ଇସ୍ରାଏଲ-ଲେବାନନ ସୀମାରେ ୬୦୦ ଭାରତୀୟ ସୈନ୍ୟ ନିୟୋଜିତ, ଶାନ୍ତି ବଜାୟ ରଖିବାକୁ ଜାତିସଂଘର ଗୁରୁତ୍ୱ

ତେଲ ଅଭିବ: ମଧ୍ୟପ୍ରାଚ୍ୟରେ ବୃଦ୍ଧି ପାଉଛି ଉତ୍ତେଜନା। ଲେବାନନରେ ହୋଇଥିବା ପେଜର୍ ବିସ୍ଫୋରଣ ହେଜବୁଲ୍ଲା-ଇସ୍ରାଏଲ ମଧ୍ୟରେ ଯୁଦ୍ଧ ସ୍ଥିତି ଆଡକୁ ନେଇଚାଲିଛି। ଏହି ଉତ୍ତେଜନା ମଧ୍ୟରେ ଶାନ୍ତି ବଜାୟ ରଖିବାରେ  ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି ଭାରତୀୟ ସେନା। ମିଳିତ ଜାତିସଂଘର ଶାନ୍ତି ରକ୍ଷା ମିଶନ ଅଧୀନରେ ଥିବା ଇସ୍ରାଏଲ୍-ଲେବାନନ୍ ସୀମାରେ ଭାରତୀୟ ସେନା ନିଜର ଦୃଢ ଉପସ୍ଥିତି ଜାରି ରଖିଛି।

୨୦୦୦ରେ ସ୍ଥାପିତ ହୋଇଥିବା ବ୍ଲୁ ଲାଇନ ତଥା ଇସ୍ରାଏଲ-ଲେବାନନ ସୀମାରେ ୬୦୦ ଭାରତୀୟ ସୈନ୍ୟ ନିୟୋଜିତ ହୋଇଛନ୍ତି। ଏହି ବଳ ମିଳିତ ଜାତିସଂଘର ମଧ୍ୟବର୍ତ୍ତୀ ଫୋର୍ସର ଲେବାନନ୍ (UNIFIL)ର ଏକ ଅଂଶ, ଯାହା ବିବାଦୀୟ ଅଞ୍ଚଳରେ ଶାନ୍ତି ଏବଂ ସ୍ଥିରତା ବଜାୟ ରଖିବା ପାଇଁ  ରହିଛନ୍ତି।

ଇକୋନୋମିକ ଏକ୍ସପ୍ରେସର ରିପୋର୍ଟ ଅନୁଯାୟୀ, ନିକଟ ଅତୀତରେ ହେଜବୁଲ୍ଲା ଏବଂ ଇସ୍ରାଏଲ ମଧ୍ୟ ରକେଟ ଏବଂ ଡ୍ରୋନ୍ ସାହାଯ୍ୟରେ ପରସ୍ପରର ଟାର୍ଗେଟ ଉପରେ ଆକ୍ରମଣ କରିଛନ୍ତି। ଉଭୟ ପକ୍ଷର ଆକ୍ରମଣ ଏବଂ ଧମକ ମଧ୍ୟରେ ଭାରତୀୟ ସେନାର ଭୂମିକା ଏଥିରେ ହସ୍ତକ୍ଷେପ କରିବା ନୁହେଁ ବରଂ ମିଳିତ ଜାତିସଂଘର ନିର୍ଦ୍ଦେଶ ଅନୁଯାୟୀ ଶାନ୍ତି ଏବଂ ନିରାପତ୍ତା ବଜାୟ ରଖିବା। ପ୍ରାୟ 120 କିଲୋମିଟର ବ୍ୟାପୀ ବ୍ଲୁ ଲାଇନରେ ଇସ୍ରାଏଲ୍ ଏବଂ ଲେବାନନ୍ ମଧ୍ୟରେ ଏକ ବଫର୍ ଜୋନ୍ ଭାବରେ କାର୍ଯ୍ୟ କରିଥାଏ, ଯେଉଁଠାରେ କେବଳ ଭାରତୀୟ ସୈନ୍ୟ ସମେତ ଜାତିସଂଘ ବାହିନୀ ନିୟୋଜିତ ହୋଇଥିଲେ।

ଭାରତର ବୈଦେଶିକ ମନ୍ତ୍ରାଳୟ ବିବୃତ୍ତିରେ କହିଛି ଯେ- UNIFIL ଅଧୀନରେ ଥିବା ଭାରତୀୟ ସେନାର ପ୍ରଥମ ଉଦ୍ଦେଶ୍ୟ ହେଉଛି ଶାନ୍ତି ବଜାୟ ରଖିବା ଏବଂ ଏହି ଅଞ୍ଚଳରେ ବିବାଦ କିମ୍ବା ହିଂସା ଘଟଣା ଯେପରି ବୃଦ୍ଧି ନହୁଏ ସେଥିପାଇଁ ସୁନିଶ୍ଚିତ କରିବା। ଏହି ଅଞ୍ଚଳରେ ଜାତିସଂଘର ଅନ୍ୟାନ୍ୟ ମିଶନକୁ ସୁରକ୍ଷା ଦେବା ଏବଂ ଶାନ୍ତି ରକ୍ଷା କାର୍ଯ୍ୟରେ କୌଣସି ବିପଦକୁ ରୋକିବା ପାଇଁ ଭାରତୀୟ ସୈନ୍ୟମାନଙ୍କୁ ମଧ୍ୟ ଦାୟିତ୍ୱ ଦିଆଯାଇଛି। ଭାରତୀୟ ସେନାର ଭୂମିକା ଅଧିକ ଗୁରୁତ୍ୱପୂର୍ଣ୍ଣ ହୋଇଯାଏ କାରଣ ଏହା ଇସ୍ରାଏଲ ଏବଂ ହେଜବୁଲ୍ଲା ମଧ୍ୟରେ କୌଣସି ପ୍ରତ୍ୟକ୍ଷ ସାମରିକ କାର୍ଯ୍ୟରେ ଜଡିତ ନୁହେଁ। ସେମାନେ ଜାତିସଂଘର ନିର୍ଦ୍ଦେଶ ପାଳନ କରୁଥିବାବେଳେ ଏକ ବିବାଦୀୟ ସୀମାରେ ସ୍ଥିରତା ବଜାୟ ରଖିବାକୁ ଚେଷ୍ଟା କରନ୍ତି।