ଇଂଲଣ୍ଡ ବିପକ୍ଷ ୪ର୍ଥ ଟେଷ୍ଟରୁ ନୀତିଶ ରେଡ୍ଡୀ, ଅର୍ଶଦୀପ ସିଂହ ବାଦ

ଲଣ୍ଡନ,୨୦।୭: ଭାରତୀୟ କ୍ରିକେଟ ଦଳକୁ ଏକ ବଡ଼ ଝଟକା ଲାଗିଛି। ଅଲରାଉଣ୍ଡର ନୀତିଶ କୁମାର ରେଡ୍ଡୀ ଏବଂ ଦ୍ରୁତ ବୋଲର ଅର୍ଶଦୀପ ସିଂହ ଇଂଲଣ୍ଡ ବିପକ୍ଷ ୪ର୍ଥ ଟେଷ୍ଟ ମ୍ୟାଚରୁ ବାଦ ପଡ଼ିଛନ୍ତି। ସୂଚନା ଅନୁଯାୟୀ, ନୀତିଶ ରେଡ୍ଡୀ ରବିବାର (ଜୁଲାଇ ୨୦) ଜିମ୍‌ ସେସନ ସମୟରେ ଗୋଡ଼ରେ ଗମ୍ଭୀର ଆଘାତ ପାଇଛନ୍ତି। ତାଙ୍କର ଲିଗାମେଣ୍ଟ କ୍ଷତିଗ୍ରସ୍ତ ହୋଇଥିବା ଜଣାପଡ଼ିଛି, ଯାହା ଫଳରେ ସେ ଏହି ସିରିଜରୁ ସମ୍ପୂର୍ଣ୍ଣ ବାଦ ପଡ଼ିଛନ୍ତି।

ଅନ୍ୟପକ୍ଷରେ, ଟେଷ୍ଟ ଡେବ୍ୟୁ ପାଇଁ ଅପେକ୍ଷା କରିଥିବା ଅର୍ଶଦୀପ ସିଂହ ମଧ୍ୟ ପ୍ରାକ୍ଟିସ ସମୟରେ ହାତରେ ଆଘାତ ପାଇବା ଯୋଗୁଁ ମାଞ୍ଚେଷ୍ଟର ଟେଷ୍ଟରୁ ବାଦ ପଡ଼ିଛନ୍ତି। ଏହା ସହିତ ବାର୍ମିଂହାମରେ ମ୍ୟାଚ ଜିତାଉ ପ୍ରଦର୍ଶନ କରିଥିବା ଆକାଶ ଦୀପଙ୍କ ମଧ୍ୟ ଖେଳିବା ସମ୍ଭାବନା କମ ରହିଛି।

ନୀତିଶ ରେଡ୍ଡୀଙ୍କ ଆଘାତ ଦଳର ସନ୍ତୁଳନକୁ ବିଗାଡ଼ି ପାରେ। ସେ ଦ୍ୱିତୀୟ ଟେଷ୍ଟରେ ଶାର୍ଦୁଲ ଠାକୁରଙ୍କ ସ୍ଥାନରେ ଖେଳିଥିଲେ। ବାର୍ମିଂହାମରେ ସେ ବିଶେଷ ପ୍ରଭାବ ପକାଇ ନଥିଲେ, କିନ୍ତୁ ୩ୟ ଟେଷ୍ଟରେ ବୋଲିଂରେ ଗୁରୁତ୍ୱପୂର୍ଣ୍ଣ ସଫଳତା ହାସଲ କରି ଇଂଲଣ୍ଡର ଟପ୍‌ ଅର୍ଡରକୁ ଧ୍ୱସ୍ତ କରିଥିଲେ।

ଭାରତୀୟ ଦଳ ପୂର୍ବରୁ ଆଘାତ ସମସ୍ୟାରେ ଜର୍ଜରିତ। ଲର୍ଡସ ଟେଷ୍ଟର ପ୍ରଥମ ଦିନରେ ଋଷଭ ପନ୍ତଙ୍କ ବାମ ହାତର ଆଙ୍ଗୁଠିରେ ଆଘାତ ଲାଗିଥିଲା, ଯେଉଁଥିପାଇଁ ସେ ଏବେ ଉଇକେଟ୍‌ କିପିଂ କରୁ ନାହାନ୍ତି। ମାଞ୍ଚେଷ୍ଟର ଟେଷ୍ଟରେ ଧ୍ରୁବ ଜୁରେଲ ଉଇକେଟ୍‌ କିପିଂ କରିବେ ଏବଂ ପନ୍ତ କେବଳ ବ୍ୟାଟ୍ସମ୍ୟାନ ଭାବେ ଖେଳିବେ ବୋଲି ଜଣାପଡ଼ିଛି।

ଏହି ପରିବର୍ତ୍ତନ ଦଳର ବୋଲିଂ ଶକ୍ତିକୁ ଦୁର୍ବଳ କରିପାରେ। ନୀତିଶ ରେଡ୍ଡୀଙ୍କ ଅନୁପସ୍ଥିତି ଦଳକୁ ଆହୁରି ଅସୁବିଧାରେ ପକାଇଛି। ଏହା ମଧ୍ୟ ଜଣାପଡ଼ିଛି ଯେ ଦଳରେ ଅନ୍ଶୁଲ କାମ୍ବୋଜଙ୍କୁ ଅନ୍ତର୍ଭୁକ୍ତ କରାଯାଇଛି, ଯଦିଓ ଏ ନେଇ ଆନୁଷ୍ଠାନିକ ଘୋଷଣା ହୋଇ ନାହିଁ। କାମ୍ବୋଜ ‘ଏ’ ମ୍ୟାଚରେ ନିଖୁଣ ଲାଇନ ଓ ଲେନ୍ଥରେ ବୋଲିଂ କରି ପ୍ରଭାବିତ କରିଥିଲେ।

ଯଦି ଆକାଶ ଦୀପ ଖେଳି ନ ପାରନ୍ତି, ତେବେ ଜୁଲାଇ ୨୩ରେ ଅନୁଷ୍ଠିତ ଟେଷ୍ଟ ମ୍ୟାଚ ପାଇଁ ଭାରତୀୟ ଦଳର ସମ୍ଭାବ୍ୟ ଲାଇନଅପ୍‌ ହେଉଛି: କେଏଲ ରାହୁଲ, ୟଶସ୍ୱୀ ଜୟସୱାଲ, କରୁଣ ନାୟାର/ସାଇ ସୁଦର୍ଶନ, ଶୁଭମନ ଗିଲ, ଋଷଭ ପନ୍ତ, ଧ୍ରୁବ ଜୁରେଲ (ଉଇକେଟ୍‌ କିପର), କୁଲଦୀପ ୟାଦବ/ୱାଶିଂଟନ ସୁନ୍ଦର, ରବୀନ୍ଦ୍ର ଜାଡେଜା, ଜସପ୍ରୀତ ବୁମରା, ମହମ୍ମଦ ସିରାଜ, ପ୍ରସିଦ୍ଧ କୃଷ୍ଣ/ଶାର୍ଦୁଲ ଠାକୁର।

ଭାରତୀୟ ଦଳର ଇଂଲଣ୍ଡ ଗସ୍ତ ପାଇଁ ଅଦ୍ୟତନ ସ୍କ୍ୱାଡ:
ଶୁଭମନ ଗିଲ (ଅଧିନାୟକ), ଋଷଭ ପନ୍ତ (ଉଇକେଟ୍‌ କିପର, ଉପ-ଅଧିନାୟକ), ୟଶସ୍ୱୀ ଜୟସୱାଲ, କେଏଲ ରାହୁଲ, ସାଇ ସୁଦର୍ଶନ, ଅଭିମନ୍ୟୁ ଈଶ୍ୱରନ, କରୁଣ ନାୟାର, ନୀତିଶ କୁମାର ରେଡ୍ଡୀ, ରବୀନ୍ଦ୍ର ଜାଡେଜା, ଧ୍ରୁବ ଜୁରେଲ (ଉଇକେଟ୍‌ କିପର), ୱାଶିଂଟନ ସୁନ୍ଦର, ଶାର୍ଦୁଲ ଠାକୁର, ଜସପ୍ରୀତ ବୁମରା, ମହମ୍ମଦ ସିରାଜ, ପ୍ରସିଦ୍ଧ କୃଷ୍ଣ, ଆକାଶ ଦୀପ, ଅର୍ଶଦୀପ ସିଂହ, ଅନ୍ଶୁଲ କାମ୍ବୋଜ, କୁଲଦୀପ ଯାଦବ।

The post ଇଂଲଣ୍ଡ ବିପକ୍ଷ ୪ର୍ଥ ଟେଷ୍ଟରୁ ନୀତିଶ ରେଡ୍ଡୀ, ଅର୍ଶଦୀପ ସିଂହ ବାଦ appeared first on Dharitri Odia News.