ଆଫ୍ରିକୀୟ ହାତୀଙ୍କ ନୂଆ ଘର, ଦୀପାବଳିରେ ବନତାରା ଆସିଲେ ୩ ହାତୀ

ଜାମନଗର: ଦୀପାବଳି ଦିନ ତିନିଟି ଆଫ୍ରିକୀୟ ହାତୀଙ୍କୁ ଟ୍ୟୁନିସିଆରୁ ଉଦ୍ଧାର କରାଯାଇ ଗୁଜରାଟ ଜାମନଗର ସ୍ଥିତ ବନତାରାକୁ ଅଣାଯାଇଛି। ଏହି ୨୮ ରୁ ୨୯ ବର୍ଷ ବୟସ୍କ ଆଫ୍ରିକୀୟ ହାତୀ ମଧ୍ୟରେ ଦୁଇଟି ମାଈ ଏବଂ ଗୋଟିଏ ପୁରୁଷ ହାତୀ ଅଛନ୍ତି। ବନତାରା ହେଉଛି ଅନନ୍ତ ଅମ୍ବାନୀଙ୍କ ସ୍ୱପ୍ନର ପ୍ରକଳ୍ପ । ଏହା ହେଉଛି ବିଶ୍ୱର ଅନ୍ୟତମ ପ୍ରତିଷ୍ଠିତ ବନ୍ୟଜନ୍ତୁ ଉଦ୍ଧାର କେନ୍ଦ୍ର। 

ପ୍ରକୃତରେ ଟ୍ୟୁନିସିଆର ଏକ ଘରୋଇ ପ୍ରାଣୀ ଉଦ୍ୟାନ ଆର୍ଥିକ ସଙ୍କଟ କାରଣରୁ ହାତୀମାନଙ୍କର ଉଚିତ୍ ଯତ୍ନ ନେବାରେ ଅସମର୍ଥ ହୋଇଥିଲା। ଏମିତିରେ ଖର୍ଚ୍ଚ କମ କରିବା ପାଇଁ ଟ୍ୟୁନିସିଆର ପ୍ରାଣୀ ଉଦ୍ୟାନ ଫ୍ରିଗୁୟା ପାର୍କ ସମସ୍ତ ତିନୋଟି ଆଫ୍ରିକୀୟ ହାତୀଙ୍କୁ ହଟାଇବାକୁ ନିଷ୍ପତ୍ତି ନେଇଥିଲା। ଅଚତମ୍, କାନି ଏବଂ ମୀନା ନାମକ ଏହି ହାତୀମାନଙ୍କୁ ଜଙ୍ଗଲକୁ ଫେରାଇନେବା ସମ୍ଭବ ନଥିବାରୁ ଏଭଳି ପରିସ୍ଥିତିରେ ସେମାନେ ଏପରି ଏକ ସ୍ଥାନ ଖୋଜୁଥିଲେ ଯେଉଁଠାରେ ହାତୀମାନଙ୍କର ଭଲଭାବେ ଯତ୍ନ ନିଆଯାଇପାରିବ। ଏହି କାରଣରୁ ଉକ୍ତ ଉଦ୍ୟାନଟି ବନତାରା ସହିତ ଯୋଗାଯୋଗ କରିଥିଲା। ଜାତୀୟ ତଥା ଆନ୍ତର୍ଜାତୀୟ ନିୟମ ଅନୁଯାୟୀ ଏକ ଚାର୍ଟାର୍ଡ କାର୍ଗୋ ବିମାନରେ ହାତୀମାନଙ୍କୁ ଭାରତ ଅଣାଯାଇଛି। ବନତାରା ବର୍ତ୍ତମାନ ଏହି ଆଫ୍ରିକୀୟ ହାତୀମାନଙ୍କର ନୂଆ ଘର ହେବ।

ବନତାରାରେ ଆଫ୍ରିକୀୟ ହାତୀମାନଙ୍କର ଡାକ୍ତରୀ ପରୀକ୍ଷାରୁ ଜଣାପଡିଛି ଯେ ଅଚତମ୍, କାନି ଏବଂ ମୀନା ଅନେକ ରୋଗରେ ପୀଡିତ ଅଛନ୍ତି। ସେମାନଙ୍କୁ ଶାରୀରିକ ଏବଂ ମାନସିକ ସହାୟତା ଆବଶ୍ୟକ। କେତେକ କ୍ଷେତ୍ରରେ ଅସ୍ତ୍ରୋପଚାର ମଧ୍ୟ ଆବଶ୍ୟକ ହୋଇପାରେ। ବନତାରାର ପ୍ରାଣୀ ଚିକିତ୍ସକ ଦିନରାତି ସେମାନଙ୍କ ଉପରେ ନଜର ରଖିଛନ୍ତି। ବନତାରା ପକ୍ଷରୁ ଦେଶୀ ଉଦ୍ଭିଦ, ମାଟି ପୋଖରୀ ଏବଂ ଖାଦ୍ୟ ସମୃଦ୍ଧ ବୃହତ ଏନକ୍ଲୋଜର ଗୁଡିକ ସୁଚିନ୍ତିତ ଭାବରେ ଡିଜାଇନ୍ କରାଯାଇଛି। ବନତାରାରେ ସେମାନଙ୍କର ନୂତନ ଘର ଅଚତମ୍, କାନି ଏବଂ ମୀନାଙ୍କୁ ଏଭଳି ଏକ ପରିବେଶ ପ୍ରଦାନ କରିବା ଯାହା ସେମାନଙ୍କ ବନ୍ୟ ବାସସ୍ଥାନ ସଦୃଶ ହୋଇଛି।