟିଟିଲାଗଡ଼ରେ ସର୍ବୋଚ୍ଚ ତାପମାତ୍ରା ୩୮ଡିଗ୍ରୀ ସେଲସିୟସ ରେକର୍ଡ କରାଯାଇଛି। ସେହିପରି ବଲାଙ୍ଗୀର ଓ ଝାରସୁଗୁଡ଼ାରେ ୩୭.୪, ସୋନପୁର ୩୭.୨, ଭବାନୀପାଟଣା ୩୭, ସୁନ୍ଦରଗଡ଼ ଓ ସମ୍ବଲପୁରରେ ତାପମାତ୍ରା ୩୬.୯ ଡିଗ୍ରୀ ରହିଥିଲା। ତେବେ ଆଗକୁ ପାରଦ ୪୦ ଡିଗ୍ରୀ ଟପିଯିବ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ପୂର୍ବାନୁମାନ କରାଯାଇଛି। ଅନ୍ୟପଟେ ଆସନ୍ତା ୧୩ରୁ ୧୫ ତାରିଖ ପର୍ଯ୍ୟନ୍ତ ରାଜ୍ୟରେ ହିଟ ଓ୍ବେଭ ନେଇ ବିଭିନ୍ନ ଜିଲାକୁ ୟେଲୋ ଓ୍ବାର୍ନିଂ ଜାରି କରାଯାଇଛି।

The post ଅସ୍ବାଭାବିକ ସ୍ଥିତି: ଦିନରେ ତାତି, ରାତିରେ କାକର appeared first on Dharitri Odia News.