ନୂଆଦିଲ୍ଲୀ: ପୁଣି ଜଣେ ପାକିସ୍ତାନୀ ଗୁପ୍ତଚର ଗିରଫ। ଉତ୍ତର ପ୍ରଦେଶ ଆତଙ୍କବାଦ ନିରୋଧୀ ସ୍କ୍ୱାଡ୍ (ATS) ଅଭିଯୁକ୍ତକୁ ଗିରଫ କରିଥିବା ଅଧିକାରୀମାନେ ସୂଚନା ଦେଇଛନ୍ତି। ଅଭିଯୁକ୍ତର ନାମ ଶେହଜାଦ ଏବଂ ସେ ରାମପୁର ଜିଲ୍ଲାର ବାସିନ୍ଦା, ତାକୁ ଶନିବାର ମୁରାଦାବାଦରୁ ହେପାଜତକୁ ନିଆଯାଇଛି। ଗିରଫ ବ୍ୟକ୍ତି ପାକିସ୍ତାନର ଇଣ୍ଟର-ସର୍ଭିସେସ୍ ଇଣ୍ଟେଲିଜେନ୍ସ (ISI) ପାଇଁ ଗୁପ୍ତଚର କାମ କରୁଥିଲା ବୋଲି ଅଧିକାରୀମାନେ କହିଛନ୍ତି।  

ପାକିସ୍ତାନୀ ଗୁଇନ୍ଦା ସଂସ୍ଥା ପାଇଁ ଗୁପ୍ତଚର କାମ କରୁଥିବା ଅଭିଯୋଗରେ ଦେଶବ୍ୟାପୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ବେଳେ ଶେହଜାଦଙ୍କୁ ଗିରଫ କରାଯାଇଥିଲା। ଏହା ପୂର୍ବରୁ ସୋସିଆଲ ମିଡିଆ ଇନ୍‌ଫ୍ଲୁଏନ୍ସର ଏବଂ ୟୁଟ୍ୟୁବର ସମେତ ଏକାଧିକ ପାକିସ୍ତାନ ଗୁପ୍ତଚରଙ୍କୁ ଗିରଫ କରାଯାଇ ସାରିଲାଣି। 

ATS ଦ୍ୱାରା ଜାରି ଏକ ପ୍ରେସ୍ ବିବୃତ୍ତି ଅନୁଯାୟୀ, ଇସଲାମାବାଦର ଗୁଇନ୍ଦା ସଂସ୍ଥାର ସୁରକ୍ଷାରେ ଶେହାଜାଦ ଭାରତ-ପାକିସ୍ତାନ ସୀମା ଦେଇ ଚୋରା ଚାଲାଣରେ ସମ୍ପୃକ୍ତି ଥିଲା। ଏନେଇ ବିଶ୍ୱସନୀୟ ଗୁଇନ୍ଦା ସୂଚନା ମିଳିବା ପରେ କାର୍ଯ୍ୟାନୁଷ୍ଠାନ ହୋଇଛି। ତଦନ୍ତରୁ ଜଣାପଡିଛି ଯେ ସେ ବହୁବାର ପାକିସ୍ତାନ ଯାତ୍ରା କରିଥିଲା ଏବଂ ପ୍ରସାଧନ ସାମଗ୍ରୀ, ପୋଷାକ, ମସଲା ଏବଂ ଅନ୍ୟାନ୍ୟ ସାମଗ୍ରୀର ଅବୈଧ ସୀମାପାର ବାଣିଜ୍ୟରେ ଲିପ୍ତ ଥିଲା। ପୋଲିସ କହିଛି ଯେ ଏହି ଚୋରା ଚାଲାଣ ରାକେଟ୍ ତାଙ୍କ ଗୁପ୍ତଚର କାର୍ଯ୍ୟକଳାପ ପାଇଁ ଏକ ଛାଉଣୀ ଭାବରେ କାର୍ଯ୍ୟ କରୁଥିଲା। 

ଶେହଜାଦଙ୍କ ବିରୋଧରେ ଅନେକ ଆଇଏସଆଇ କାର୍ଯ୍ୟକର୍ତ୍ତାଙ୍କ ସହ ଘନିଷ୍ଠ ସମ୍ପର୍କ ସ୍ଥାପନ କରିବା ଏବଂ ସେମାନଙ୍କୁ ଭାରତର ଜାତୀୟ ସୁରକ୍ଷା ସହିତ ଜଡିତ ସମ୍ବେଦନଶୀଳ ଏବଂ ଗୋପନୀୟ ସୂଚନା ଯୋଗାଇବାର ଅଭିଯୋଗ ରହିଛି। ଅଧିକାରୀମାନେ କହିଛନ୍ତି ଯେ ଅଭିଯୁକ୍ତ କେବଳ ଗୁପ୍ତ ସୂଚନା ପ୍ରଦାନ କରୁନଥିଲା ବରଂ ଭାରତ ଭିତରେ ଆଇଏସଆଇ ପାଇଁ କାର୍ଯ୍ୟକୁ ସହଜ ମଧ୍ୟ କରୁଥିଲା। 

ଅଧିକ ତଦନ୍ତରୁ ଜଣାପଡିଛି ଯେ, ଆଇଏସଆଇ ନିର୍ଦ୍ଦେଶ ଅନୁଯାୟୀ, ଶେହଜାଦ ଭାରତରେ କାର୍ଯ୍ୟରତ ପାକିସ୍ତାନୀ ଏଜେଣ୍ଟମାନଙ୍କୁ ପାଣ୍ଠି ଟ୍ରାନ୍ସଫର କରୁଥିଲା। ସେ ରାମପୁର ଏବଂ ଉତ୍ତର ପ୍ରଦେଶର ଅନ୍ୟାନ୍ୟ ଅଞ୍ଚଳରୁ ଲୋକମାନଙ୍କୁ ଆଇଏସଆଇ-ସଂଯୁକ୍ତ କାର୍ଯ୍ୟକଳାପ ପାଇଁ ନିଯୁକ୍ତି ଦେବା ଉଦ୍ଦେଶ୍ୟରେ ଚୋରା ଚାଲାଣ ବାହାନାରେ ପାକିସ୍ତାନ ପଠାଇବାରେ ସାହାଯ୍ୟ କରିଥିଲା ବୋଲି ଅଭିଯୋଗ ହୋଇଛି।ପୋଲିସର କହିବା ଅନୁଯାୟୀ, ଏହି ବ୍ୟକ୍ତିମାନଙ୍କ ପାଇଁ ଭିସା ଏବଂ ଯାତ୍ରା ଡକ୍ୟୁମେଣ୍ଟଗୁଡ଼ିକ ଆଇଏସଆଇ କାର୍ଯ୍ୟକର୍ତ୍ତାଙ୍କ ସହାୟତାରେ ବ୍ୟବସ୍ଥା କରାଯାଇଥିଲା ବୋଲି ଜଣାପଡ଼ିଛି।

ପଢନ୍ତୁ- ମଣିପୁରରେ ୩୫୦ରୁ ଅଧିକ ଉଗ୍ରବାଦୀ ଗିରଫ; ସିକ୍ରେଟ୍ କୋଡ୍‌ରେ କରୁଥିଲେ ଚାନ୍ଦା ଆଦାୟ

କେବଳ ସେତିକି ନୁହେଁ ଶେହଜାଦ ଭାରତୀୟ ସିମ୍ କାର୍ଡ କିଣି ଆଇଏସଆଇ ଏଜେଣ୍ଟମାନଙ୍କୁ ଯୋଗାଇଥିବା ମଧ୍ୟ କୁହାଯାଉଛି। ଭାରତରେ ଆତଙ୍କ ଖଳାଇବା ପାଇଁ ଏହି ସିମ୍ ବ୍ୟବହାର କରିବା ପାଇଁ ସେ ପାକ ଏଜେଣ୍ଟକୁ ସିମ୍ ଦେଇଥିବା ସନ୍ଦେହ କରାଯାଉଛି। ଲକ୍ଷ୍ନୌର ATS ପୋଲିସ ଷ୍ଟେସନରେ ଭାରତୀୟ ନ୍ୟାୟ ସଂହିତାର ଧାରା ୧୪୮ ଏବଂ ୧୫୨ ଅନୁଯାୟୀ ଶେହଜାଦଙ୍କ ବିରୁଦ୍ଧରେ ଏକ ମାମଲା ରୁଜୁ କରାଯାଇଛି। ଅଭିଯୁକ୍ତକୁ ମାଜିଷ୍ଟ୍ରେଟଙ୍କ ସମ୍ମୁଖରେ ହାଜର କରାଯିବା ସହିତ ଆଇନଗତ ପ୍ରକ୍ରିୟା ଜାରି ରହିଛି।

ସେପଟେ ପାକିସ୍ତାନୀ କାର୍ଯ୍ୟକର୍ତ୍ତାଙ୍କୁ ସମ୍ବେଦନଶୀଳ ସୂଚନା ପ୍ରଦାନ କରିବା ଅଭିଯୋଗରେ ହରିୟାଣାର ଜଣେ ଟ୍ରାଭେଲ ବ୍ଲଗରଙ୍କ ସମେତ ୬ ଜଣ ଭାରତୀୟ ନାଗରିକଙ୍କୁ ଗିରଫ କରାଯାଇଛି। ଏହି ନେଟୱାର୍କ ହରିୟାଣା ଏବଂ ପଞ୍ଜାବରେ ବ୍ୟାପିଥିଲା, ଯେଉଁଥିରେ ପ୍ରମୁଖ କାର୍ଯ୍ୟକର୍ତ୍ତାମାନେ ଏଜେଣ୍ଟ, ଆର୍ଥିକ ସହାୟତାକାରୀ ଏବଂ ସୂଚନାଦାତା ଭାବରେ କାର୍ଯ୍ୟ କରୁଥିଲେ। ଯେଉଁଥିରେ ୟୁଟ୍ୟୁବର ଜ୍ୟୋତି ମଲହୋତ୍ରାଙ୍କ ନାଁ ଚର୍ଚ୍ଚାରେ ରହିଛି।