କେରଳରେ ପରିବାରର ୨ ସଦସ୍ୟଙ୍କ ସହ ଆତ୍ମହତ୍ୟା କଲେ ପ୍ରଥମ JPSC ଟପ୍ପର ତଥା ସିବିଆଇ ଅଭିଯୁକ୍ତ

କୋଚି,୨୨।୨: ଝାଡ଼ଖଣ୍ଡ ପବ୍ଲିକ ସର୍ଭିସ କମିଶନ (JPSC) ପରୀକ୍ଷାର ପୂର୍ବତନ ଟପ୍ପର ଶାଲିନୀ ବିଜୟ, ତାଙ୍କ ଭାଇ ମନୀଷ ବିଜୟ ଯେ କି ଜଣେ IRS ଅଧିକାରୀ ଏବଂ ମାଆ ଶକୁନ୍ତଳାଙ୍କ ସହ କେରଳରେ ମୃତ ଅବସ୍ଥାରେ ମିଳିଛନ୍ତି। ପ୍ରଥମ ଜେପିଏସସି ସିଭିଲ ସର୍ଭିସ ପରୀକ୍ଷା ଅନିୟମିତତା ସହିତ ଜଡିତ ସିବିଆଇ ଅଭିଯୋଗର ସମ୍ମୁଖୀନ ହେଉଥିବା ଶାଲିନୀଙ୍କୁ ଫେବୃଆରୀ ୧୫ ତାରିଖରେ କୋର୍ଟ ଶୁଣାଣି ପାଇଁ ରାଞ୍ଚିରେ ହାଜର ହେବାର ଥିଲା।
କୋଚିରେ କେନ୍ଦ୍ରୀୟ ଉତ୍ପାଦ ଏବଂ କଷ୍ଟମ୍ସର ଅତିରିକ୍ତ କମିଶନର ଶାଲିନୀ ଏବଂ ମନୀଷଙ୍କୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା। ଯେତେବେଳେ କି ତାଙ୍କ ମା’ଶକୁନ୍ତଳା ତାଙ୍କ ବିଛଣାରେ ମୃତ ଅବସ୍ଥାରେ ପଡିଥିଲେ। ପରିବାର କୋଚିର କକ୍କନାଡର ଇଚାମୁକ୍କରେ ସେଣ୍ଟ୍ରାଲ ଏକ୍ସାଇଜ ଏବଂ କଷ୍ଟମ୍ସ କ୍ୱାର୍ଟର୍ସରେ ରହୁଥିଲେ। ମା’ଙ୍କ ମୃତଦେହ ଧଳା କପଡାରେ ଘୋଡ଼ାଇ ହୋଇଥିଲା ଏବଂ ମୃତଦେହ ନିକଟରେ ଫୁଲ ଛିଞ୍ଚାଯାଇଥିବା ଦେଖିବାକୁ ମିଳିଥିଲା।
ମନିଷଙ୍କୁ ବାସଗୃହର ଛାତରେ ଏକ ହୁକ ରେ ଝୁଲୁଥିବା ଅବସ୍ଥାରେ ଦେଖିବାକୁ ମିଳିଥିଲା, ଯେତେବେଳେ ତାଙ୍କ ଭଉଣୀଙ୍କୁ ଘର ପଛ ପାର୍ଶ୍ୱରେ ଥିବା ଅନ୍ୟ ଏକ କୋଠରୀରେ ମୃତ ଅବସ୍ଥାରେ ମିଳିଥିଲେ। ପରେ ପୋଲିସ ଘର ଭିତରକୁ ପ୍ରବେଶ କରି ମାଆଙ୍କୁ ବିଛଣାରେ ମୃତ ଅବସ୍ଥାରେ ଦେଖିଥିଲା। ଗୁରୁବାର ଦିନ ମନୀଷ ଅଫିସରେ ଯୋଗଦେବାର ଥିଲା ଏବଂ କଷ୍ଟମ୍ସ ଅଧିକାରୀମାନେ ତାଙ୍କ ଘର ଯାଞ୍ଚ କରିବାକୁ ଆସିଥିଲେ ଯେତେବେଳେ ସେ ଆସି ନଥିଲେ।
କୋଚି ପୋଲିସ କହିଛି ଯେ ପ୍ରଥମ ଦୃଷ୍ଟି ବା ପ୍ରାଇମା ଫେସିରୁ ଭାଇ-ଭଉଣୀ ଦୁହେଁ ଫାଶୀ ଦେଇ ମୃତ୍ୟୁବରଣ କରିଛନ୍ତି। ତଥାପି, ମା’ଙ୍କ ମୃତ୍ୟୁର କାରଣ ଶବ ବ୍ୟବଚ୍ଛେଦ ପରେ ହିଁ ଜଣାପଡିବ। ଏହା ପ୍ରାକୃତିକ କିମ୍ବା ଅନ୍ୟ କାରଣ ହୋଇପାରେ। ଶବ ବ୍ୟବଚ୍ଛେଦ ପରେ ହିଁ ଆମେ ନିଶ୍ଚିତ ଭାବରେ ଜାଣିପାରିବୁ, ଆସିଷ୍ଟାଣ୍ଟ ପୋଲିସ କମିଶନର (ଥ୍ରିକ୍କାକାରା) ପି ଭି ବେବି ଏହା କହିଛନ୍ତି।

The post କେରଳରେ ପରିବାରର ୨ ସଦସ୍ୟଙ୍କ ସହ ଆତ୍ମହତ୍ୟା କଲେ ପ୍ରଥମ JPSC ଟପ୍ପର ତଥା ସିବିଆଇ ଅଭିଯୁକ୍ତ appeared first on Dharitri Odia News.