ଜେଲରୁ ସରକାର ଚଲାଇ ପାରିବେନି କେଜ୍ରିୱାଲ, ସ୍ପଷ୍ଟ ଶବ୍ଦରେ ମନା କଲେ ଏଲଜି

ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଜେଲରୁ ସରକାର ଚଲାଇ ପାରିବେ ନାହିଁ । ଦିଲ୍ଲୀ ଉପରାଜ୍ୟପାଳ ଭିକେ ସକ୍ସେନା ସ୍ପଷ୍ଟ ଶବ୍ଦରେ ଏହା କହିଛନ୍ତି । ଦିଲ୍ଲୀର କଥିତ ମଦ ଦୁର୍ନୀତି ମମଲାରେ ଗିରଫ ଅରବିନ୍ଦ କେଜ୍ରିୱାଲ ଇସ୍ତଫା ଦେବାକୁ ମନା କରି ଜେଲରୁ ହିଁ ସରକାର ଚଲାଇବେ ବୋଲି କହିଥିଲେ । ଏହାରି ଭିତରେ ଦିଲ୍ଲୀ ସରକାର ଏବଂ ରାଜଭବନ ମୁହାଁମୁହିଁ ହୋଇଛନ୍ତି । 

ଟାଇମ୍ସ ନାଓ ସମିଟରେ ଏଲଜି ଭିକେ ସକ୍ସେନା କହିଛନ୍ତି, ମୁଁ ଦିଲ୍ଲୀର ଲୋକଙ୍କୁ ଭରଷା ଦେଉଛି ଯେ ସରକାର ଜେଲରୁ ଚାଲିବ ନାହିଁ । କାର୍ଯ୍ୟକ୍ରମରେ ଉପରାଜ୍ୟପାଳଙ୍କୁ ପ୍ରଶ୍ନ କରାଯାଇଥିଲା ଯେ କଣ ଦିଲ୍ଲୀରେ ସରକାର ଜେଲରୁ ଚାଲିବ ? ସକ୍ସେନା ଏହା ଉପରେ ସ୍ପଷ୍ଟ ଶବ୍ଦରେ ଜବାବ ଦେଇଥିଲେ । ଏଲଜି ବୟାନ ପରେ ଦିଲ୍ଲୀ ସରକାର ଏବଂ ରାଜଭବନ ପୁଣି ଥରେ ମୁହାଁମୁହିଁ ହୋଇପାରନ୍ତି । ଆମ୍ ଆଦାମୀ ପାର୍ଟି କହିସାରିଛି ଯେ ଜେଲରୁ ସରକାର ଚଳାଇବା ପାଇଁ ଆବଶ୍ୟକ ପଡ଼ିଲେ କୋର୍ଟଙ୍କ ସହଯୋଗ ନିଆଯିବ ।

ମାର୍ଚ୍ଚ ୨୧ରେ ଗିରଫଦାରୀ ପରେ ଅରବିନ୍ଦ କେଜ୍ରିୱାଲ କହିଥିଲେ ଯେ ସେ ଇସ୍ତଫା ଦେବେ ନାହିଁ ଏବଂ ଜେଲରୁ ହିଁ ସରକାର ଚଲାଇବେ । ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ମାର୍ଚ୍ଚ ୨୮ ଯାଏ ଇଡି ହେପାଜତକୁ ପଠାଯାଇଛି । ତେବେ ଏହାରି ଭିତରେ ଇଡି ହେପାଜତରେ ରହି ଦିଲ୍ଲୀର ଜଳ ଏବଂ ସ୍ୱାସ୍ଥ୍ୟ ବିଭାଗ ପାଇଁ ଦୁଇଟି ନିର୍ଦ୍ଦେଶ ମଧ୍ୟ ଜାରି କରିଥିଲେ । ତେବେ ବିଜେପି ଏହାକୁ ନେଇ ଏଲଜିଙ୍କ ନିକଟରେ ଅଭିଯୋଗ କରିଛି ଏବଂ ନିର୍ଦ୍ଦେଶକୁ ଫେକ୍ କହିଛି । ଇଡି ସୂତ୍ରରୁ ବି କହିଥିଲା ଯେ କେଜ୍ରିୱାଲଙ୍କୁ କଷ୍ଟେଡିରୁ କୌଣସି ପ୍ରକାର ଫାଇଲ୍ ଉପରେ ହସ୍ତାକ୍ଷର ପାଇଁ ଅନୁମତି ଦିଆଯାଇ ନାହିଁ ।