ପର୍ଯ୍ୟଟକ ଶୂନ୍ୟ ହୋଇପଡିଛି ପୁରୀ, ବାତ୍ୟା ଦାନା ଯୋଗୁ ଲକ୍ଷାଧିକ ଟଙ୍କାର କ୍ଷତି ସହିଲେ ବ୍ୟବସାୟୀ

ବାତ୍ୟା ଆସିଲେ ସମୁଦ୍ର ଉପକୂଳ ବର୍ତ୍ତୀ ଜିଲ୍ଲା ଗୁଡିକରେ ଏହାର ପ୍ରଭାବ ବେଶୀ ଦେଖା ଦେଇଥାଏ । ବିଭିନ୍ନ ସମୟରେ ବାତ୍ୟା ଯୋଗୁ ଉପକୂଳ ଜିଲ୍ଲା ଗୁଡିକରେ ଅନେକ କ୍ଷୟ କ୍ଷତି ହୁଏ । ବାତ୍ୟା ଯୋଗୁ କେବଳ ଧନ ଜୀବନ ନୁହେଁ ବରଂ ବିଭିନ୍ନ ରୋଜଗାର କ୍ଷେତ୍ରରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳେ । ସେହିପରି ପୁରୀ ଏକ ଉପକୂଳବର୍ତ୍ତୀ ଅଞ୍ଚଳ ହୋଇଥିବା ହେତୁ ଏଠାରେ ଅନେକ ସମୟରେ ବାତ୍ୟା ଯୋଗୁ ବହୁତ କ୍ଷୟ କ୍ଷତି ହୋଇଛି । ବାତ୍ୟା ଯୋଗୁ ପର୍ଯ୍ୟଟକ ଓ ଭକ୍ତ ଶୂନ୍ୟ ହୋଇପଡେ ଶ୍ରୀ କ୍ଷେତ୍ର ପୁରୀ । ପୁରୀରେ ବିଭିନ୍ନ ସମୟରେ ବାତ୍ୟା ଯୋଗୁ ପର୍ଯ୍ୟଟନ ଶିଳ୍ପ ଏବଂ ହୋଟେଲ ଶିଳ୍ପ ସହ ପରିବହନ କ୍ଷେତ୍ରରେ ମଧ୍ୟ ଏହାର ସିଧା ସଳଖ ପ୍ରଭାବ ପଡିଛି । ତେବେ ବାତ୍ୟା ଦାନାକୁ ନେଇ ପୁରୀରେ ପର୍ଯ୍ୟଟକଙ୍କୁ ଖାଲି କରାଯାଇଥିବା ହେତୁ ଏହାର ପ୍ରଭାବ ବିଭିନ୍ନ ବ୍ୟବସାୟ ଉପରେ ପଡିଛି । ଲକ୍ଷାଧିକ ଟଙ୍କାର କ୍ଷତି  ସହିବାକୁ ପଡିଛି ହୋଟେଲ, ଶିଳ୍ପ ଟ୍ରାଭେଲ ଏଜେନ୍ସି ଏବଂ ବସ ମାଲିକ ମାନଙ୍କୁ ।

ବାତ୍ୟା ଦାନାର ପ୍ରଭାବ ପୁରୀକୁ ଏତେ ମାତ୍ରାରେ ନଥିଲେ ମଧ୍ୟ ବିଭିନ୍ନ ବ୍ୟବସାୟୀଙ୍କ କ୍ଷେତ୍ରରେ ଏହାର ପ୍ରଭାବ ଦେଖିବାକୁ ମିଳିଛି । ବାତ୍ୟା ଦାନା ଯୋଗୁ ପୁରୀକୁ ପର୍ଯ୍ୟଟକଙ୍କୁ ବାରଣ କରାଯାଇଥିଲା । ତେଣୁ ଏହାର ପ୍ରଭାବ ସାଧାରଣ ବ୍ୟବସାୟ ଉପରେ ଦେଖିବାକୁ ମିଳିଛି । ପର୍ଯ୍ୟଟକ ନଥିବା ଯୋଗୁ ପୁରୀରେ ଥିବା ସମସ୍ତ ହୋଟେଲ ଗୁଡିକ ସମ୍ପୂର୍ଣ ଖାଲି ରହିଛି । ଆଉ ଲକ୍ଷାଧିକ ଟଙ୍କାର କ୍ଷତି ସହିବାକୁ ପଡିଛି ହୋଟେଲ ମାଲିକ ମାନଙ୍କୁ । ପୂର୍ବରୁ ଅନେକ ବାତ୍ୟା ହୋଟେଲ ବ୍ୟବସାୟ ଉପରେ ପ୍ରଭାବ ପକାଇଥିବା ବେଳେ ବର୍ତମାନ ବାତ୍ୟା ଦାନା ଯୋଗୁ ପୁଣି ଥରେ ବିଭିନ୍ନ ହୋଟେଲ ମାଲିକ ମାନଙ୍କୁ କ୍ଷତି ସହିବାକୁ ପଡିଛି । ବର୍ତ୍ତମାନ ପୁରୀରେ ସ୍ଥିତି ସ୍ବାଭାବିକ ହୋଇଥିବା ବେଳେ ପର୍ଯ୍ୟଟକଙ୍କ ଲାଗି କୌଣସି କଟକଣା ନଥିବା କହିଛନ୍ତି ପୁରୀ ଜିଲ୍ଲାପାଳ । ସେପଟେ ଆଗକୁ ଦୀପାବଳି ଓ ଡିସେମ୍ବର ମାସ ଥିବାରୁ ପର୍ଯ୍ୟଟକଙ୍କ ପୁଣି ଆଗମନ ହେଲେ ବ୍ୟବସାୟ ସ୍ୱାଭାବିକ ହେବ ବୋଲି ଆଶା ରଖିଛନ୍ତି ବିଭିନ୍ନ ହୋଟେଲ ମାଲିକ ଓ କର୍ମଚାରୀ ।

ସେହିପରି ବାତ୍ୟା ପ୍ରଭାବରେ ମଧ୍ୟ ପାରିବହନ କ୍ଷେତ୍ରରେ ବେଶ ପ୍ରଭାବ ଦେଖିବାକୁ ମିଳିଛି । ବାତ୍ୟା ଦାନା ଯୋଗୁ ପୁରୀରୁ ବସ ଚଳାଚଳ ବନ୍ଦ ରହିବା ସହ କିଛି ମାତ୍ରାରେ ବସ ସେବା ଯୋଗାଉଥିବା କହିଛନ୍ତି ବସ ମାଲିକ । ପୂର୍ବରୁ ଅନେକ ବାତ୍ୟା ଯୋଗୁ ପରିବହନ କ୍ଷେତ୍ରରେ ବହୁତ କ୍ଷତି ସହିବାକୁ ପଡିଛି । ବାତ୍ୟା ଦାନା ଯୋଗୁ ପୁରୀରୁ ବିଭିନ୍ନ ସ୍ଥାନକୁ ବସ ଚଳାଚଳ ବନ୍ଦ ରହିଥିଲା।  କିନ୍ତୁ ଆଜି ଠାରୁ ପୁଣି ସ୍ୱାଭାବିକ ହୋଇଛି ବସ ସେବା । ଦୁଇ ଦିନ ଧରି ବସ ସେବା ବନ୍ଦ ହେତୁ ବସ ମାଲିକମାନେ ସରକାରଙ୍କୁ ଟିକସ ଛାଡ଼ ଲାଗି ଦାବି କରିଛନ୍ତି । ଅନ୍ୟପଟେ କେବଳ ବସ ସେବା ନୁହେଁ ଛୋଟ ବଡ଼ ବ୍ୟବସାୟରେ ମଧ୍ୟ ବାତ୍ୟାର ପ୍ରଭାବ ଦେଖିବାକୁ ମିଳିଛି ।

ବାତ୍ୟା ଦାନାର ପ୍ରଭାବ ପୁରୀକୁ ଏତେ ମାତ୍ରାରେ ନଥିବା ବେଳେ ପର୍ଯ୍ୟଟକ ଶୂନ୍ୟ ହୋଇପଡିଛି ପୁରୀ । ଚିନ୍ତାରେ ଛୋଟ ବଡ଼ ବ୍ୟବସାୟୀ । ଜିଲ୍ଲା ପ୍ରଶାସନ ପକ୍ଷରୁ ଆଜି ଠାରୁ ପର୍ଯ୍ୟଟକଙ୍କ ଲାଗି କୌଣସି କଟକଣା ନଥିବା ସୂଚନା ଦିଆଯାଇଥିବା ଖବର ଶୁଣି ଆଶ୍ବସ୍ତି ଲାଭ କରିଛନ୍ତି ବିଭିନ୍ନ ବ୍ୟବସାୟୀ ।

The post ପର୍ଯ୍ୟଟକ ଶୂନ୍ୟ ହୋଇପଡିଛି ପୁରୀ, ବାତ୍ୟା ଦାନା ଯୋଗୁ ଲକ୍ଷାଧିକ ଟଙ୍କାର କ୍ଷତି ସହିଲେ ବ୍ୟବସାୟୀ appeared first on KNews Odisha.