ଆତଙ୍କବାଦୀ ଟାର୍ଗେଟରୁ ବର୍ତ୍ତି ପାରିଲାନି ସ୍କୁଲ ବସ, ୪ ଶିଶୁ ମୃତ, ୩୮ ଆହତ

ଖୁଜଦାର,୨୧।୫: ପାକିସ୍ତାନରେ ଏକ ବଡ଼ ଆତଙ୍କବାଦୀ ଆକ୍ରମଣ ହୋଇଛି। ଏଥର ଆତଙ୍କବାଦୀମାନେ ଏକ ସ୍କୁଲ ବସକୁ ଟାର୍ଗେଟ କରିଛନ୍ତି। ବେଲୁଚିସ୍ତାନର ଖୁଜଦାରରେ ହୋଇଥିବା ଏହି ଆକ୍ରମଣରେ ଚାରି ଜଣ ଶିଶୁଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୩୮ ଜଣ ଆହତ ହୋଇଛନ୍ତି। ସରକାରୀ ସୂଚନା ଅନୁଯାୟୀ, ଜଣେ ଆତ୍ମଘାତୀ କାର ବୋମା ବିସ୍ଫୋରଣକାରୀ ଏକ ସ୍କୁଲ ବସକୁ ଟାର୍ଗେଟ କରିଛନ୍ତି।
ପାକିସ୍ତାନୀ ନ୍ୟୁଜ ୱେବସାଇଟ ଡନ ଅନୁଯାୟୀ, ସ୍କୁଲ ବସଟି ଜିରୋ ପଏଣ୍ଟ ନିକଟରେ ଥିଲା। ଆହତମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ଗୁରୁତର ଆହତମାନଙ୍କୁ କ୍ୱେଟା ଏବଂ କରାଚୀର ହସ୍ପିଟାଲକୁ ପଠାଯାଇଛି। ପାକିସ୍ତାନ ଗୃହମନ୍ତ୍ରୀ ମୋହସିନ ନକଭି ଏହି ଆକ୍ରମଣକୁ ଦୃଢ଼ ନିନ୍ଦା କରିଛନ୍ତି। ସେ କହିଛନ୍ତି, ‘ପିଲାମାନଙ୍କୁ ଟାର୍ଗେଟ କରୁଥିବା ଆକ୍ରମଣକାରୀମାନଙ୍କୁ କୌଣସି ପରିସ୍ଥିତିରେ ଛଡ଼ାଯିବ ନାହିଁ।’
ପାକିସ୍ତାନର ଗୃହ ମନ୍ତ୍ରଣାଳୟ ଏକ୍ସରେ ଏକ ପୋଷ୍ଟ ଶେୟାର କରିଛି। ଏଥିରେ ମୋହସିନ ନକଭି ଆକ୍ରମଣରେ ମୃତ ପିଲାମାନଙ୍କ ପରିବାର ପ୍ରତି ସମବେଦନା ପ୍ରକାଶ କରି କହିଛନ୍ତି, ‘ଶତ୍ରୁମାନେ ନିର୍ଦ୍ଦୋଷ ପିଲାମାନଙ୍କୁ ନିଜର ଶିକାର କରିଛନ୍ତି। ଏହି ଆକ୍ରମଣ ଦେଶରେ ଅସ୍ଥିରତା ସୃଷ୍ଟି କରିବାର ଏକ ଘୃଣ୍ୟ ଷଡ଼ଯନ୍ତ୍ର। ଦେଶର ଏକତା ଯୋଗୁଁ ପ୍ରତ୍ୟେକ ଷଡ଼ଯନ୍ତ୍ର ବିଫଳ ହେବ।’
ପାକିସ୍ତାନରେ ବେଲୁଚିସ୍ତାନକୁ ନେଇ ଖୁବ ଉତ୍ତେଜନା ରହିଛି। ସେ ପାକିସ୍ତାନରୁ ଅଲଗା ହୋଇ ଏକ ସ୍ବତନ୍ତ୍ର ଦେଶ ହେବାକୁ ଚାହାଁନ୍ତି। ବେଲୁଚିସ୍ତାନରେ ବହୁତ ଦିନ ଧରି ବିଚ୍ଛିନ୍ନତାବାଦୀ କାର୍ଯ୍ୟକଳାପ ଚାଲିଛି। ଭାରତ ଏବଂ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ସମୟରେ, ବେଲୁଚିସ୍ତାନ ଲଢୁଆମାନେ ମଧ୍ୟ ପାକିସ୍ତାନୀ ସେନାକୁ ଟାର୍ଗେଟ କରିଥିଲେ।
ପାକିସ୍ତାନ ଆତଙ୍କବାଦର ଗଡ଼ ହୋଇଆସିଛି ଏବଂ ଏହାକୁ ଭାରତ ବିରୁଦ୍ଧରେ ବ୍ୟବହାର କରିଆସୁଛି। ପାକିସ୍ତାନ ଦ୍ୱାରା ପଠାଯାଇଥିବା ଆତଙ୍କବାଦୀମାନେ ନିକଟରେ ଜମ୍ମୁ-କଶ୍ମୀରର ପହଲଗାମରେ ଆକ୍ରମଣ କରିଥିଲେ। ଏଥିରେ ୨୬ ଜଣ ପର୍ଯ୍ୟଟକ ପ୍ରାଣ ହରାଇଛନ୍ତି। ଏବେ ପାକିସ୍ତାନ ନିଜେ ଆତଙ୍କବାଦର ଶିକାର ହେବାକୁ ଯାଉଛି। ଏହି ବର୍ଷ ପାକିସ୍ତାନରେ ଅନେକ ଆତଙ୍କବାଦୀ ଆକ୍ରମଣ ହୋଇଛି।

The post ଆତଙ୍କବାଦୀ ଟାର୍ଗେଟରୁ ବର୍ତ୍ତି ପାରିଲାନି ସ୍କୁଲ ବସ, ୪ ଶିଶୁ ମୃତ, ୩୮ ଆହତ appeared first on Dharitri Odia News.