କନିଷ୍ଠ ଶିକ୍ଷକ ନିଯୁକ୍ତି ମାମଲା: ଚର୍ଚ୍ଚାରେ ଏଡସିଲ୍ ସ୍ପଷ୍ଟୀକରଣ

ରାଜ୍ୟରେ ୨୦ହଜାର କନିଷ୍ଠ ଶିକ୍ଷକ ନିଯୁକ୍ତି ଅନିୟମିତତା ପ୍ରସଙ୍ଗରେ ଚୟନ ପ୍ରକ୍ରିୟା କରିଥିବା ସଂସ୍ଥା ଏଡସିଲ୍ ପକ୍ଷରୁ ଆଜି ସ୍ପଷ୍ଟୀକରଣ ଦିଆଯାଇଛି । କନିଷ୍ଠ ଶିକ୍ଷକ ନିଯୁକ୍ତିରେ ଅନିୟମିତତା ଅଭିଯୋଗରେ ବିରୋଧୀ ଓ ଶାସକ ଦଳ ମୁର୍ହାମୁହିଁ ହୋଇଥିବାବେଳେ ଆଜି କେନ୍ଦ୍ରୀୟ ସଂସ୍ଥା ଏଡସିଲ୍ ପକ୍ଷରୁ ଜାରି ପ୍ରେସ୍ ରିଲିଜକୁ ନେଇ ଦ୍ୱନ୍ଦ୍ୱ ବଢ଼ିଛି । କେନ୍ଦ୍ର ଶିକ୍ଷା ମନ୍ତ୍ରଣାଳୟ ଅଧୀନରେ ଥିବା ସରକାରୀ ଉଦ୍ୟୋଗ ଏଡସିଲ୍ ଆଜି ଯେଉଁ ପ୍ରେସ୍ ରିଲିଜ୍ ଜାରି କରିଛି ତାହା ରାଜ୍ୟ ସରକାରଙ୍କ ପରୀକ୍ଷା ନୀତିକୁ ସମର୍ଥନ ନା ବିରୋଧ ତାହା ବୁଝାପଡ଼ୁନି । ତଥାପି କୌଣସି ସ୍ପଷ୍ଟତା ନଥିବା ପ୍ରେସ୍ ରିଲିଜ୍ କାହିଁକି ‘ଏଡସିଲ୍‌’ ଜାରି କଲା ତାକୁ ନେଇ ଏବେ ସାଧାରଣରେ ଚର୍ଚ୍ଚା ଲାଗି ରହିଛି ।

ସୂଚନା ଅନୁସାରେ, କେନ୍ଦ୍ରୀୟ ସରକାରୀ ଉଦ୍ୟୋଗ ଏଡସିଲ୍ ପକ୍ଷରୁ ଆଜି ି ଏକ ପ୍ରେସ୍ ରିଲିଜ୍ ଜାରି ହୋଇଛି । ଡଃ ଚନ୍ଦ୍ରଶେଖରଙ୍କ ଦ୍ୱାରା ଜାରି ଏଡସିଲର ଏହି ପ୍ରେସ୍ ରିଲିଜରେ ଉଲ୍ଲେଖ ଅଛି ଯେ, କମ୍ପ୍ୟୁଟର ଆଧାରିତ ଟେଷ୍ଟ ପରେ ଏଡସିଲ୍ ଦ୍ୱାରା ପରୀକ୍ଷା ଫଳ ପ୍ରସ୍ତୁତ କରାଯାଇଥିଲା, ଯାହାକି ୨୦୨୩ ଜାନୁୟାରୀ ୬ତାରିଖରେ ସ୍ୱାକ୍ଷରିତ ଏମଓୟୁ ଓ ୨୦୨୩ ଅଗଷ୍ଟ ୨୨ତାରିଖର ରେଜଲ୍ୟୁସନରେ ଦର୍ଶାଯାଇଥିବା ଗାଇଡଲାଇନ୍ ଆଧାରରେ ପ୍ରସ୍ତୁତ କରାଯାଇ ଓଡ଼ିଶା ସ୍କୁଲ ଏଜୁକେସନ ପ୍ରୋଗ୍ରାମ ଅଥରିଟି(ଓସେପା)ର ଅଧିକୃତ ଅଧିକାରୀଙ୍କୁ ପ୍ରଦାନ କରାଯାଇଥିଲା ।  କମ୍ବାଇନଡ୍ ମେରିଟ୍ ଲିଷ୍ଟ ୨୦୨୪ ଜାନୁୟାରୀ ୧୩ତାରିଖରେ ଓସେପାକୁ ପ୍ରଦାନ କରାଯାଇଥିଲା ଓ ଜାନୁୟାରୀ ୧୫ତାରିଖରେ ଜିଲ୍ଲା ଆଲୋକେସନ ସହ ମେରିଟ୍ ଲିଷ୍ଟ ଓସେପାକୁ ପ୍ରଦାନ କରାଯାଇଥିଲା।

୨୦୨୩ ଅଗଷ୍ଟ ୨୨ ତାରିଖ ଓ ସେପ୍ଟେମ୍ବର ୧୦ ତାରିଖର ଗାଇଡଲାଇନ୍ ଆଧାରରେ ଓଡ଼ିଶା ସରକାରଙ୍କ ଦ୍ୱାରା କନିଷ୍ଠ ଶିକ୍ଷକଙ୍କ ନିଯୁକ୍ତି, ଆବେଦନପତ୍ର ଦାଖଲ ମଡେଲ, ଯୋଗ୍ୟତା, ବୟସ, ସଂରକ୍ଷଣ ସର୍ତ୍ତାବଳୀ, ଚୟନ ପ୍ରକ୍ରିୟା ଓ ପଦ୍ଧତି ମାଧ୍ୟମରେ ମେରିଟ୍ ଲିଷ୍ଟ ଚୂଡ଼ାନ୍ତ ହୋଇଥିଲା । ରେସ୍ପନର୍ସ କ୍ୟୁରି ମ୍ୟାନେଜମେଂଟ ଦ୍ୱାରା ଓସେପାର ନିର୍ଦ୍ଧାରିତ ପ୍ରକ୍ରିୟା ଅନୁଯାୟୀ ସବୁ ପ୍ରକାରର ଅଭିଯୋଗର ସମାଧାନ କରାଯାଇଥିଲା ବୋଲି ପ୍ରେସ୍ ରିଲିଜରେ ଦର୍ଶାଯାଇଛି ।

ତେବେ ଭାରତ ସରକାରଙ୍କ ଏଡସିଲ୍ ସଂସ୍ଥା ପକ୍ଷରୁ ଜାରି ପ୍ରେସ୍ ରିଲିଜ୍ କାହାକୁ କ୍ଲିନଚିଟ୍ ଦେବା ପାଇଁ ଉଦ୍ଦିଷ୍ଟ ତାକୁ ନେଇ ଦ୍ୱନ୍ଦ୍ୱ ବଢ଼ିବାରେ ଲାଗିଛି ।
ସୂଚନାଯୋଗ୍ୟ, ରାଜ୍ୟରେ କନିଷ୍ଠ ଶିକ୍ଷକ ନିଯୁକ୍ତିକୁ ନେଇ ଅନିୟମିତତା ଅଭିଯୋଗରେ ବିରୋଧୀ କଂଗ୍ରେସ ଓ ବିଜେପି ଏବେ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରୁଛନ୍ତି । କଂଗ୍ରେସ ଆଜି ଗଣଶିକ୍ଷା ମନ୍ତ୍ରୀଙ୍କ ବାସଭବନ ଘେରାଉ କରିଥିବା ଜଣାପଡ଼ିଛି ।