ଆମେରିକାକୁ ଛାଡିବୁନି, ପ୍ରତିଶୋଧ ନେବୁ: UNSCରେ ଇରାନୀ ରାଜଦୂତଙ୍କ ବଡ଼ ଘୋଷଣା

ଓ୍ବାଶିଂଟନ,୨୩।୬: ଆମେରିକା ଇରାନର ପରମାଣୁ ସ୍ଥାନରେ ବଙ୍କର୍‌ ବଷ୍ଟର ବୋମା ସହିତ ଆକ୍ରମଣ କରିଛି। ଏହାପରେ ଏବେ ଦୁଇଟି ପ୍ରଶ୍ନ ଉଠାଯାଉଛି। ପ୍ରଥମତଃ, ଇରାନ କଣ ଆମେରିକା ବିରୋଧରେ ପ୍ରତିଶୋଧ ନେବ ଏବଂ ଦ୍ୱିତୀୟତଃ, ଇରାନ କେବେ ଆକ୍ରମଣ କରିବ? ଜାତିସଂଘରେ ଇରାନର ରାଷ୍ଟ୍ରଦୂତ ଆମିର ସଇଦ ଇରାଭାନୀ ଗୋଟିଏ ପ୍ରଶ୍ନର ଉତ୍ତର ଦେଇଛନ୍ତି।

ଆମେରିକା ଆକ୍ରମଣ ସମ୍ପର୍କରେ ଡକାଯାଇଥିବା ଜାତିସଂଘ ସୁରକ୍ଷା ପରିଷଦ ବୈଠକରେ ଇରାଭାନୀ କହିଛନ୍ତି,ଆମେରିକା ବିରୋଧରେ ପ୍ରତିଶୋଧ ନିଆଯିବ। ଏଥିପାଇଁ ଆମର ବୈଧ କାରଣ ଅଛି। ଇରାଭାନୀ ଆମେରିକା ଉପରେ ଆକ୍ରମଣ କରିବାର ୫ଟି ପ୍ରମୁଖ କାରଣ ମଧ୍ୟ ଦେଇଛନ୍ତି।

ଆମେରିକା ଉପରେ ଆକ୍ରମଣ ପାଇଁ ଜାତିସଂଘ ସୁରକ୍ଷା ପରିଷଦରେ ଇରାନୀ ରାଷ୍ଟ୍ରଦୂତ ଇରାଭାନୀ ଦେଇଥିବା ୫ କାରଣ ହେଉଛି-

୧. ଇରାଭାନୀଙ୍କ ଅନୁସାରେ, ଆମେରିକା ଏକ ଶାନ୍ତିପ୍ରିୟ ଦେଶର ସାର୍ବଭୌମତ୍ୱ ଉପରେ ଆକ୍ରମଣ କରିଛି। ଇରାନ ଉପରେ ଆକ୍ରମଣ କରିବାର ଆମେରିକାର କୌଣସି ବୈଧ କାରଣ ନ ଥିଲା। ଆମେ ପରମାଣୁ ଅସ୍ତ୍ରପ୍ରସାର ଚୁକ୍ତିକୁ ଅନୁସରଣ କରୁଥିଲୁ। ଏହା ସତ୍ତ୍ୱେ, ଆମେରିକା ଆମ ଉପରେ ଆକ୍ରମଣ କରିଥିଲା।

୨. ଇରାଭାନୀଙ୍କ ଅନୁସାରେ, ଆମେରିକା ମଧ୍ୟପ୍ରାଚ୍ୟରେ ଆତଙ୍କବାଦୀମାନଙ୍କୁ ଖୋଲାଖୋଲି ସମର୍ଥନ କରେ। ଗାଜା ଉପରେ ଇସ୍ରାଏଲୀ ଆକ୍ରମଣ ବିଷୟରେ ଆମେରିକା କିଛି କହୁନାହିଁ। ଆମେରିକା ମାନବତା ବିରୋଧୀ କାର୍ଯ୍ୟକଳାପକୁ ଉତ୍ସାହିତ କରେ। ସମଗ୍ର ବିଶ୍ୱ ଏଥିରେ ନୀରବ ରହିପାରେ, କିନ୍ତୁ ଇରାନ ଚୁପ ରହିବ ନାହିଁ।

୩. ବିଶ୍ୱକୁ ସମ୍ବୋଧିତ କରି ଇରାଭାନୀ କହିଛନ୍ତି ଯେ, ଆମେରିକା ସହିତ ପରମାଣୁ ଆଲୋଚନା ସମ୍ପର୍କରେ ଜୁନ ୧୬ରେ ଓମାନର ମସ୍କଟରେ ଏକ ବୈଠକ ହେବାର ଥିଲା। ଏହାର ଦୁଇ ଦିନ ପୂର୍ବରୁ, ଜୁନ ୧୩ରେ ଇସ୍ରାଏଲ ଆମ ଉପରେ ଆକ୍ରମଣ କରିଥିଲା। କୁହନ୍ତୁ, ଚୁକ୍ତିରୁ କିଏ ପଳାୟନ କରୁଛି?

୪. ଇରାଭାନି ଜାତିସଂଘ ସୁରକ୍ଷା ପରିଷଦରେ କାସିମ ସୁଲେମାନୀଙ୍କ ହତ୍ୟା ପ୍ରସଙ୍ଗ ମଧ୍ୟ ଉଠାଇଥିଲେ। ଇରାଭାନି କହିଛନ୍ତି, ସୁଲେମାନୀ ଜଣେ ଉଚ୍ଚସ୍ତରୀୟ ସାମରିକ ଅଧିକାରୀ ଥିଲେ, କିନ୍ତୁ ଆମେରିକା ତାଙ୍କୁ ହତ୍ୟା କରିଥିଲା। ଏହା କିପରି ଯଥାର୍ଥ?

୫. ଇରାଭାନି କହିଛନ୍ତି, ଇସ୍ରାଏଲ ସହିତ ଯୁଦ୍ଧ ସତ୍ତ୍ୱେ, ଆମର ବୈଦେଶିକ ମନ୍ତ୍ରୀ ଆବାସ ଆରାଘଚି ଶାନ୍ତି ଆଲୋଚନା ବିଷୟରେ ୟୁରୋପୀୟ ଦେଶମାନଙ୍କ ସହିତ କଥା ହେଉଥିଲେ, କିନ୍ତୁ ଆମେରିକା ଏହାକୁ ସହ୍ୟ କରିପାରିଲା ନାହିଁ। ଏହା ଆମର ଘାଟି ଉପରେ ଆକ୍ରମଣ କରିଛି। ଆମେ ନିଶ୍ଚିତ ଭାବରେ ପ୍ରତିଶୋଧ ନେବୁ।

ରୁଷିଆ ଏବଂ ଚାନା ବ୍ୟତୀତ ପାକିସ୍ତାନ ଏବଂ ଉତ୍ତର କୋରିଆ ମଧ୍ୟ ଇରାନକୁ ସମର୍ଥନ କରି ଖୋଲାଖୋଲି ବାହାରି ଆସିଛନ୍ତି। ପାକିସ୍ତାନ ଏହାକୁ ସାର୍ବଭୌମତ୍ୱ ଉପରେ ଆକ୍ରମଣ ବୋଲି କହିଛି। ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ଶରିଫ ଏକ ବିବୃତ୍ତିରେ ଏହି ଆକ୍ରମଣକୁ ଭୁଲ ବୋଲି କହିଛନ୍ତି।

ଅନ୍ୟପକ୍ଷରେ, ଉତ୍ତର କୋରିଆ ମଧ୍ୟ ଇରାନକୁ ସମର୍ଥନ କରି ଏକ ବିବୃତ୍ତି ଜାରି କରିଛି। ଉତ୍ତର କୋରିଆ ମଧ୍ୟ ଆମେରିକାକୁ ଟାର୍ଗେଟ କରିଛି।

The post ଆମେରିକାକୁ ଛାଡିବୁନି, ପ୍ରତିଶୋଧ ନେବୁ: UNSCରେ ଇରାନୀ ରାଜଦୂତଙ୍କ ବଡ଼ ଘୋଷଣା appeared first on Dharitri Odia News.