କର୍କଟ ରୋଗୀ ମାଆର ଆଶା ପୂରଣ କଲା ପୁଅ, ପାଇଲା OPSCରେ ବଡ ସଫଳତା

କଣିହାଁ : ପୁଅ ପାଇଁ ମାଆ ବସାଉଥିଲା କଳସ । ସବୁଦିନ ପୂଜା କରି ପୁଅର ଚାକିରି ଉଦ୍ଦେଶ୍ୟରେ ମାଆ ଘର ଦୁଆରେ ବସାଉଥିଲା କଳସ । ମାଆ ମାରାତ୍ମକ ରୋଗରେ ଆକ୍ରାନ୍ତ, ନିଜ ବଞ୍ଚିବା ଉପରେ ଆଶା ଛାଡିଯାଇଛି ହେଲେ ପୁଅ ଚାକିରି କରିବ ଏହି ବିଶ୍ବାସ ଥିଲା ମାଆର । ସେଥିପାଇଁ ନିଇତି କଳସ ବସାଉଥିଲା ମାଆ । ଭଗବାନ ବି ଏହି ମାଆର ଡାକ ଶୁଣିଛନ୍ତି । ପୁଅ ଆଜି ଓପିଏସସିରେ ସଫଳତା ପାଇଛି । ଏବେ ପୁଅ ବନିଯିବ ବଡ ସରକାରୀ ଅଫିସର । ପୁଅର ଏହି ସଫଳତାକୁ ପାଳନ କରିବାକୁ କାହିଁ କେବେ ଠୁ ଅପେକ୍ଷା କରିଥିଲେ ବାପା ମାଆ । ଆଜି ଖୁସିର ସୀମା ରହୁନି କାହାର ।
ପୁଅ ଓପିଏସି ପାଇବା ପରେ ଏ ମାଆ ଭୁଲିଯାଇଛି ତାର ରୋଗକୁ । ମାରାତ୍ମକ କର୍କଟ ରୋଗ ବି ଆଜି କନ୍ଦାଇ ପାରୁନି ଏ ମାଆର ଖୁସି ଆଗରେ ।

ଓଡ଼ିଶା ସିଭିଲ୍ ସର୍ଭିସ୍ (ଓସିଏସ୍) ପରୀକ୍ଷାରେ କଣିହାଁ ବ୍ଳକ ରଞ୍ଜନା ଗାଁର ସନ୍ତୋଷ ଶତପଥୀ ଓ ମା’ ହରିପ୍ରିୟା ଶତପଥୀଙ୍କ ସାନ ପୁଅ କଳିଙ୍ଗ ଆଶିଷ ଶତପଥୀ କୃତକାର୍ଯ୍ୟ ହୋଇଛନ୍ତି । ସେ ୮୮ ରାଙ୍କରେ ରହି ଏହି ସଫଳତା ଅର୍ଜନ କରିଛନ୍ତି । ସେ ରାଉରକେଲା ଏନ୍‌ଆଇଟିରୁ ପାସ୍‌ କରିବା ପରେ ପ୍ରଥମ ଥର ପାଇଁ ବିନା କୋଚିଙ୍ଗରେ ଓଡ଼ିଶା ସିଭିଲ ସର୍ଭିସ୍ ପରୀକ୍ଷା ଦେଇ ଏହି ସଫଳତା ହାସଲ କରିଛନ୍ତି । ସେ କୃଷକ ପରିବାରରେ ଜନ୍ମଗ୍ରହଣ କରିଥିବା ସହ ପ୍ରତିଦିନ ୫ରୁ ୬ ଘଣ୍ଟା ପରିଶ୍ରମ କରୁଥିଲେ । ଅଧିକ ପରିଶ୍ରମ କରି ଭାରତୀୟ ପ୍ରାଶାସନିକ ସେବା ପରୀକ୍ଷାରେ କୃତକାର୍ଯ୍ୟ ହେବାକୁ ଉଦ୍ୟମ କରିବେ ବୋଲି କହିଛନ୍ତି ।

ବାପା ଜଣେ କୃଷକ ଏବଂ ମାଆ ଜଣେ ଗୃହିଣୀ ହୋଇଥିବାବେଳେ ମାଆ ( ହରିପ୍ରିୟା ) କ୍ୟାନସର ରୋଗରେ ପୀଡିତା । ସେଥିଯୋଗୁଁ ବାପା ସନ୍ତୋଷ ଶତପଥୀଙ୍କର ଆର୍ଥିକବସ୍ଥା ବହୁତ ଦୂର୍ବଳ । ପ୍ରଭୁ ଜଗନ୍ନାଥ , ମାତା ବୈଷ୍ଣଦେବୀ , ପରିବାରର ସମସ୍ତ ସଦସ୍ଯ ତଥା ବିଶେଷ କରି ପିଉସୀ ଓ ବଡ଼ବାପାଙ୍କୁ କଳିଙ୍ଗ ନିଜ ସଫଳତା ପାଇଁ ଶ୍ରେୟ ଦେଇଛନ୍ତି ।

ଆଗକୁ ଜଣେ ସଫଳ ପ୍ରଶାସକ ହୋଇ ପ୍ରତିଟି ଲୋକଙ୍କୁ ସେବା ଦେବାପାଇଁ ଲକ୍ଷ୍ୟ ରଖିଛନ୍ତି । କଳିଙ୍ଗ ଆଶିଷଙ୍କ ସଫଳତା ପରେ ପାଳଲହଡ଼ା ନିର୍ବାଚନମଣ୍ଡଳୀର ବିଧାୟକ ଅଶୋକ କୁମାର ମହାନ୍ତିଙ୍କ ସହିତ ଅନେକ ସମ୍ପର୍କୀୟ ଏବଂ ଶୁଭେଚ୍ଛୁ ମାନଙ୍କର ଛୁଅ ଛୁଟିଛି । ଧର୍ଯ୍ୟ ବଳରେ ହିଁ କଳିଙ୍ଗ ଆଶିଷ ସତପଥୀ ସଫଳତାର ଚରଣସୀମାରେ ପହଞ୍ଚି ପାରିଛନ୍ତି ବୋଲି ଶୁଭେଚ୍ଛୁ ମାନେ କହିଛନ୍ତି ।

The post କର୍କଟ ରୋଗୀ ମାଆର ଆଶା ପୂରଣ କଲା ପୁଅ, ପାଇଲା OPSCରେ ବଡ ସଫଳତା appeared first on KNews Odisha.