ଆମେରିକାରେ ପହଞ୍ଚି ଭାରତ ବିରୋଧରେ ବିଷ ଓଗାଳିଲେ ମୁନୀର: କହିଲେ, ଆମେ ପ୍ରତିଶୋଧ ନେବୁ

ଓ୍ବାଶିଂଟନ୍‌,୧୮।୬: ପାକିସ୍ତାନର ସେନା ମୁଖ୍ୟ ଏବଂ ସଦ୍ୟ ନିଯୁକ୍ତ ଫିଲ୍ଡ ମାର୍ଶାଲ ସୟଦ ଅସୀମ ମୁନିର ଆଜିକାଲି ଆମେରିକା ଗସ୍ତରେ ଅଛନ୍ତି। ଏହି ଗସ୍ତ ସମୟରେ ସେ ଆମେରିକାରେ ରହୁଥିବା ପାକିସ୍ତାନୀ ସମ୍ପ୍ରଦାୟକୁ ସମ୍ବୋଧିତ କରିଥିଲେ। ତାଙ୍କ ଭାଷଣରେ ମୁନୀର ଅନେକ ପ୍ରସଙ୍ଗରେ କହିଥିଲେ, କିନ୍ତୁ ସେ ଭାରତ ବିରୋଧରେ କଡ଼ା ବୟାନ ଦେବା ପାଇଁ ଏହି ମଞ୍ଚକୁ ବ୍ୟବହାର କରିଥିଲେ। ସେ ମେ’ ମାସରେ ଭାରତ ଏବଂ ପାକିସ୍ତାନ ମଧ୍ୟରେ ଚାରି ଦିନିଆ ସଂଘର୍ଷକୁ ପାକିସ୍ତାନର ବିଜୟ ଭାବରେ ଚିତ୍ରଣ କରିବାକୁ ଚେଷ୍ଟା କରିଥିଲେ।

ମୁନୀର କହିଛନ୍ତି, ପାକିସ୍ତାନ ୧୯୭୧ର ପରାଜୟକୁ କେବେ ଭୁଲିବ ନାହିଁ ଏବଂ ସମୟ ଆସିଲେ ଏହାର ଜବାବ ଦେବ। ପାକିସ୍ତାନ ସେନା ଭାରତର ଯେକୌଣସି କାର୍ଯ୍ୟର ଜବାବ ଦେବାକୁ ସକ୍ଷମ।

ସୟଦ ଅସୀମ ମୁନୀର କହିଛନ୍ତି, ପାକିସ୍ତାନ ଭାରତ ବିରୋଧରେ ପାଞ୍ଚଟି ସ୍ତରରେ ଯୁଦ୍ଧ କରିଛି। ଏଥିରେ ସାଇବର ଯୁଦ୍ଧ ମଧ୍ୟ ସାମିଲ। ପାକିସ୍ତାନୀ ହ୍ୟାକର୍ସମାନେ ଭାରତର ୭୦% ଗ୍ରୀଡ ଷ୍ଟେଶନଙ୍କୁ ହ୍ୟାକ କରି ବନ୍ଦ କରିଦେଇଛନ୍ତି। ପାକିସ୍ତାନୀ ଡ୍ରୋନ ଦିଲ୍ଲୀ ଏବଂ ଗୁଜରାଟରେ ପହଞ୍ଚିଛି।

ମୁନିର ଆଉ ଏକ ଦାବି କରିଛନ୍ତି, ଭାରତର ଟ୍ରେନ ସିଷ୍ଟମ ମଧ୍ୟ ହ୍ୟାକ ହୋଇଛି। ତଥାପି, ସେ ଏହି ଦାବିଗୁଡ଼ିକର କୌଣସି ପ୍ରମାଣ ଦେଇ ନାହାଁନ୍ତି ଏବଂ ଏପର୍ଯ୍ୟନ୍ତ ଭାରତ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ।

ଆମେରିକାରେ ଦିଆଯାଇଥିବା ତାଙ୍କ ଭାଷଣରେ, ଅସୀମ ମୁନୀର ସ୍ବୀକାର କରିଛନ୍ତି, ଭାରତ ବିପକ୍ଷ ଯୁଦ୍ଧରେ ପାକିସ୍ତାନ ଚାଇନାରୁ ଅସ୍ତ୍ରଶସ୍ତ୍ର ଏବଂ ସାମରିକ ଉପକରଣ ପାଇଛି। ପାକିସ୍ତାନ ଏହି ଅସ୍ତ୍ରଶସ୍ତ୍ରଗୁଡ଼ିକୁ ଏପରି ଭାବରେ ବ୍ୟବହାର କରିଛି ଯେ ଚାଇନା ମଧ୍ୟ ସେମାନଙ୍କ ପ୍ରସ୍ତୁତିରେ ପ୍ରଭାବିତ ହୋଇଛି।

ଏହି ସମୟରେ ମୁନୀର ଆତଙ୍କବାଦ ପ୍ରସଙ୍ଗ ପାଇଁ ଆମେରିକାକୁ ଦାୟୀ କରିଛନ୍ତି। ସେ କହିଛନ୍ତି, ସୋଭିଏତ୍‌ ୟୁନିଅନ୍‌ ଆଫଗାନିସ୍ତାନ ଉପରେ ଆକ୍ରମଣ ପରେ, ଆମେରିକାର ସହାୟତାରେ ପାକିସ୍ତାନରେ ‘ଜିହାଦୀ ସଂସ୍କୃତି’ ବିକଶିତ ହୋଇଥିଲା ଏବଂ ଏହା ପରେ ଅନେକ ଆତଙ୍କବାଦୀ ସଂଗଠନର ମୂଳ ପାଲଟିଥିଲା।

The post ଆମେରିକାରେ ପହଞ୍ଚି ଭାରତ ବିରୋଧରେ ବିଷ ଓଗାଳିଲେ ମୁନୀର: କହିଲେ, ଆମେ ପ୍ରତିଶୋଧ ନେବୁ appeared first on Dharitri Odia News.