ଓଡ଼ିଆ ବୈଜ୍ଞାନିକଙ୍କ ନେତୃତ୍ୱରେ ହେଲା ଅଯୋଧ୍ୟା ରାମ ମନ୍ଦିର ‘ସୂର୍ଯ୍ୟ ତିଲକ’ ପ୍ରସ୍ତୁତି

ଭୁବନେଶ୍ୱର,୧୦ା୧: ଆଯୋଧ୍ୟାର ରାମ ମନ୍ଦିର ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିଲା ବେଳେ ଓଡ଼ିଆ ଜ୍ଞାନିକଙ୍କ ନେତୃତ୍ୱରେ ସେଣ୍ଟ୍ରାଲ ବିଲଡିଂ ରିସର୍ଚ୍ଚ ଇନଷ୍ଟିଚ୍ୟୁଟ (ସିବିଆଇଆର) ର ଏକ ଟିମ୍ ଉତ୍ତରପ୍ରଦେଶର ଅଯୋଧ୍ୟାରେ ରାମ ମଣ୍ଡପରେ ସ୍ୱତନ୍ତ୍ର ‘ସୂର୍ଯ୍ୟ ତିଲକ’ ପ୍ରକଳ୍ପ ପ୍ରସ୍ତୁତ କରିଛନ୍ତି। ଏହି ପ୍ରକଳ୍ପ ଅଧୀନରେ ପ୍ରତିବର୍ଷ ରାମ ନବମୀ ଅଯୋଧ୍ୟା ମନ୍ଦିରରେ ପ୍ରଭୁ ରାମଙ୍କ ପ୍ରତିମା କପାଳରେ ‘ତିଲକ’ ଆକାରରେ ସୂର୍ଯ୍ୟ କିରଣ ଦେଖାଯିବ।

ଓଡ଼ିଶାରେ ଜନ୍ମିତ ବୈଜ୍ଞାନିକ ସରୋଜ କୁମାର ପାଣିଗ୍ରାହୀଙ୍କ ନେତୃତ୍ୱରେ ଏହି ପ୍ରକଳ୍ପର ପରିକଳ୍ପନା କରାଯାଇଛି ବୋଲି ସୂତ୍ରରୁ ଖବର ମିଳିଛି। ଏହି ପ୍ରକଳ୍ପ ସୂର୍ଯ୍ୟକିରଣ, ଦର୍ପଣ ଏବଂ ଲେନ୍ସ ସାହାଯ୍ୟରେ କାମ କରିବ। ତେବେ ବିଦ୍ୟୁତ୍, ବ୍ୟାଟେରୀ, ଲୁହା ଏବଂ ଇସ୍ପାତର କୌଣସି ବ୍ୟବହାର ହେବ ନାହିଁ ବୋଲି ସୂତ୍ରରୁ ଖବର ପ୍ରକାଶ ପାଇଛି।

ସୂଚନାନୁସାରେ, ରୁର୍କି ଭିତ୍ତିକ ସିବିଆରଆଇ ବୈଜ୍ଞାନିକମାନେ ମାନୁଆଲ ଚାଳିତ ସିଷ୍ଟମ ପାଇଁ ଏଥିରେ ପିତ୍ତଳ ବ୍ୟବହାର କରିଛନ୍ତି। “ବୃତ୍ତାକାର ତିଲକ ଆକାରରେ ସୂର୍ଯ୍ୟ କିରଣ ରାମ ନବମୀର ଅଯୋଧ୍ୟା ମନ୍ଦିରରେ ପ୍ରଭୁ ରାମଙ୍କ ପ୍ରତିମୂର୍ତ୍ତିର କପାଳରେ ଦୃଶ୍ୟମାନ ହେବ। ଖବର ଅନୁଯାୟୀ ମଧ୍ୟାହ୍ନ ସମୟରେ ଏହି ତିଲକ ପ୍ରଭୁ ରାମଙ୍କ କପାଳରେ ତିନିରୁ ଚାରି ମିନିଟ୍ ପର୍ଯ୍ୟନ୍ତ ଦେଖାଯିବେ।

ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଜ୍ୟୋତିର୍ବିଜ୍ଞାନ ଏବଂ ବେଙ୍ଗାଲୁରୁର ଏକ ଇଞ୍ଜିନିୟରିଂ ପ୍ରତିଷ୍ଠାନ ଏହି ପ୍ରକଳ୍ପରେ ସିବିଆରଆଇ ଦଳକୁ ସାହାଯ୍ୟ କରିଛି। ଓଡ଼ିଶାର ଗଜପତି ଜିଲାରେ ପାରାଲାଖେମୁଣ୍ଡିର ଗୌରାଙ୍ଗ ପାଣିଗ୍ରାହୀ ଏବଂ ହେମାଲତା ପାଣିଗ୍ରାହିଙ୍କଠାରୁ ଜନ୍ମ ହୋଇଥିବା ସରୋଜ ନିଜ ସହରରୁ ସ୍କୁଲ ଶିକ୍ଷା ସମାପ୍ତ କରିଥିଲେ।

ସେ ବୁର୍ଲା ଇଞ୍ଜିନିୟରିଂ କଲେଜରୁ ବି.ଟେକ୍ ଏବଂ ରାଉରକେଲାରେ ଥିବା ରିଜିଓନାଲ ଇଞ୍ଜିନିୟରିଂ କଲେଜ (REC) ରୁ ଏମ.ଟେକ କରିଥିଲେ।

ସରୋଜ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି) ରୁର୍କିରୁ ପିଏଚଡି ଶେଷ କରିବା ପରେ ସିବିଆରଆଇ ରେ ବୈଜ୍ଞାନିକ ଭାବରେ କାର୍ଯ୍ୟ କରୁଛନ୍ତି।

The post ଓଡ଼ିଆ ବୈଜ୍ଞାନିକଙ୍କ ନେତୃତ୍ୱରେ ହେଲା ଅଯୋଧ୍ୟା ରାମ ମନ୍ଦିର ‘ସୂର୍ଯ୍ୟ ତିଲକ’ ପ୍ରସ୍ତୁତି appeared first on Dharitri Odia News.