ଡଲାରକୁ ଦୁର୍ବଳ କରିବାର କୌଣସି ଇଚ୍ଛା ନାହିଁ, ଟ୍ରମ୍ପଙ୍କ ଟାରିଫ୍ ବୃଦ୍ଧି ଧମକ ଉପରେ ଜୟଶଙ୍କରଙ୍କ ଜବାବ

ନୂଆଦିଲ୍ଲୀ: ଭାରତର ବୈଦେଶିକ ବ୍ୟାପାର ମନ୍ତ୍ରୀ ଶନିବାର ଡୋନାଲ୍ଡ ଟ୍ରମ୍ପଙ୍କ ୧୦୦ ପ୍ରତିଶତ ଟାରିଫ୍ ବୃଦ୍ଧି ଧମକ ଉପରେ ଜବାବ ଦେଇଛନ୍ତି । ସେ କହିଛନ୍ତି ଯେ ଆମେରିକା ଆମର ସବୁଠୁ ବଡ଼ ବ୍ୟବସାୟିକ ସହଯୋଗୀ । ଆମେରିକୀୟ ଡଲାରକୁ ଦୁର୍ବଳ କରିବା ନେଇ ଆମର କୌଣସି ଉଦ୍ଦେଶ୍ୟ ନାହିଁ । ଆମେ ପୂର୍ବରୁ ସ୍ପଷ୍ଟ କରିସାରିଛୁ ଯେ ଭାରତ ଡି-ଡଲାରୀକରଣ ପକ୍ଷରେ ନାହିଁ । ଏହା ବ୍ୟତୀତ ଡୋନାଲ୍ଡ ଟମ୍ପଙ୍କ ବିଜୟ କ୍ୱାଡ୍ ପାଇଁ ସକାରାତ୍ମକ କହିବା ସହ ତାଙ୍କ କାର୍ଯ୍ୟକାଳରେ ଆଗାମୀ ଦିନରେ କ୍ୱାଡ୍ ସଂଗଠନ ଅଧିକ ମଜଭୁତ ହେବ ଏବଂ କ୍ଷେତ୍ରୀୟ ସହଯୋଗକୁ ମଜଭୁତ କରିବାରେ ସହଯୋଗ କରିବ ।

ଦୋହା ଫୋରମରେ ଆମେରିକା ଉପରେ ନିଜ କଥା ରଖି ବିଦେଶ ମନ୍ତ୍ରୀ କହିଛନ୍ତି ଯେ ଟ୍ରମ୍ପ ପ୍ରଶାସନ ସମୟରେ ଭାରତ ଏବଂ ଆମେରିକା ସମ୍ପର୍କ ଭଲ ହୋଇଥିଲା । କ୍ୱାଡକୁ ବଢାଇବା ପାଇଁ ସେ ଅଧିକ ସହଯୋଗ ମଧ୍ୟ ଦେଇଥିଲେ । ତେବେ ଏପରି କିଛି ପ୍ରସଙ୍ଗ ଥିଲା, ଯେଉଁଥି ଅସହମତି ହୋଇଥିଲା । ଏଥିରୁ ଅଧିକାଂଶ ବ୍ୟବସାୟ ସହ ଜଡ଼ିତ । କିନ୍ତୁ ଅନେକ ପ୍ରସଙ୍ଗ ଥିଲା, ଯେଉଁଥିରେ ରାଷ୍ଟ୍ରପତି ଟ୍ରମ୍ପ ଭାରତକୁ ସହଯୋଗ କରିଛନ୍ତି ।

ପିଏମ୍ ମୋଦୀ ଏବଂ ରାଷ୍ଟ୍ରପତି ଟ୍ରମ୍ପଙ୍କ ବ୍ୟକ୍ତିଗତ ସମ୍ପର୍କ ଉପରେ ଜୟଶଙ୍କର କହିଛନ୍ତି, ଦୁଇ ନେତାଙ୍କ ମଧ୍ୟରେ କେମେଷ୍ଟ୍ରି ଦୁଇ ଦେଶର ସମ୍ପର୍କକୁ ଅଧିକ ମଜଭୁତ କରିବାରେ ସହାୟକ ହୋଇଛି । ଯଦି ଆଜି ହିନ୍ଦ-ପ୍ରଶାନ୍ତ ମହାସାଗର କ୍ଷେତ୍ରକୁ ଦେଖିବା, ତେବେ ଆମେରିକା ଏବଂ ଭାରତ ମଧ୍ୟରେ ସହଯୋଗ ବଢିଛି । ଭାରତ ଏବଂ ଆମେରିକା ଆଜି ଯେଉଁ ସ୍ଥିତିରେ ଅଛନ୍ତି, ସେଠାରେ ପରସ୍ପର ମଧ୍ୟରେ ସହଯୋଗ ଉପରେ ଅଧିକ ମୁଦ୍ଦା ରହିଛି । ଏପରି କୌଣସି ମୁଦ୍ଦା ନାହିଁ, ଯାହା ବିଭାଜନକାରୀ ହୋଇଥିବା କିମ୍ୱା ଦୁଇ ଦେଶ ମଧ୍ୟରେ ବିବାଦ ସୃଷ୍ଟି କରିବ ।