ଢେଙ୍କାନାଳରେ ଅଭାବନୀୟ, ପୋଖରୀରେ ବୁଡ଼ି ମହିଳା ଏବଂ ନାବାଳିକାର ମୃତ୍ୟୁ

ଢେଙ୍କାନାଳ: ପୋଖରୀରେ ବୁଡ଼ି ମହିଳା ଏବଂ ନାବାଳିକାର ମୃତ୍ୟୁ। ଏଭଳି ଏକ ଦୁଃଖଦ ଘଟଣା ଦେଖିବାକୁ ମିଳିଛି ରାସୋଳ ଥାନା ଅନ୍ତର୍ଗତ ଖରଡାଳୀ ଗ୍ରାମରେ ଘଟିଛି । ଗ୍ରାମର ୧୦ ବର୍ଷର ଦୁଇ ନାବାଳିକା ଗାଁ ପୋଖରୀକୁ ଗାଧୋଇବାକୁ ଯାଇଥିବାବେଳେ ବୁଡ଼ି ଯାଇଥିଲେ।  ତେବେ ସେମାନଙ୍କୁ ବୁଡ଼ିଯାଉଥିବାରୁ ଦେଖି ଉଦ୍ଧାର କରିବାକୁ ଯାଇ ଜଣେ ମହିଳା ପୋଖରୀରେ ମଧ୍ୟ ବୁଡି ଯାଇଥିଲେ ।

ଖବର ପାଇ ହିନ୍ଦୋଳ ରୋଡ ଦମକଳ ବାହିନୀ ପହଞ୍ଚି ପୋଖରୀରୁ ଏହି ମହିଳା ଓ ଜଣେ ୧୧ବର୍ଷର  ଶିଶୁକନ୍ୟାର ମୃତଦେହ ଉଦ୍ଧାର କରିଛି। ଅନ୍ୟ ଜଣେ ନାବାଳିକାକୁ ଗୁରୁତର ଅବସ୍ଥାରେ ଉଦ୍ଧାର କରି ଚିକିତ୍ସା ପାଇଁ ପ୍ରଥମେ ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖାନା ଓ ପରେ କଟକ ସ୍ଥାନାନ୍ତରିତ କରାଯାଇଛି । ମୃତ ମହିଳା ଜଣଙ୍କ ରାସୋଳ ଥାନା ଖରଡାଳୀ ଗ୍ରାମର ଅଞ୍ଜଳି ସେଠି ବୋଲି ଜଣାପଡିଛି। ତେବେ ଗୁରୁତର ନାବଳିକା ଜଣକ ହେଉଛି ମୃତ ଅଞ୍ଜଳୀଙ୍କ ନାତୁଣୀ ଲିଙ୍କି ସେଠି ।  ଅପରପକ୍ଷରେ ମୃତ କୃଷ୍ଣପ୍ରିୟା ବିଶ୍ୱାଳ ଉକ୍ତ ଗ୍ରାମର ମହେଶ୍ୱର ବିଶ୍ବାଳଙ୍କ ଝିଅ ବୋଲି ଜଣାପଡ଼ିଛି। 

ସୂଚନା ଥାଉକି, ନିଜ ଆଇ ଅଞ୍ଜଳୀଙ୍କ ସହିତ ନାତୁଣୀ ଲିଙ୍କି ଓ ତାର ସାଥି କୃଷ୍ଣପ୍ରିୟା ଗାଧୋଇବାକୁ ଗାଁ ପୋଖରୀକୁ ଯାଇଥିବା ବେଳେ ଏପରି ଅଘଟଣ ଘଟିଛି। ତେବେ ମୃତା ଅଞ୍ଜଳି ଓ ଶିଶୁର ମୃତଦେହକୁ ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଡାକ୍ତର ଖାନାରେ ଭର୍ତ୍ତି କରାଯାଇଛି। ଏପରି ଅଘଟଣକୁ ନେଇ ଗ୍ରାମବାସୀ ବେଶ ମର୍ମାହତ ହୋଇପଡିଛନ୍ତି।