ଟ୍ରେନି ମହିଳା ଡାକ୍ତର ହତ୍ୟା ଘଟଣା: ମାତାପିତା କଲେ ଚାଞ୍ଚଲ୍ୟକର ଖୁଲାସା

କୋଲକାତା.୧୭।୮: କୋଲକାତାର ମହିଳା ଡାକ୍ତରଙ୍କୁ ବଳାତ୍କାର ପରେ ହତ୍ୟା ଘଟଣା ଦେଶରେ ଚହଳ ପକାଇଛି। ମହିଳା ଡାକ୍ତରଙ୍କ ମାତାପିତା ସେମାନଙ୍କ ଝିଅ ସହିତ ଘଟିଥିବା ଘଟଣାରେ ଡାକ୍ତର ଏବଂ ସେମାନଙ୍କ ସହ କାର୍ଯ୍ୟ କରୁଥିବା ନର୍ସଙ୍କ ସମ୍ପୃକ୍ତି ନେଇ ସନ୍ଦେହ ପ୍ରକଟ କରିଛନ୍ତି। ଏନେଇ ସେମାନେ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ)କୁ ସୂଚନା ଦେଇଛନ୍ତି। ସେହି ଅପରାଧରେ ସମ୍ପୃକ୍ତ ଥିବା ଲୋକଙ୍କ ନାମ ମଧ୍ୟ ଦିଆଯାଇଛି।
ସିବିଆଇ ଅଧିକାରୀ କହିଛନ୍ତି, ବର୍ତ୍ତମାନ ପର୍ଯ୍ୟନ୍ତ ଆମେ ଏହି ମାମଲାରେ ପ୍ରାୟ ୩୦ଜଣ ସନ୍ଦିଗ୍ଧଙ୍କୁ ଚିହ୍ନଟ କରିଛୁ ଏବଂ ସେମାନଙ୍କୁ ପଚରାଉଚରା ଆରମ୍ଭ କରିଛୁ। ଏହା ବ୍ୟତୀତ ପ୍ରଥମେ ଏହି ଘଟଣାର ତଦନ୍ତ କରୁଥିବା କୋଲକାତା ପୋଲିସ ଅଧିକାରୀଙ୍କୁ ମଧ୍ୟ ପଚରାଉଚରା କରାଯାଉଛି। ସିବିଆଇ ଦୁଇଜଣ ପ୍ରଶିକ୍ଷକ ଡାକ୍ତର ଏବଂ ସେହି ରାତିରେ ମହିଳା ଡାକ୍ତରଙ୍କ ସହ ଡ୍ୟୁଟିରେ ଥିବା ଗୃହ କର୍ମଚାରୀଙ୍କୁ ଡକାଇଥିଲା।
ମହିଳା ଡାକ୍ତରଙ୍କୁ ବଳାତ୍କାର ଓ ହତ୍ୟା ମାମଲାରେ ସିବିଆଇ ଶୁକ୍ରବାର ଆର୍‌ଜି କର ମେଡିକାଲ କଲେଜ ହସ୍ପିଟାଲର ପୂର୍ବତନ ପ୍ରିନ୍ସିପାଲ ଡ. ସନ୍ଦିପ୍‌ ଘୋଷଙ୍କୁ ଜେରା କରିଛି। ସକାଳ ୮ଟା ୩୦ରେ ସିବିଆଇ ଟିମ୍‌ ଘୋଷଙ୍କୁ ସଲ୍ଟ ଲେକ୍‌ସ୍ଥିତ ସିଜିଓ କମ୍ପ୍ଲେକ୍ସକୁ ନେଇ ଜେରା କରିଥିଲା। ହସ୍ପିଟାଲର ପୂର୍ବତନ ସୁପରିଣ୍ଟେଣ୍ଡେଣ୍ଟ ସଞ୍ଜୀବ ବଶିଷ୍ଠ ଏବଂ ହୃଦ୍‌ରୋଗ ବିଭାଗ ମୁଖ୍ୟ ଅରୁଣଭା ଦତ୍ତ ଚୌଧୁରୀଙ୍କୁ ମଧ୍ୟ ଜେରା ପାଇଁ ସମନ କରାଯାଇଛି।

The post ଟ୍ରେନି ମହିଳା ଡାକ୍ତର ହତ୍ୟା ଘଟଣା: ମାତାପିତା କଲେ ଚାଞ୍ଚଲ୍ୟକର ଖୁଲାସା appeared first on Dharitri Odia News.