ଇତିହାସ ରଚିଲେ ରିଷଭ ପନ୍ତ, ଏଭଳି କରିବାରେ ହେଲେ ୭ମ ଖେଳାଳି

ଜୟପୁର,୨୮।୩: ୨୦୨୪ ଆଇପିଏଲର ୧୭ ତମ ସିଜନରେ ପ୍ରାୟ ପ୍ରତ୍ୟେକ ମ୍ୟାଚରେ ନୂଆ ରେକର୍ଡ ସୃଷ୍ଟି ହେଉଛି । ଜୟପୁରର ସୱାଇ ମାନ ସିଂ ଷ୍ଟାଡିୟମରେ ରାଜସ୍ଥାନ ରୟାଲ୍ସ ଏବଂ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ଆଇପିଏଲ ୨୦୨୪ର ୯ମ ମ୍ୟାଚ ଖେଳାଯାଉଛି । ଆଉ ଏହି ମ୍ୟାଚ ପାଇଁ ପଡ଼ିଆରେ ପ୍ରବେଶ କରିବା ମାତ୍ରେ ଦିଲ୍ଲୀ ଅଧିନାୟକ ରିଷଭ ପନ୍ତ ତାଙ୍କ ନାମରେ ଏକ ବିଶେଷ ସଫଳତା ହାସଲ କରିଛନ୍ତି। ସେ ବର୍ତ୍ତମାନ ଆଇପିଏଲରେ ଡିସି ପାଇଁ ୧୦୦ଟି ମ୍ୟାଚ ଖେଳି ଇତିହାସର ପ୍ରଥମ ଖେଳାଳି ହୋଇଛନ୍ତି। ଆଇପିଏଲରେ ଗୋଟିଏ ଦଳ ପାଇଁ ୧୦୦ ଟି ମ୍ୟାଚ ପୂରଣ କରିବାରେ ସେ ସପ୍ତମ ଖେଳାଳି ହୋଇପାରିଛନ୍ତି।

ପନ୍ତ ବର୍ତ୍ତମାନ ଦିଲ୍ଲୀ କ୍ୟାପିଟାଲ୍ସ ପାଇଁ ସର୍ବାଧିକ ଖେଳିଥିବା ଖେଳାଳି ହୋଇପାରିଛନ୍ତି। ଏ ପର୍ଯ୍ୟନ୍ତ ଏହି ରେକର୍ଡ ଅମିତ ମିଶ୍ରାଙ୍କ ନାମରେ ଥିଲା, ଯିଏ ୧୦ଟି ଅଲଗା ଅଲଗା ସିଜନରେ ଡିସି ପାଇଁ ମୋଟ ୯୯ଟି ମ୍ୟାଚ ଖେଳିଥିଲେ। ଶ୍ରେୟସ ଆୟର ମଧ୍ୟ ତାଙ୍କ କ୍ୟାରିୟରରେ ୭ ସିଜନ ଦିଲ୍ଲୀର ପ୍ରତିନିଧିତ୍ୱ କରିଛନ୍ତି, ଯେଉଁଥିରେ ସେ ମୋଟ ୮୭ଟି ମ୍ୟାଚ ଖେଳିଛନ୍ତି। ଦିଲ୍ଲୀ ପାଇଁ ଚତୁର୍ଥ ସର୍ବାଧିକ ମ୍ୟାଚ ଖେଳିଥିବା ଖେଳାଳି ହେଉଛନ୍ତି ଡେଭିଡ ୱାର୍ନର, ଯିଏ ଏହି ଫ୍ରାଞ୍ଚାଇଜ ପାଇଁ ୮୨ଟି ମ୍ୟାଚ ଖେଳିଛନ୍ତି। ଯଦିଓ ବିରେନ୍ଦର ସେହୱାଗ ଅବସର ନେଇଛନ୍ତି, ସେ ତାଙ୍କ ଆଇପିଏଲ କ୍ୟାରିୟରରେ ଡିସି ପାଇଁ ୭୯ଟି ମ୍ୟାଚ ଖେଳିଛନ୍ତି।

The post ଇତିହାସ ରଚିଲେ ରିଷଭ ପନ୍ତ, ଏଭଳି କରିବାରେ ହେଲେ ୭ମ ଖେଳାଳି appeared first on Dharitri Odia News.