ନାଗପୁର ହିଂସାକୁ ନେଇ ଦେବେନ୍ଦ୍ର ଫଡନାଭିସ୍‌ଙ୍କ ବଡ ବୟାନ,କହିଲେ- ଫିଲ୍ମ ଛାବା ଦାୟୀ

ନୂଆଦିଲ୍ଲୀ ୧୯।୦୩; ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ମଙ୍ଗଳବାର ବିଧାନସଭାରେ ନାଗପୁର ହିଂସା ସମ୍ପର୍କରେ ବିସ୍ତୃତ ବିବରଣୀ ଦେଇଛନ୍ତି। କହିଛନ୍ତି 'ପୋଲିସ୍ ଉପରେ ଆକ୍ରମଣକୁ ଆଦୌ ବରଦାସ୍ତ କରାଯିବ ନାହିଁ।  ନାଗପୁରର ସାମ୍ପ୍ରଦାୟିକ ହିଂସା ପାଇଁ ସିନେମା ଛାବାକୁ ଦାୟୀ କରିଛନ୍ତି ଦେବେନ୍ଦ୍ର ଫଡନାଭିସ । ସୋମବାର ଔରଙ୍ଗାଜବଙ୍କ ସମାଧି ଭାଙ୍ଗିବା ଗୁଜବକୁ ନେଇ ଦୁଇ ଗୋଷ୍ଠୀ ମଧ୍ୟରେ ପ୍ରବଳ ଗଣ୍ଡଗୋଳ ହୋଇଥିଲା ।

ଏନେଇ ସିଏମ୍ କହିଛନ୍ତି ଯେ ଏହି ଘଟଣା ପରେ ୧୧ ଟି ପୋଲିସ୍ ଷ୍ଟେସନର ସମ୍ବେଦନଶୀଳ ଅଞ୍ଚଳରେ କର୍ଫ୍ୟୁ ଲାଗୁ କରାଯାଇଛି। ହିଂସା ସ୍ଥାନରୁ ପଥରରେ ପରିପୂର୍ଣ୍ଣ ଏକ ଟ୍ରଲି ଏବଂ ଅନେକ ଅସ୍ତ୍ରଶସ୍ତ୍ର ମିଳିଥିଲା।  କେଉଁଠି ପଥରମାଡ ତ ପୁଣି କେଉଁଠି ଆକ୍ରମଣରେ ଉଠିଛି ପଡୁଛି ନାଗପୁର । ସୂଚନା ଅନୁସାରେ ମୋଗଲ ଶାସକ ଔରଙ୍ଗଜେବଙ୍କ ସମାଧିକୁ ହଟାଇବାକୁ ବିଶ୍ବହିନ୍ଦୁ ପରିଷଦ ଓ ବଜରଙ୍ଗ ଦଳ ରାଲି କରୁଥିଲେ। ଏହି ସମୟରେ କିଛି ଇସଲାମିକ ଧର୍ମପୁସ୍ତକକୁ ପୋଡ଼ା ଯାଇଥିବା ଗୁଜବ ପ୍ରଚାର ହୋଇଥିଲା। ଔରଙ୍ଗଜେବଙ୍କୁ ସମର୍ଥନ କରୁଥିବା କିଛି ବ୍ୟକ୍ତି ଉତ୍ପାତ ମଚାଇଥିଲେ । ନାଗପୁରରେ ତାଣ୍ଡବ କରିବା ସହ ଭଙ୍ଗାରୁଜା, ଆକ୍ରମଣ ଓ ଧମକ ଦେଇଥିଲେ ।  ଅନ୍ୟ ଏକ ଗୋଷ୍ଠୀ ସହ ମୁହାଁମୁହିଁ ପରେ କ୍ରମଶ ଏହା ସାମ୍ପ୍ରଦାୟିକ ହିଂସାର ରୂପ ନେଇଥିଲା।

ଉପଦ୍ରବୀଙ୍କ ବିରୋଧରେ କଡ଼ାକାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଛନ୍ତି ମହାରାଷ୍ଟ୍ର ସରକାର । ଘଟଣାକୁ ଯୋଜନାବଦ୍ଧ ଷଡଯନ୍ତ୍ର କହିବା ସହ ଔରଙ୍ଗଜେବ ସମର୍ଥକଙ୍କ ପ୍ରତି ସରକାର କଠୋରମନୋଭାବ ଆପଣାଇବେ ବୋଲି ଚେତାବନୀ ଦେଇଛନ୍ତି ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ।