ପାକିସ୍ତାନ ବିପକ୍ଷ ମ୍ୟାଚ୍‌ରେ ଓପନିଂ କରିବେ ବିରାଟ କୋହଲି ? ମ୍ୟାନେଜମେଣ୍ଟ ନେଲା ବଡ଼ ନିଷ୍ପତ୍ତି

ନୂଆଦିଲ୍ଲୀ: ଟି-୨୦ ବିଶ୍ୱକପରେ ଆୟରଲାଣ୍ଡ ବିରୋଧରେ ଭାରତୀୟ ଟିମ୍ ନୂଆ ରଣନୀତି ସହ ମୈଦାନକୁ ଓହ୍ଲାଇଥିଲା । ବିରାଟ କୋହଲିଙ୍କ ଦ୍ୱାରା ଓପନିଂ କରାଇବା ନେଇ ମୁଖ୍ୟ କୋଚ୍ ରାହୁଲ ଦ୍ରାବିଡଙ୍କ ରଣନୀତି କାମ କରିନଥିଲା । ଭାରତର ଆଗାମୀ ମ୍ୟାଚ୍ ପାକିସ୍ତାନ ସହ ହେବାକୁ ଯାଉଛି । ଏହାରି ଭିତରେ ଖବର ଆସୁଛି ଯେ ପାକିସ୍ତାନ ବିପକ୍ଷ ମ୍ୟାଚରେ ବି ବିରାଟ କୋହଲି ହିଁ ଟିମ୍ ପାଇଁ ଓପନିଂ କରିବେ ।

ହିନ୍ଦୁସ୍ତାନ ଟାଇମ୍ସର ରିପୋର୍ଟ ଅନୁସାରେ ଟିମ୍ ମ୍ୟାନେଜମେଣ୍ଟ ରୋହିତ୍ ଶର୍ମା ଏବଂ ବିରାଟ କୋହଲିଙ୍କ ଯୋଡ଼ିକୁ ଓପନିଂ ପାଇଁ ପଠାଇପାରେ । ରବିବାର ଭାରତ ନିଜର ଚିର ପ୍ରତିଦ୍ୱନ୍ଦୀ ପାକିସ୍ତାନକୁ ନ୍ୟୁୟର୍କର ନାସୌର ଷ୍ଟାଡିୟମ ଭେଟିବ । ଯାହା ଏକ ହାଇଭୋଲଟେଜ୍ ମୁକାବିଲା ହେବ ବୋଲି ଅନୁମାନ କରାଯାଉଥିଲା, କିନ୍ତୁ ଗୁରୁବାର ଆମେରିକାଠାରୁ ପାକିସ୍ତାନ ହାରିବା ପରେ ଏବେ ଭାରତ ପଲା ଭାରି ଥିବା କୁହାଯାଉଛି ।

ଉଲ୍ଲେଖଯୋଗ୍ୟ ଯେ ଜୁନ୍ ୫ରେ ଆୟରଲାଣ୍ଡ ବିପକ୍ଷରେ ବିରାଟ କୋହଲି ଓପନର ଭାବେ ଡେବ୍ୟୁ କରିଥିଲେ । କିନ୍ତୁ ୫ଟି ବଳ ଖେଳି ୧ ରନ୍ କରି ଶସ୍ତାରେ ଆଉଟ୍ ହୋଇଯାଇଥିଲେ । ରିପୋର୍ଟ ଅନୁସାରେ ପାକିସ୍ତାନ ବିପକ୍ଷ ମ୍ୟାଚରେ ବି ଭାରତ ଏହି ରଣନୀତିରେ ମୈଦାନକୁ ଓହ୍ଲାଇପାରେ । ତେବେ ଟି-୨୦ ଫର୍ମାଟରେ ଓପନିଂ କରିବା ବିରାଟଙ୍କ ପାଇଁ ପ୍ରଥମ ନୁହେଁ । ନିଜ ଆଇପିଏଲ୍ ଫ୍ରାଞ୍ଚାଇଜି ରୟାଲ ଚ୍ୟାଲେଞ୍ଜର ବେଙ୍ଗାଲୁରୁ ପାଇଁ ସେ ଅନେକ ସିଜିନରେ ଓପନିଂ କରିସାରିଛନ୍ତି । ଆଇପିଏଲ୍ ୨୦୨୪ରେ ସେ ଓପନିଂ କରି ୧୫୪ ଷ୍ଟ୍ରାଇକ୍ ରେଟ୍ ସହ ୭୪୧ ରନ୍ କରି ଅରେଞ୍ଜ କ୍ୟାପ୍ ଜିତିଥିଲେ ।