‘ପହଲଗାମ ଆକ୍ରମଣ ବେଳେ ପାକିସ୍ତାନରେ ଥିବା ମାଷ୍ଟରମାଇଣ୍ଡଙ୍କ ସହ ଯୋଗାଯୋଗରେ ଥିଲେ ଆତଙ୍କୀ’

ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ-ପାକିସ୍ତାନ ସୈନ୍ୟ ସଂଘର୍ଷ ଉପରେ ଏକ ସଂସଦୀୟ ସମିତିକୁ ସୂଚନା ଦେଇଛନ୍ତି ବିଦେଶ ସଚିବ ବିକ୍ରମ ମିଶ୍ରି । କଂଗ୍ରେସ ସାଂସଦ ଶିଶ ଥରୁରଙ୍କ ଅଧ୍ୟକ୍ଷତାରେ ବିଦେଶ ମାମଲାର ସ୍ଥାୟୀ ସମିତିର ବୈଠକରେ ଟିଏମସିରୁ ଅଭିଷେକ ବାନାର୍ଜୀ, କଂଗ୍ରେସର ରାଜୀବ ଶୁକ୍ଲା ଓ ଦୀପେନ୍ଦ୍ର ହୁଡ୍ଡା, ଅସଦୁଦ୍ଦିନ ଓୱେସୀ ଓ ବିଜେପିରୁ ଅପରାଜିତା ଷଡ଼ଙ୍ଗୀ ଓ ଅରୁଣ ଗୋଭିଲ ସାମିଲ ହୋଇଥିଲେ ।

ବୈଦେଶିକ ସଚିବ ସଂସଦୀୟ ପ୍ୟାନେଲକୁ କହିଥିଲେ ଯେ ପହଲଗାମ ଆକ୍ରମଣର ତଦନ୍ତରୁ ଜଣାପଡିଛି ଯେ ଆତଙ୍କବାଦୀମାନେ ପାକିସ୍ତାନରେ ବସିଥିବା ମାଷ୍ଟରମାଇଣ୍ଡଙ୍କ ସହିତ ଯୋଗାଯୋଗ କରିଥିଲେ । ଏହାସହ ପ୍ୟାନେଲକୁ ଅବଗତ କରାଇଥିଲେ ଯେ ଜାତିସଂଘ ଦ୍ୱାରା ୱାଣ୍ଟେଡ୍ ଆତଙ୍କବାଦୀ ପାକିସ୍ତାନରେ ମୁକ୍ତ ଭାବରେ ବୁଲୁଛନ୍ତି ଏବଂ ଭାରତ ବିରୁଦ୍ଧରେ ହିଂସା ସୃଷ୍ଟି କରୁଛନ୍ତି । ସୂତ୍ର ଅନୁଯାୟୀ, ପାକିସ୍ତାନରେ ଆତଙ୍କବାଦୀ, ସାମରିକ ଗୁଇନ୍ଦା ସଂସ୍ଥା ଏବଂ ନାଗରିକ ପ୍ରଶାସନ ମଧ୍ୟରେ ଏକ ଗଭୀର ସମ୍ପର୍କ ରହିଛି, ଯାହା ଭାରତ ବିରୁଦ୍ଧରେ ଆତଙ୍କବାଦକୁ ପ୍ରୋତ୍ସାହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି ।

ବୈଦେଶିକ ସଚିବ ସଂସଦୀୟ କମିଟିକୁ ଏହା ମଧ୍ୟ ଜଣାଇଥିଲେ ଯେ ପାକିସ୍ତାନ ପ୍ରାୟୋଜିତ ସୀମାପାର ଆତଙ୍କବାଦ ବିଷୟରେ ଭାରତ ଅନ୍ତର୍ଜାତୀୟ ମଞ୍ଚରେ ଲଗାତାର ଉଠାଉଛି । ଏହାସହ ବିଭିନ୍ନ ପକ୍ଷଙ୍କୁ ଏ ବାବଦରେ ଅବଗତ କରାଉଛି । ବୈଦେଶିକ ସଚିବ ସଂସଦୀୟ କମିଟି ଆଗରେ ଆଉ ଥରେ ସ୍ପଷ୍ଟ କରିଥିଲେ ଯେ ଜାମ୍ମୁ-କାଶ୍ମୀର ପ୍ରସଙ୍ଗରେ ତୃତୀୟ ପକ୍ଷର ମତାମତ ଦେବାର ଅଧିକାର ନାହିଁ ।

Also read: ଭାରତ-ପାକିସ୍ତାନ ଅସ୍ତ୍ରବିରତି ବୁଝାମଣାରେ ଆମେରିକାର କୌଣସି ଭୂମିକା ନାହିଁ: ବିକ୍ରମ ମିଶ୍ରୀ