ଉଡ଼ାଣରେ ବିଳମ୍ୱ ହେଲେ ଏବେ ବିମାନରୁ ବାହାରକୁ ଆସିପାରିବେ ଯାତ୍ରୀ, ଲାଗୁ ହେଲା ନୂଆ ନିୟମ

ନୂଆଦିଲ୍ଲୀ: ଉଡାଣରେ ବିଳମ୍ୱ ହେଲେ ଯାତ୍ରୀ ଏବେ ବିମାନରୁ ବାହାରକୁ ଆସିପାରିବେ । ଏଥିପାଇଁ ବିମାନ ସୁରକ୍ଷା ନିରୀକ୍ଷଣ ସଂସ୍ଥା ନୂଆ ନିର୍ଦ୍ଦେଶ ଜାରି କରିଛି । ଏହା ଅନୁସାରେ ଯାତ୍ରୀ ବିମାନରେ ବସିବା ପରେ ଉଡାଣରେ ବିଳମ୍ୱ ହେବା ସ୍ଥଳେ ଯାତ୍ରୀଙ୍କୁ ବିମାନ ବନ୍ଦରର ପ୍ରସ୍ଥାନ ଦ୍ୱାର ଜରିଆରେ ବାହାରକୁ ଯିବା ପାଇଁ ଅନୁମତି ଦିଆଯିବ ।

ବ୍ୟୁରୋ ଅଫ୍ ସିଭିଲ୍ ଆଭିଏସନ ସିକ୍ୟୁରିଟି ମହାନିର୍ଦ୍ଦେଶକ ଜୁଲ୍ଫିକାର ହସନ କହିଛନ୍ତି ଯେ ନୂଆ ନିର୍ଦ୍ଦେଶ ମାର୍ଚ୍ଚ ୩୦ରୁ ଏୟାରଲାଇନ କମ୍ପାନି ଏବଂ ବିମାନ ବନ୍ଦର ପରିଚାଳକଙ୍କୁ ଜାରି କରାଯାଇଥିଲା ଏବଂ ଏବେ ଏହା ଲାଗୁ ହୋଇଛି । ସେ କହିଛନ୍ତି ଯେ ଏହି ମାର୍ଗଦର୍ଶିକା ଯାତ୍ରୀଙ୍କ ଅସୁବିଧାକୁ କମ କରିବାରେ ଉପଯୋଗୀ ହେବ ଏବଂ ବିମାନରେ ବସିବା ପରେ ଦୀର୍ଘ ସମୟ ଧରି ବସି ରହିବାକୁ ପଡ଼ିବ ନାହିଁ । 

ବ୍ୟୁରୋ ଅଫ୍ ସିଭିଲ୍ ଆଭିଏସନ ସିକ୍ୟୁରିଟିର ଏହି ନିର୍ଦ୍ଦେଶ ବିମାନ ବନ୍ଦରରେ ବଢୁଥିବା ଭିଡ଼ ଏବଂ ଉଡାଣରେ ବିଳମ୍ୱ ମାମଲାକୁ ଦେଖି ଦିଆଯାଇଛି । ଅନେକ ଥର ଯାତ୍ରୀ ବିମାନରେ ବସିବା ପରେ ଦୀର୍ଘ ସମୟ ଯାଏ ଫସି ରହିଥାନ୍ତି । ତେବେ ନୂଆ ନିୟମ ପରେ ଏବେ ଉଡାଣରେ ଅଧିକ ବିଳମ୍ୱ ଏବଂ ଅନ୍ୟ ଜରୁରୀ ସ୍ଥିତି ମାମଲାରେ ଯାତ୍ରୀଙ୍କୁ ସମ୍ୱନ୍ଧିତ ବିମାନ ବନ୍ଦରର ପ୍ରସ୍ଥାନ ଦ୍ୱାରରୁ ବାହାରକୁ ଯିବା ପାଇଁ ଅନୁମତି ଦିଆଯିବ । 

ପଢନ୍ତୁ:ମେକ୍ ଇନ୍ ଇଣ୍ଡିଆର ପ୍ରଭାବ, ଆୟ ମାମଲାରେ ରେକର୍ଡ ଭାଙ୍ଗିଲା HAL

ଜୁଲ୍ଫିକାର ହସନ କହିଛନ୍ତି ଯେ ବିମାନ ବନ୍ଦରେ ଭିଡ଼ର ମୁକାବିଲା ପାଇଁ ଅନେକ ପଦକ୍ଷେପ ଗ୍ରହଣ କରାଯାଉଛି । ଏହି କ୍ରମରେ ବିମାନ ବନ୍ଦରରେ ସ୍ମାର୍ଟ ସୁରକ୍ଷା ଲେନ୍ ମଧ୍ୟ ସ୍ଥାପନ କରାଯିବ । ଉଲ୍ଲେଖଯୋଗ୍ୟ ଯେ ଦେଶରେ ଘରୋଇ ବିମାନ ଯାତାୟତ ଲଗାତାର ବଢୁଛି ଏବଂ ପ୍ରତିଦିନ ପ୍ରାୟ ୩୫୦୦ ଉଡାଣ ସଂଚାଳିତ କରାଯାଉଛି ।