ପୁଣି ଭୟଙ୍କର ଦୁର୍ଘଟଣା! ଏୟାର ଇଣ୍ଡିଆ ବିମାନରେ ଲାଗିଗଲା ନିଆଁ, ହୁ ହୁ ହୋଇ…

ନୂଆଦିଲ୍ଲୀ,୨୨।୭: ଏୟାର ଇଣ୍ଡିଆ ବିମାନକୁ ନେଇ ବଡ଼ ଖବର। ହଠାତ୍‌ ବିମାନରେ ଲାଗିଗଲା ନିଆଁ। ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ଅବତରଣ କରିବା ମାତ୍ରେ ଏୟାର ଇଣ୍ଡିଆର ଏକ ବିମାନରେ ନିଆଁ ଲାଗି ଯାଇଛି। ବିମାନବନ୍ଦର କର୍ତ୍ତୃପକ୍ଷଙ୍କ ଦ୍ୱାରା ଜାରି ଏକ ବିବୃତ୍ତି ଅନୁଯାୟୀ, ଅବତରଣ ପରେ, ହଂକଂରୁ ଦିଲ୍ଲୀ ଆସୁଥିବା ଏୟାର ଇଣ୍ଡିଆ ବିମାନ (AI 315) ର ପଛ ଭାଗରେ ଛୋଟ ଇଞ୍ଜିନ (APU – ସହାୟକ ପାୱାର ୟୁନିଟ) ରେ ନିଆଁ ଲାଗିଗଲା।

ଦିଲ୍ଲୀ ବିମାନବନ୍ଦରରେ ସୁରକ୍ଷିତ ଭାବରେ ଅବତରଣ କରିବା ପରେ ବିମାନଟି ଗେଟ ପାଖରେ ଠିଆ ହୋଇଥିବା ସମୟରେ ଏହି ଘଟଣା ଘଟିଥିଲା। ଏହାପରେ ଯାତ୍ରୀମାନେ ବିମାନରୁ ଓହ୍ଲାଇବା ଆରମ୍ଭ କରିଥିଲେ। ବର୍ତ୍ତମାନ ଏହି ଦୁର୍ଘଟଣାରେ ସମସ୍ତ ଯାତ୍ରୀ ଏବଂ କ୍ରୁ ସୁରକ୍ଷିତ ଅଛନ୍ତି। ସହାୟକ ପାୱାର ୟୁନିଟ ଏକ ଛୋଟ ଇଞ୍ଜିନ ଯାହା ବିମାନ ପାର୍କିଂ ସମୟରେ ବିଦ୍ୟୁତ୍ତ ଯୋଗାଣ ଏବଂ ଏୟାର କଣ୍ଡିସନିଂ ଭଳି କାର୍ଯ୍ୟ କରେ। ଏହା ଉଡ଼ାଣ ସମୟରେ ମୁଖ୍ୟ ଇଞ୍ଜିନ ପରି କାମ କରେ ନାହିଁ, କିନ୍ତୁ ବିମାନର ପ୍ରସ୍ତୁତି ଏବଂ ପାର୍କିଂ ସମୟରେ ଏହା ଆବଶ୍ୟକ।

ଏୟାର ଇଣ୍ଡିଆ ଏକ ବିବୃତ୍ତି ଜାରି କରି କହିଛି, “ନିଗ୍ନ ଯୋଗୁଁ ବିମାନଟି କିଛି କ୍ଷତି ପାଇଛି, କିନ୍ତୁ ଯାତ୍ରୀ ଏବଂ କ୍ରୁ ସଦସ୍ୟମାନେ ସେତେବେଳେ ବିମାନରୁ ଓହ୍ଲାଇ ସାରିଥିଲେ ଏବଂ ସମସ୍ତେ ସୁରକ୍ଷିତ ଅଛନ୍ତି। ଅଧିକ ତଦନ୍ତ ପାଇଁ ବିମାନକୁ ବନ୍ଦ କରାଯାଇଛି ଏବଂ ନିୟାମକକୁ ସୂଚନା ଦିଆଯାଇଛି।”

ଏହି ଘଟଣା ଏପରି ସମୟରେ ଘଟିଛି ଯେତେବେଳେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ସୋମବାର ରାଜ୍ୟ ସଭାରେ କହିଛି ଯେ ଗତ 6 ମାସ ମଧ୍ୟରେ ପାଞ୍ଚଟି ସୁରକ୍ଷା ଉଲ୍ଲଂଘନ ପାଇଁ ଏୟାର ଇଣ୍ଡିଆକୁ ମୋଟ 9ଟି କାରଣ ଦର୍ଶାଅ ନୋଟିସ ଜାରି କରାଯାଇଛି।

ଗତ ମାସରେ ଅହମ୍ମଦାବାଦରୁ ଲଣ୍ଡନ ଯାଉଥିବା ଏକ ଏୟାର ଇଣ୍ଡିଆ ବିମାନ (ବୋଇଂ 787-8) ଉଡ଼ାଣ ଆରମ୍ଭ ହେବାର କିଛି ସମୟ ପରେ ଦୁର୍ଘଟଣାଗ୍ରସ୍ତ ହୋଇଥିଲା, ଯେଉଁଥିରେ 260 ଜଣଙ୍କର ମୃତ୍ୟୁ ହୋଇଥିଲା। ଏହି ଭୟଙ୍କର ଦୁର୍ଘଟଣା ପରେ, ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ଏୟାରଲାଇନ୍ସର ବୋଇଂ 787-8/9 ବିମାନର ଅତିରିକ୍ତ ତଦନ୍ତ ନିର୍ଦ୍ଦେଶ ଦେଇଥିଲା।

ବେସାମରିକ ବିମାନ ଚଳାଚଳ ମନ୍ତ୍ରୀ କେ. ରାମ ମୋହନ ନାଇଡୁ ରାଜ୍ୟ ସଭାରେ କହିଛନ୍ତି, “ମୋଟ 33 ଟି ବିମାନ ମଧ୍ୟରୁ 31 ଟି କାର୍ଯ୍ୟକ୍ଷମ ବିମାନ ଯାଞ୍ଚ କରାଯାଇଛି, ଯାହା ମଧ୍ୟରୁ 8 ଟିରେ ସାମାନ୍ୟ ତ୍ରୁଟି ମିଳିଛି। ଏହି ବିମାନଗୁଡ଼ିକରେ ସଂଶୋଧନ ପରେ, ପୁନର୍ବାର କାର୍ଯ୍ୟକ୍ଷମ କରିବାକୁ ଅନୁମତି ଦିଆଯାଇଛି।”

The post ପୁଣି ଭୟଙ୍କର ଦୁର୍ଘଟଣା! ଏୟାର ଇଣ୍ଡିଆ ବିମାନରେ ଲାଗିଗଲା ନିଆଁ, ହୁ ହୁ ହୋଇ… appeared first on Dharitri Odia News.