ଆଜି ଧନତେରସ, ସୁନା କିଣିବାକୁ ଗହଣା ଦୋକାନରେ ଗହଳି
ସୁଖ ଓ ସମୃଦ୍ଧିର ପର୍ବ ଧନ ତ୍ରୟୋଦଶୀ ବା ଧନତେରସ୍। ବିଶ୍ବାସ ଅଛି, ଏହିଦିନ ସୁନା ଗହଣା କିଣିଲେ ଘରକୁ ଲକ୍ଷ୍ମୀ ଆସନ୍ତି। ଏଥିପାଇଁ ବିଭିନ୍ନ ଗହଣା ଦୋକାନରେ ଗ୍ରାହକଙ୍କ ଭିଡ଼ ଜମିଛି।
ସୋ ରୁମରେ ସୁନା ଗହଣାର ସମ୍ଭାର । ଚାରିଆଡେ ଝଟକୁଛି ସୁନା, ରୂପା, ହୀରା ଓ ପ୍ଲାଟିନମ୍ର ଅଳଙ୍କାର । ନୂଆ ଡିଜାଇନ୍, ତା ଉପରେ ଆକର୍ଷଣୀୟ ଅଫର । ଦର ଉଚ୍ଚା ରହିଛି, ହେଲେ କମିନି ଚାହିଦା । କାରଣ ଆଜି ଧନତେରସ୍ । ସୁଖ ଓ ସମୃଦ୍ଧିର ପର୍ବ । ବିଶ୍ୱାସ ରହିଛି ଧନତେରସରେ ଘରକୁ ସୁନା, ରୁପା ଆଣିଲେ ଶୁଭ । ତେଣୁ ଦୋକାନରେ ଖଚାଖଚ ଭିଡ଼ । କିଏ ନେକଲେସ୍, କାନଫୁଲ ଓ ରିଙ୍ଗ୍ କିଣୁଛି ତ କିଏ ପରମ୍ପରା ପାଳନ ପାଇଁ ସୁନା-ରୂପା କଏନଟିଏ ବି କିଣି ନେଉଛି । ପାଖରେ ଥିବା ଧନକୁ ଦେଖି ଧନତେରସରେ ଚାଲିଛି ସୁନା-ରୂପା କିଣା ।
ଭୁବନେଶ୍ୱର, ରାଉରକେଲା, ବ୍ରହ୍ମପୁର, ଧନତେରସରେ ସୁନା କିଣିବାକୁ ଆଗ୍ରହ କାହିଁରେ କଣ। ଦୋକାନୀ ବି ପ୍ରସ୍ତୁତ । କିଏ ସୁନା, ରୂପାର ଗଢା ମଜୁରୀ ଉପରେ ରିହାତି ଦେଉଛି ତ କାହାର ଡାଇମଣ୍ଡ ଓ ପ୍ଲାଟିନମ୍ କିଣା ଉପରେ ସ୍ୱତନ୍ତ୍ର ଅଫର । ଧନତେରସ ପାଇଁ ସୋରୁମରେ ଭଳିକି ଭଳି ଅଫର । ଯାହାର ଫାଇଦା ଉଠାଇବାକୁ ପହଁଚିଛନ୍ତି ଗ୍ରାହକ । ଆଗକୁ ଦାମ୍ ବଢିବା ଆଶଙ୍କା ଏବଂ ନଭେମ୍ବରରୁ ବିବାହ ଋତୁ ଆରମ୍ଭ ହେଉଥିବାରୁ ସୁନା କିଣିବାକୁ ଆଗ୍ରହ ଦେଖାଉଛନ୍ତି ଗ୍ରାହକ । ସୁନା ଦର ଦିନକୁ ଦିନ ବଢୁଥିବାରୁ ସଂଚୟ କରିବା ଲକ୍ଷ୍ୟରେ ବି ଅନେକ କିଣାକିଣି କରିଛନ୍ତି ।
ଏପଟେ ଧନତେରସରେ ସଜାଗ ଜିଏସଟି ବିଭାଗ । ରାଉରକେଲାର ଅଗ୍ରୱାଲ ଜୁଏଲାରୀରେ CT ଆଣ୍ଡ GST ବିଭାଗ ପକ୍ଷରୁ ହୋଇଛି ରେଡ୍ । ଗ୍ରାହକଙ୍କୁ ସଠିକ୍ ବିଲ ଦେଉ ନ ଥିବା ଏବଂ ବେଆଇନ୍ ଭାବେ ସୁନା ଗଛିତ ରଖିଥିବା ଅଭିଯୋଗରେ ବ୍ୟାପକ ଯାଂଚ୍ କରାଯାଇଛି । ସମ୍ବଲପୁର ମାରୱାଡ଼ି ବଜାରରେ ବି ରେଡ୍ କରିଛି CT-GST ଟିମ୍ । ଜଣେ ବ୍ୟବସାୟୀଙ୍କ ୩ଟି ଦୋକାନରେ ଚଢ଼ାଉ କରି ଷ୍ଟକ୍ ଓ କାଗଜପତ୍ର ଯାଞ୍ଚ କରାଯାଇଛି । ସେହିପରି ଭବାନୀପାଟଣା ସ୍ଥିତ ବସୁନ୍ଧରା ଜୁଏଲର୍ସରେ ରେଡ୍ କରିଛି ଜିଏସଟି ଓ ଏନଫୋର୍ସମେଣ୍ଟ ସ୍କ୍ବାଡ୍ । ଜିଏସଟି ଫାଙ୍କିଥିବା ଅଭିଯୋଗରେ ୯ ଜଣିଆ ଟିମ୍ ଦୋକାନରେ ଖାନତଲାସି କରିଛନ୍ତି ।
ଦୀପାବଳିର ଦୁଇ ଦିନ ପୂର୍ବରୁ ଧନତେରସ୍ । ଆଜିର ଶୁଭ ଦିନରେ ଲୋକେ ଘରକୁ କିଛି ବି ଧାତବ ପଦାର୍ଥ କିଣି ଆଣିବା ପରମ୍ପରା ରହିଛି। ଏଥିସହ କୁବେର, ଧନ୍ୱନ୍ତରୀ ଏବଂ ଲକ୍ଷ୍ମୀଙ୍କ ପୂଜା ବି କରାଯାଏ ।
