ଗାଁ ଦାଣ୍ଡରେ କଙ୍ଗାରୁ କୋର୍ଟ, ଅଧା ନଣ୍ଡା କରି ଆଣ୍ଠେଇବା ସହ ମାଡ ମାରି ନର୍ଦ୍ଦମା ପାଣି ପିଆଇଲେ

ଅନୁଗୁଳ: ଅମଣିଷ ପାଲଟିଗଲା ମଣିଷ । ନିର୍ଯାତନାର ଚରମ ସୀମା ପାର ହେଲା । ସତ ନ ପରଖି ଗାଁ ଦାଣ୍ଡରେ କଲେ କଙ୍ଗାରୁ କୋର୍ଟ l ଦୁଇ ଜଣ ଦଳିତ ଲୋକଙ୍କୁ ଅଧା ଲଣ୍ଡା କରି ଗାଁ ଦାଣ୍ଡରେ ଆଣ୍ଠେଇଲେ। ପରେ ଆଣ୍ଠେଇ କରି ଦୁଇ କିଲୋ ମିଟର ଚଲେଇବା ସହ ନର୍ଦ୍ଦମା ପାଣି ପିଆଇଲେ l ଏଭଳି ମାନବିକତା ଶୂନ୍ୟ କାଣ୍ଡ ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଧରାକୋଟ ଖାରିଗୁମ୍ମା ଗାଁରେ l

ଖାରିଗୁମ୍ମା ଗାଁର ଦୁଇ ଜଣ ଦଳିତ ବ୍ୟକ୍ତି ଝିଅକୁ ଯୌତୁକ ଦେବା ପାଇଁ ହରିପୁରରୁ ତିନିଟି ଗାଈ ଧରି ସିଙ୍ଗିପୁର ଯାଉଥିଲେ । ଏତିକି ବେଳେ ଖାରିଗୁମ୍ମାଠାରେ ତାଙ୍କୁ କିଛି ଲୋକ ଅଟକାଇବା ସହ ଗୋ ଚାଲାଣ କରୁଥିବା କହି ପଇସା ମାଗିଥିଲେ l ପଇସା ନଦେବାରୁ ଦୁଇ ନିରୀହ ଲୋକକୁ ମାଡ଼ ମାରିବା ସହ ସେଲୁନରେ ଅଧା ଲଣ୍ଡା କରି ଦେଇଥିଲେ l ଏଭଳି ନିର୍ଯାତନା ଆଖିରେ ଦେଖି ହେବନାହିଁ । ସେମାନଙ୍କୁ ଅଧା ଲଣ୍ଡା କରି ଦୁଇ ବ୍ୟକ୍ତିଙ୍କୁ ଖାରିଗୁମ୍ମାରୁ ଜହାଡା ଯାଏଁ ପାଖାପାଖି ଦୁଇ କିଲୋମିଟର ଗାଁ ଦାଣ୍ଡରେ ଆଣ୍ଠେଇ ଆଣ୍ଠେଇ ଚଲାଇ ଥିଲେ l ଦୁଇ ଦଳିତକୁ ଘାସ ଖାଇବାକୁ ଦେବା ସହ ନର୍ଦ୍ଦମାର ମଇଳା ପାଣି ପିଇବାକୁ ବାଧ୍ୟ କରିଥିବା ଅଭିଯୋଗ ହୋଇଛି l

ତେବେ ସୁଯୋଗ ପାଇ ଦୁଇ ଜଣ ବ୍ୟକ୍ତି ସେଠାରୁ ଖସି ପଳାଇ ଆସିଥିଲେ । ଘଟଣାକୁ ନେଇ ଧରାକୋଟ ଥାନାରେ ସେମାନେ ଲିଖିତ ଅଭିଯୋଗ କରିଛନ୍ତି l ଅଭିଯୁକ୍ତଙ୍କ ମୁଣ୍ଡ ଆଉ ପିଠିରେ ଗଭୀର ଆଘାତ ଲାଗିଛି । ଧରାକୋଟ ପୋଲିସ ଦୁହିଁଙ୍କୁ ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରିବା ସହ ଏହି ଘଟଣାରେ ଅଧିକ ତଦନ୍ତ ଚଳାଇଛି l… ସେପଟେ ନିର୍ଯାତନା ପୂର୍ବରୁ ଏମାନଙ୍କୁ ଟଙ୍କା ମାଗିବା ଖବର ପାଇ ଦୁଇ ପୀଡ଼ିତଙ୍କର ଜଣେ ପଡ଼ୋଶୀ ଅଭିଯୁକ୍ତମାନଙ୍କୁ ଫୋନ୍ କରିଥିଲେ । ସେମାନଙ୍କୁ ଛାଡ଼ି ଦେବା ସହ ଗାଈକୁ ଫେରାଇବା ପାଇଁ କହିଥିଲେ । କିନ୍ତୁ ଅଭିଯୁକ୍ତମାନେ ୩୦ ହଜାର ଟଙ୍କା ନଦେଲେ ଛାଡ଼ିବେ ନାହିଁ ବୋଲି କହିଥିଲେ । ଏତେ ଗୁଡାଏ ଟଙ୍କା ଦେଇ ପାରିବେ ନାହିଁ ବୋଲି ପୀଡ଼ିତ ଦୁଇ ଜଣ କହିବା ପରେ ଭୟଙ୍କର ନିର୍ଯାତନା ଆରମ୍ଭ ହୋଇ ଯାଇଥିଲା ବୋଲି କହିଛନ୍ତି ସ୍ଥାନୀୟ ବାସିନ୍ଦା ।

also read:ଛାତ ଉପରୁ ନଜର ରଖିବେ NSG ସ୍ନାଇପର, ଆଉ ମାତ୍ର ୪ ଦିନ ପରେ ବିଶ୍ବପ୍ରସିଦ୍ଧ ରଥଯାତ୍ରା

The post ଗାଁ ଦାଣ୍ଡରେ କଙ୍ଗାରୁ କୋର୍ଟ, ଅଧା ନଣ୍ଡା କରି ଆଣ୍ଠେଇବା ସହ ମାଡ ମାରି ନର୍ଦ୍ଦମା ପାଣି ପିଆଇଲେ appeared first on KNews Odisha.