ପରିବାର ଲୋକଙ୍କ ଅଭିଯୋଗ ଡାକ୍ତରଖାନାରୁ ନବଜାତ ଶିଶୁ ଚୋରି, ମହିଳା ଜଣଙ୍କ ଓଟିକୁ ଯାଇନଥିବା CCTVରୁ ସ୍ପଷ୍ଟ

ନୟାଗଡ଼ ୩୦।୧୧: ଡାକ୍ତରଖାନାରୁ ନବଜାତ ଶିଶୁ ଗାଏବ । ଏ ନେଇ ପରିବାର ଲୋକ କଲେ ଅଭିଯୋଗ । ଘଟଣାକୁ ନେଇ ଡାକ୍ତରଖାନାରେ ଉତ୍ତେଜନା । ସିସିଟିଭି ଯାଞ୍ଚ ପରେ ଅଭିଯୋଗର ସତ୍ୟତା ନଥିବା ଡାକ୍ତରଖାନା କର୍ତ୍ତୃପକ୍ଷ ଏବଂ ପୋଲିସର ସୂଚନା । ନୟାଗଡ ଜିଲ୍ଲା ରାଜସୁନାଖଳା ଡାକ୍ତରଖାନାରେ ଆଜି ଏଭଳି ଏକ ଘଟଣା ଘଟିଛି ।

ସୂଚନାଯୋଗ୍ୟ ଯେ, ଖୋର୍ଦ୍ଧା ଜିଲ୍ଲା ବୋଲଗଡ଼ ବ୍ଲକ ଗୋଡ଼ଭଙ୍ଗା ଗାଁର ବିଜୟ କୁମାର ପରିଡ଼ାଙ୍କ ପତ୍ନୀ ସୁଧିସ୍ମିତା ପରିଡ଼ା ପ୍ରସବଜନିତ ଯନ୍ତ୍ରଣା ଭୋଗିବାରୁ ଶୁକ୍ରବାର ରାଜସୁନାଖଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆସିଥିଲେ । ତେବେ ସମୟ ହୋଇନଥିବାରୁ ଏକ ଇଞ୍ଜେକସନ ନେଇ ସେ ଜଣେ ମ୍ୟାଡାମଙ୍କ ପ୍ରରୋଚନାରେ ସମ୍ପର୍କୀୟଙ୍କ ଘରକୁ ଚାଲି ଯାଇଥିଲେ  । ଶନିବାର ପୁଣି ଥରେ ସମ୍ପୃକ୍ତ ମ୍ୟାଡାମଙ୍କ ଫୋନ୍ ପାଇ ବିଜୟ ସ୍ତ୍ରୀଙ୍କୁ ଧରି ମେଡିକାଲକୁ ଆସିଥିଲେ । ସ୍ତ୍ରୀଙ୍କୁ ଛାଡି ସେ ମା’ଙ୍କୁ ଆଣିବା ପାଇଁ  ଘରକୁ ଯାଇ ଫେରିବା ପରେ ସ୍ତ୍ରୀ ବାହାରେ ଶୋଇଥିବା ଦେଖିବାକୁ ପାଇଥିଲେ । ସ୍ତ୍ରୀଙ୍କୁ ପଚାରିବା ପରେ ତାଙ୍କର ଏକ ସନ୍ତାନ ହୋଇଥିବା ଏବଂ କିଏ ନେଇଯାଇଥିବା ସେ କହିଥିଲେ । ଏହି ଘଟଣା ପ୍ରଚାର ହେବା ପରେ ପରିବାର ଲୋକ ଏବଂ ସ୍ଥାନୀୟ ଲୋକଙ୍କ ଭିଡ ଜମିବା ସହ ଉତ୍ତେଜନା ଦେଖାଦେଇଥିଲା ।

ଅଭିଯୋଗ ଆସିବା ପରେ ମେଡିକାଲ କର୍ତ୍ତୃପକ୍ଷ ଏବଂ ପୋଲିସ ଘଟଣାସ୍ଥଳରେ ପହଞ୍ଚି ସିସିଟିଭି ଯାଞ୍ଚ କରିବା ସହ ତଦନ୍ତ ଆରମ୍ଭ କରିଥିଲେ । ମହିଳା ଜଣଙ୍କ ଡାକ୍ତରଖାନା ଟିକେଟ କାଟିନଥିବା ଏବଂ କୌଣସି ଡାକ୍ତରଙ୍କୁ ଦେଖାଇନଥିବା ଏପରିକି ଓଟିକୁ ଯାଇନଥିବା ସିସିଟିଭିରୁ ସ୍ପଷ୍ଟ ହୋଇଛି । ତେଣୁ ଅଭିଯୋଗ ମିଥ୍ୟା ଏବଂ ଅଭିଯୋଗକାରୀଙ୍କ ବିରୁଦ୍ଧରେ ଥାନାରେ ଅଭିଯୋଗ କରାଯିବ ବୋଲି ମେଡିକାଲ ଅଫିସର କହିଛନ୍ତି । ସେପଟେ ପୋଲିସ ମଧ୍ୟ ଘଟଣାକୁ ଗୁରୁତ୍ବର ସହ ନେଇ ଅଧିକ ପଚରାଉଚରା କରୁଛି ।

You Can Read:

କଟକ ଜିଲ୍ଲା ମୁଖ୍ୟ ଚିକିତ୍ସାଳୟରେ ଉଦଘାଟିତ ହେଲା ନୂଆ ଚକ୍ଷୁ ବିଭାଗ