ଆଜି ପବିତ୍ର ମହାଶିବରାତ୍ରୀ, ଚଳଚଞ୍ଚଳ ସମସ୍ତ ଶୈବପୀଠ, ରାତି ୧୦ଟାରେ ଉଠିବ ମହାଦୀପ

ଭୁବନେଶ୍ୱର ୮।୩: ଆଜି ଜାଗର। ଓଁ ନମଃ ଶିବାୟ ଧ୍ୱନିରେ ପରିବେଶ ପ୍ରକମ୍ପିତ । ଚଳଚଞ୍ଚଳ ହୋଇଛି ପ୍ରମୁଖ ଶୈବପୀଠ । ଶ୍ରୀଲିଙ୍ଗରାଜଙ୍କ ମହାଶିବରାତ୍ରି ପାଇଁ ଏକାମ୍ରକ୍ଷେତ୍ର ଉତ୍ସବମୁଖର । ଗୁରୁବାର  ସନ୍ଧ୍ୟାରୁ ଭକ୍ତଙ୍କ ଆଗମନ ଆରମ୍ଭ  ହୋଇଗଲାଣି । ଆଲୋକମାଳାରେ ଝଲସୁଛି ମନ୍ଦିର ଓ ଆଖପାଖ ଅଞ୍ଚଳ । ଭକ୍ତଙ୍କ ଦର୍ଶନ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଲକ୍ଷାଧିକ ଭକ୍ତଙ୍କ ସମାବେଶକୁ ଲକ୍ଷ୍ୟରେ ରଖି ପ୍ରଶାସନ, ପୋଲିସ ପକ୍ଷରୁ ସମସ୍ତ  ପ୍ରସ୍ତୁତି ଚୂଡ଼ାନ୍ତରେ । 

ନିର୍ଦ୍ଧାରିତ ନୀତିନିର୍ଘଣ୍ଟ  ଅନୁଯାୟୀ ଭୋର ୩ଟାରେ ଠାକୁରଙ୍କ ପହୁଡ଼  ଖୋଲାଯିବ । ମଙ୍ଗଳଆଳତି ଓ ଅବକାଶ  ନୀତି ସାଢ଼େ ୩ଟା ସୁଦ୍ଧା ଶେଷ ହୋଇ  ଶ୍ରଦ୍ଧାଳୁଙ୍କ ପାଇଁ ସାହାଣମେଲା ଦର୍ଶନ ଦିନ  ୧୧ଟା ଯାଏ ରହିବ । ଏହାପରେ ଅପରାହ୍ଣ  ୩ଟା ୪୫ ଓ ରାତି ୧୦ଟାରେ ଘଣ୍ଟାଏ  ଲେଖାଏଁ ସାହାଣମେଲା ଦର୍ଶନର ସୁଯୋଗ  ମିଳିବ । ମହାଦୀପ ରାତି ୧୦ଟାରେ ଉଠିବ ।  ମହାଦୀପ ଦର୍ଶନ କଲାପରେ ଭକ୍ତଗଣ ବ୍ରତ  ସମାପନ କରିବେ । ଏହା ସହିତ ଭଜନ ମଣ୍ଡପରେ ଦେଶ ତଥା ରାଜ୍ୟର  ନାମୀ କଣ୍ଠଶିଳ୍ପୀମାନେ ଭଜନ ପରିବେଶଷ କରିବାର କାର୍ଯ୍ୟକ୍ରମ ରହିଛି ।