ଗୋଟିଏ ଇଆଡ଼େ, ଆଉ ଗୋଟେ ସିଆଡ଼େ

ସମ୍ବଲପୁର/ରେଙ୍ଗାଲିରୁ,୨୧ା୫ (ଅନିଲ ଦାସ):ରାଜ୍ୟରେ ଆସନ୍ତା ୨୫ ତାରିଖରେ ତୃତୀୟ ପର୍ଯ୍ୟାୟ ନିର୍ବାଚନ ଅନୁଷ୍ଠିତ ହେବ। ଏନେଇ ସମ୍ବଲପୁର ସମେତ ୫ ଲୋକ ସଭା ନିର୍ବାଚନମଣ୍ଡଳୀରେ ପ୍ରାର୍ଥୀମାନେ ପ୍ରଚାର କାର୍ଯ୍ୟ ଜୋରଦାର ଚଳାଇଛନ୍ତି। ସମ୍ବଲପୁର ଲୋକ ସଭା ନିର୍ବାଚନମଣ୍ଡଳୀରେ ବିଜେଡି ପ୍ରାର୍ଥୀ ପ୍ରଣବ ପ୍ରକାଶ ଦାସ, ଭାଜପା ପ୍ରାର୍ଥୀ ଧର୍ମେନ୍ଦ୍ର ପ୍ରଧାନ ଏବଂ କଂଗ୍ରେସ ପ୍ରାର୍ଥୀ ନଗେନ୍ଦ୍ର ପ୍ରଧାନଙ୍କ ମଧ୍ୟରେ କଡ଼ା ପ୍ରତିଦ୍ୱନ୍ଦ୍ୱିତା ହେଉଛି। ପ୍ରାର୍ଥୀମାନେ ଗଁା ଗଁା, ଘର ଘର ବୁଲି ରାଲି, ଶୋଭାଯାତ୍ରା ଓ ସଭାସମିତି ଜରିଆରେ ଭୋଟ ଭିକ୍ଷା କରୁଛନ୍ତି। ଭୋଟରଙ୍କୁ ନିଜ ସପକ୍ଷରେ ଆଣିବା ପାଇଁ ଦିନରାତି ଉଦ୍ୟମ ଚଳାଇଛନ୍ତି। ସମ୍ବଲପୁର ଲୋକ ସଭା ନିର୍ବାଚନମଣ୍ଡଳୀରେ ମୁଖ୍ୟତଃ ବିଜେଡି ଓ ଭାଜପା ମଧ୍ୟରେ କଡ଼ା ଟକ୍କର ହେଉଛି। ଭୋଟରମାନେ ପ୍ରାର୍ଥୀଙ୍କ ସମ୍ମୁଖରେ ବିସ୍ଥାପିତ ସମସ୍ୟାଠାରୁ ଆରମ୍ଭ କରି ବେକାରି, ସ୍ବାସ୍ଥ୍ୟ ଓ ଶିକ୍ଷା ଭଳି ବିଭିନ୍ନ ସମସ୍ୟା ରଖୁଛନ୍ତି।
ନିର୍ବାଚନ ହେଲେ ପ୍ରାର୍ଥୀମାନେ ଗଁାକୁ ଆସି ଭୋଟଭିକ୍ଷା କରୁଛନ୍ତି। ଗରିବ ଲୋକଙ୍କ ସମସ୍ୟା ଯେମିତିକୁ ସେମିତି ଅଛି। ଏବେ ଭୋଟ ଦେବାକୁ ପଡ଼ିବ। ଯେଉଁ ପ୍ରାର୍ଥୀ ଆମକୁ ଭଲ ଲାଗିବେ ଆମେ ତାଙ୍କୁ ଭୋଟ ଦେବୁ। ସମ୍ବଲପୁର ଲୋକ ସଭା କ୍ଷେତ୍ର ଅଧୀନ ରେଙ୍ଗାଲି ବିଧାନସଭା କ୍ଷେତ୍ର ଗୋଶାଲାର ଭୋଟର ରାଜେଶ୍ୱରୀ ନାୟକ କହିଛନ୍ତି, କିଏ ପ୍ରାର୍ଥୀ ଆମେ ଜାଣିନୁ। ୨ଟା ଚିହ୍ନ ରହିଛି। ସେଥିରୁ ଦେଖି ଗୋଟିଏ ଇଆଡ଼େ ଆଉ ଗୋଟିଏ ସିଆଡ଼େ ଦେବୁ।
ସେହିପରି ପ୍ରଫୁଲ୍ଲ ଭୋଇ କହିଛନ୍ତି, ଆମେ ଗରିବ ଲୋକ, ଖଟିଲେ ଚଳିବୁ। ରାଜନୀତି କ’ଣ ଆମେ ଜାଣିନୁ। ଭୋଟ ଦେବାକୁ କହୁଛନ୍ତି, ଯାହାକୁ ଗୋଟେ ଦେଇଦେବୁ। ଭୋଟରଙ୍କଠାରୁ ଏଭଳି ମତାମତ ଶୁଣିବା ପରେ ସମ୍ବଲପୁର ଲୋକ ସଭା କ୍ଷେତ୍ର ଅଧୀନ ବିଭିନ୍ନ ବିଧାନସଭା ଆସନରେ ଭାଜପା ଓ ବିଜେଡି ପ୍ରାର୍ଥୀଙ୍କ ମଧ୍ୟରେ ଜୋର୍‌ଦାର ମୁକାବିଲା ହେଉଥିବା ସ୍ପଷ୍ଟ ହେଉଛି।
ରେଙ୍ଗାଲି ନିର୍ବାଚନମଣ୍ଡଳୀ ଅଧୀନ ଗୋଶାଲାଠାରେ ଧର୍ମେନ୍ଦ୍ର ଓ ସ୍ଥାନୀୟ ବିଧାୟକ ପ୍ରାର୍ଥୀ ନାଉରି ନାୟକ ଏକ ଜନ ସଭା କରିବା ସହ ବିରାଟ ରାଲିରେ ନିର୍ବାଚନମଣ୍ଡଳୀ ବୁଲୁଥିବା ଦେଖିବାକୁ ମିଳିଛି। ନିର୍ବାଚନୀ ସଭାରେ ଧର୍ମେନ୍ଦ୍ର ଭୋଟରଙ୍କୁ ନିବେଦନ କରିଛନ୍ତି, ଆସନ୍ତା ୨୫ ତାରିଖ ନିର୍ବାଚନରେ ନରେନ୍ଦ୍ର ମୋଦିଙ୍କୁ ପୁଣି ଥରେ ପ୍ରଧାନମନ୍ତ୍ରୀ କରିବା ପାଇଁ ଓ ରେଙ୍ଗାଲିରେ ଭାଜପା ପ୍ରାର୍ଥୀଙ୍କୁ ଜିତାଇବା ଲାଗି ପଦ୍ମଫୁଲରେ ୨ଥର ଭୋଟ ଦେବାକୁ ସେ କହିଛନ୍ତି।
ସେହିପରି ସ୍ଥାନୀୟ ବିଧାୟକ ପ୍ରାର୍ଥୀ ନାଉରି କହିଛନ୍ତି, ଏଠାରେ ବିରୋଧୀ ଦଳ ବିଧାୟକ ହୋଇଥିବାରୁ ରାଜ୍ୟ ସରକାର ଆମକୁ ସାବତ ପୁଅ ଭଳି ଦେଖୁଛନ୍ତି। ଆବଶ୍ୟକ ପାଣ୍ଠି ଯୋଗାଇ ଦେବାରେ ପାତରଅନ୍ତର କରାଯାଉଛି। ୫ ବର୍ଷରେ କେନ୍ଦ୍ର ସରକାରଙ୍କ ସହଯୋଗରେ ନିର୍ବାଚନମଣ୍ଡଳୀର ଅନେକ ବିକାଶ ହୋଇଛି। ବିଜେଡି ୨୫ ବର୍ଷ ଧରି ଲୋକଙ୍କୁ ଭୁଅଁାବୁଲାଉଛି। ଏଠାରେ ଅମଲାତନ୍ତ୍ରୀମାନେ ଶାସନ ଗାଦିକୁ ମାଡ଼ି ବସିଛନ୍ତି। ଲୋକେ ବୁଝିଗଲେଣି, ଏଥର ଡବଲ ଇଞ୍ଜିନ ସରକାର ଗଠନ ହେବ। ମୋଦିଙ୍କ ନେତୃତ୍ୱରେ ରାଜ୍ୟର ବିକାଶ ଦ୍ରୁତଗତିରେ ଆଗକୁ ବଢ଼ିବ ବୋଲି ସେ କହିଛନ୍ତି।

The post ଗୋଟିଏ ଇଆଡ଼େ, ଆଉ ଗୋଟେ ସିଆଡ଼େ appeared first on Dharitri Odia News.