ଗଙ୍ଗା ନଦୀରେ ମିଳିଲା ଚାରି ଆଖିଆ ମାଛ, ବିଶେଷଜ୍ଞ କହିଲେ- ଜଳଜୀବ ପାଇଁ ବିପଦପୂର୍ଣ୍ଣ

ନୂଆଦିଲ୍ଲୀ: କେବେ ଚାରି ଆଖିଆ ମାଛ ଦେଖିଛନ୍ତି କି? ବୋଧହୁଏ ଦେଖିନଥିବେ। ଗଙ୍ଗା ନଦୀରେ ଜଣେ ମତ୍ସ୍ୟଜୀବୀଙ୍କ ଜାଲରେ ମାଛ ପଡିଛି ଚାରି ଆଖିଆ ମାଛ। ଉତ୍ତର ପ୍ରଦେଶର ଭଦୋହିରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଧନ ତୁଳସୀକଳା ଗାଁ ନିକଟରେ ଥିବା ଗଙ୍ଗା ନଦୀରେ ଏପରି ବିରଳ ପ୍ରଜାତି ମାଛ ଦେଖିବାକୁ ମିଳିଛି। ଶରୀର ସାରା କଣ୍ଟା । ଚାରୋଟି ଆଖି । ସବୁଠୁ ବଡ଼ କଥା ହେଲା ଏହାକୁ ନେଇ ଚେତାବନୀ ଦେଇଛନ୍ତି ସାମୁଦ୍ରିକ ବିଜ୍ଞାନୀ। କହିଛନ୍ତି- ସମୁଦ୍ରରେ ବିଦେଶୀ ପ୍ରଜାତିଙ୍କ ଆଗମନ ଜଳଜୀବ ପାଇଁ ସୃଷ୍ଟି କରିବ ବିପଦ।

ବିଶେଷଜ୍ଞଙ୍କ ମତରେ ଏହି ମାଛ ଦକ୍ଷିଣ ଆମେରିକାର 'ସକରମାଉଥ୍ କ୍ୟାଟଫିସ୍' ପ୍ରଜାତିର। ଯାହା ମୁଖ୍ୟତଃ ଆମାଜନ ନଦୀରେ ଦେଖାଯାଏ। ଭାରତରେ ଏହି ପ୍ରଜାତି ମିଳିବା ବହୁତ ବିରଳ। ବିଶେଷଜ୍ଞମାନେ କୁହନ୍ତି ଯେ ଏହି ମାଛ ପ୍ରାକୃତିକ ଭାବରେ ଭାରତୀୟ ନଦୀଗୁଡ଼ିକରେ ମିଳେ ନାହିଁ। ଗଙ୍ଗା ନଦୀ ସହିତ ଏହାର ମିଳନ ଅନେକ ପ୍ରଶ୍ନ ଉଠାଇଛି। ଏହା ଏକ ମାଂସାହାରୀ ମାଛ ଏବଂ ଏହାର ଖାଇବା ଅଭ୍ୟାସ ମଧ୍ୟ ଅନ୍ୟ ମାଛଠାରୁ ଭିନ୍ନ। ଏହା ସ୍ଥାନୀୟ ଜଳଚର ପରିବେଶ ଉପରେ ମଧ୍ୟ ପ୍ରଭାବ ପକାଇପାରେ।

ଏହି ଚାରି ଆଖି ବିଶିଷ୍ଟ କ୍ୟାଟଫିସର ଆଉ ଏକ ବିଶେଷତ୍ୱ ହେଉଛି ଏହା ପାଣି ବାହାରେ ବହୁତ ଦିନ ପର୍ଯ୍ୟନ୍ତ ବଞ୍ଚି ରହିପାରେ। ସ୍ଥାନୀୟ ଲୋକମାନେ କହିଥିଲେ ଯେ ଏହି ମାଛଟି ମଧ୍ୟ ବେଙ୍ଗ ପରି ଡେଉଁଛି। ସେମାନେ ତାଙ୍କ ଜୀବନରେ ଏପରି ମାଛ କେବେ ଦେଖି ନାହାଁନ୍ତି। 

ମାଛ ମିଳିଥିବା ସ୍ଥାନ ହେଉଛି କୋନ୍ୟା ନିକଟସ୍ଥ କଇଁଛ ଅଭୟାରଣ୍ୟ ଅଞ୍ଚଳ, ଯାହା ଏହାର ଜୈବ ବିବିଧତା ପାଇଁ ପରିଚିତ। ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ସ୍ଥାନୀୟ ଜଳ ଉତ୍ସଗୁଡ଼ିକରେ ବିଦେଶୀ ପ୍ରଜାତିଙ୍କ ଆଗମନ ଜଳଜୀବ ପାଇଁ ବିପଦ ସୃଷ୍ଟି କରିପାରେ। ମତ୍ସ୍ୟ ବିଭାଗ ଏବଂ ବନ୍ୟପ୍ରାଣୀ ସଂରକ୍ଷଣର ଅଧିକାରୀମାନେ ମାଛର ତଦନ୍ତ ଏବଂ ଅଧ୍ୟୟନ ପାଇଁ ଆହ୍ୱାନ ଦେଇଛନ୍ତି। ସ୍ଥାନୀୟ ପ୍ରଶାସନ ମଧ୍ୟ ଏହି ଘଟଣାକୁ ଗମ୍ଭୀରତାର ସହ ନେଇ ଆବଶ୍ୟକ ପଦକ୍ଷେପ ନେବାକୁ ପ୍ରତିଶ୍ରୁତି ଦେଇଛି।