କୋହଲିଙ୍କ ନିକଟରେ ସୁବର୍ଣ୍ଣ ସୁଯୋଗ: ମାତ୍ର ୧୩୪ ରନ୍‌ କଲେ ଭାଙ୍ଗିବେ ମହାରେକର୍ଡ

ନୂଆଦିଲ୍ଲୀ,୨୩।୧୨: ବିରାଟ କୋହଲି ବର୍ତ୍ତମାନର ଅଷ୍ଟ୍ରେଲିଆ ଗସ୍ତ ଏକ ଶତକରୁ ଆରମ୍ଭ କରିଥିଲେ। କିନ୍ତୁ ପରବର୍ତ୍ତୀ ଦୁଇଟି ଟେଷ୍ଟ ମ୍ୟାଚରେ ତାଙ୍କ ବ୍ୟାଟ ଚୁପ ରହିଥିଲା। ପର୍ଥରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚରେ ବିରାଟ ଶତକ ହାସଲ କରିଥିଲେ କିନ୍ତୁ ଆଡିଲେଡରେ ଖେଳାଯାଇଥିବା ଡେ ନାଇଟ ଟେଷ୍ଟ ଏବଂ ଗାବାରେ ଡ୍ର ହୋଇଥିବା ଟେଷ୍ଟରେ ସେ କିଛି ବିଶେଷ କରିପାରି ନ ଥିଲେ। ଭାରତୀୟ ଦଳ ବର୍ତ୍ତମାନ ମେଲବର୍ନରେ ପହଞ୍ଚିଛି। ଏଠାରେ ଡିସେମ୍ବର ୨୬ରୁ ସିରିଜର ଚତୁର୍ଥ ଟେଷ୍ଟରେ ଉଭୟ ଦଳ ମୁହାଁମୁହିଁ ହେବେ। ବକ୍ସିଂ ଡେ’ଠାରୁ ଆରମ୍ଭ ହୋଇଥିବା ଏହି ଟେଷ୍ଟରେ ବିରାଟ କୋହଲି ତାଙ୍କ ନାମରେ ଏକ ବଡ଼ ରେକର୍ଡ କରିପାରିବେ। କ୍ରିକେଟ ଭଗବାନ ସଚିନ ତେନ୍ଦୁଲକରଙ୍କ ଏକ ମହାନ ରେକର୍ଡ ଭାଙ୍ଗିବାକୁ ବିରାଟଙ୍କର ଏକ ସୁବର୍ଣ୍ଣ ସୁଯୋଗ ରହିଛି। ସଚିନଙ୍କ ରେକର୍ଡ ଭାଙ୍ଗି ସେ ଏହି ସ୍ଥାନରେ ଟେଷ୍ଟରେ ସର୍ବାଧିକ ରନ ସ୍କୋରର ଭାରତୀୟ ହେବେ।

ବିରାଟ କୋହଲି ମେଲବର୍ଣ୍ଣ କ୍ରିକେଟ ଗ୍ରାଉଣ୍ଡରେ ଏପର୍ଯ୍ୟନ୍ତ ୩ଟି ଟେଷ୍ଟ ମ୍ୟାଚ ଖେଳିଛନ୍ତି। ଏଠାରେ ସେ ନିଜ ବ୍ୟାଟ ସହିତ ୩୧୬ ରନ ସଂଗ୍ରହ କରିଛନ୍ତି। ମେଲବର୍ଣ୍ଣରେ ସର୍ବାଧିକ ରନ ସଂଗ୍ରହ କରିଥିବା ଭାରତୀୟଙ୍କ ମଧ୍ୟରେ ସଚିନ ତେନ୍ଦୁଲକର ପ୍ରଥମ ସ୍ଥାନରେ ଅଛନ୍ତି। ସଚିନ ୫ଟି ଟେଷ୍ଟ ମ୍ୟାଚରେ ୪୪୯ ରନ ସଂଗ୍ରହ କରିଥିବାବେଳେ ଅଜିଙ୍କ୍ୟେ ରାହାନେ ୩୬୯ ରନ ସହ ଏହି ତାଲିକାରେ ଦ୍ୱିତୀୟ ସ୍ଥାନରେ ରହିଛନ୍ତି। ବିରାଟ ମେଲବର୍ଣ୍ଣରେ ୧୩୪ ରନ ସ୍କୋର କରି ସଚିନଙ୍କୁ ପଛରେ ପକାଇଥିବାବେଳେ ସେ ୫୪ ରନ ସ୍କୋର କରି ରାହାଣେଙ୍କୁ ପଛରେ ପକାଇଦେବେ।
କୋହଲି ଏପର୍ଯ୍ୟନ୍ତ ଅଷ୍ଟ୍ରେଲିଆ ବିପକ୍ଷରେ ୨୮ଟି ଟେଷ୍ଟ ମ୍ୟାଚ ଖେଳିଛନ୍ତି। ଏହି ଅବଧିରେ ସେ ନିଜ ବ୍ୟାଟ ସହ ୯ ଶତକ ହାସଲ କରିଛନ୍ତି। କୋହଲି ଅଷ୍ଟ୍ରେଲିଆ ବିପକ୍ଷରେ ୨୧୬୮ ଟେଷ୍ଟ ରନ ସଂଗ୍ରହ କରିଛନ୍ତି। ସେ ଅଷ୍ଟ୍ରେଲିଆ ବିପକ୍ଷରେ ରନ ସ୍କୋର କରିବାକୁ ଉପଭୋଗ କରନ୍ତି।

The post କୋହଲିଙ୍କ ନିକଟରେ ସୁବର୍ଣ୍ଣ ସୁଯୋଗ: ମାତ୍ର ୧୩୪ ରନ୍‌ କଲେ ଭାଙ୍ଗିବେ ମହାରେକର୍ଡ appeared first on Dharitri Odia News.