ପ୍ରତିଶ୍ରୁତି ଦେଇ ଓଡ଼ିଶାବାସୀଙ୍କୁ ଧୋକା ଦେଇଛି ବିଜେପି, ବଜେଟକୁ ନେଇ ବିଜେପି ଉପରେ ବର୍ଷିଲେ ନବୀନ ପଟ୍ଟନାୟକ

ଭୁବନେଶ୍ବର : ଆଜି ସଂସଦରେ ୨୦୨୪-୨୫ ଆର୍ଥିକ ବର୍ଷର ବଜେଟ୍ ଉପସ୍ଥାପନ କରିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ। ଏହି ବଜେଟରେ ଓଡ଼ିଶା ପାଇଁ ଘୋଷଣା ହୋଇନି କୌଣସି ସ୍ଵତନ୍ତ୍ର  ଅନୁଦାନ। ଆନ୍ଧ୍ର ଓ ବିହାରକୁ ସ୍ଵତନ୍ତ୍ର  ସହାୟତା ପ୍ରଦାନ କରିଥିବାବେଳେ ଓଡ଼ିଶାକୁ ବଜେଟରେ ଅଣଦେଖା କରାଯାଇଛି। ଯାହାକୁ ନେଇ ବିଜେଡି ସଭାପତି ତଥା ବିରୋଧୀ ଦଳର ନେତା ନବୀନ ପଟ୍ଟନାୟକ ବିଜେପି ଉପରେ ବର୍ଷିଛନ୍ତି।

ନବୀନ କହିଛନ୍ତି ଏହି ବଜେଟରେ ଓଡ଼ିଶାକୁ ଉପେକ୍ଷା କରାଯାଇଛି। ନିର୍ବାଚନ ସମୟରେ ବିଜେପିର ନେତା ମାନେ ଓଡିଶାବାସୀଙ୍କୁ ବହୁତ ବଡ ବଡ କଥା କହିଥିଲେ। କିନ୍ତୁ କେନ୍ଦ୍ର ବଜେଟରେ ଓଡିଶା ପାଇଁ କିଛି ନାହିଁ। ଓଡିଶାବାସୀଙ୍କୁ ଏକ ପ୍ରତିଶ୍ରୁତି ଭାବରେ ବିଜେପି ସେମାନଙ୍କ ମେନିଫେଷ୍ଟୋରେ ରାଜ୍ୟକୁ ସ୍ବତନ୍ତ୍ର ବର୍ଗ ମାନ୍ୟତା ଦିଆଯିବ ବୋଲି କହିଥିଲା କିନ୍ତୁ , ଆନ୍ଧ୍ରପ୍ରଦେଶ ଏବଂ ବିହାର ପାଇଁ ସ୍ୱତନ୍ତ୍ର ପ୍ୟାକେଜ୍ ଘୋଷଣା କରାଯାଇଛି ହେଲେ ଓଡ଼ିଶ ପାଇଁ କିଛି ନାହିଁ। ଏହା ସହିତ କେନ୍ଦ୍ର ସରକାରଙ୍କ ନିକଟରେ ବର୍ଷ ବର୍ଷ ଧରି ବିଚାରାଧୀନ ଥିବା ଓଡ଼ିଶାର କୋଇଲା ରୟାଲଟିର ସଂଶୋଧନ ଦାବିକୁ ମଧ୍ୟ ଏଥର ପ୍ରତ୍ୟାଖ୍ୟାନ କରାଯାଇଛି। ଯେଉଁଥିପାଇଁ ରାଜ୍ୟ ପ୍ରତିବର୍ଷ ହଜାର ହଜାର କୋଟି ରାଜସ୍ୱ ହରାଇବ ବୋଲି ନବୀନ କହିଛନ୍ତି।

ଏଥି ସହିତ ନିର୍ବାଚନ ପ୍ରଚାର ସମୟରେ ବିଶେଷ କରି କୃଷି, ଏମଏସଏମଇ ଏବଂ ଶିଳ୍ପ ଉପରେ ଓଡିଶାବାସୀଙ୍କୁ ବିଭିନ୍ନ କ୍ଷେତ୍ରରେ ଅନେକ ବଡ ପ୍ରତିଶୃତି ଦିଆଯାଇଥିଲା। ଏହି ବଜେଟରେ କୌଣସି ପ୍ରତିଶ୍ରୁତି ପୂରଣ ହେବାର କୌଣସି ଉଲ୍ଲେଖ ନାହିଁ । ଏହା ଓଡିଶା ଏବଂ ରାଜ୍ୟର ଲୋକଙ୍କୁ କେନ୍ଦ୍ର ସରକାରଙ୍କ ସମ୍ପୂର୍ଣ୍ଣ ଅବହେଳାର ନିଦର୍ଶନ ବୋଲି ନବୀନ କହିଛନ୍ତି।

ନବୀନ ଆହୁରି ମଧ୍ୟ କହିଛନ୍ତି ଆମେ ସମସ୍ତେ ଜାଣୁ ଯେ ବନ୍ୟା, ବାତ୍ୟା ପରି ଓଡିଶା ପ୍ରତିବର୍ଷ ଅନେକ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହୁଏ । ବିପର୍ଯ୍ୟୟ ପରିଚାଳନା ପାଇଁ ଆମେ ଏକ ସ୍ୱତନ୍ତ୍ର ପ୍ୟାକେଜ୍ ପାଇଁ ଅନୁରୋଧ କରିଥିଲୁ । ଅନ୍ୟ ରାଜ୍ୟଗୁଡିକର ସମାନ ଅନୁରୋଧକୁ ବିଚାର କରାଯାଇ ସେମାନଙ୍କୁ ବନ୍ୟା ସୁରକ୍ଷା ପାଇଁ ସ୍ୱତନ୍ତ୍ର ପ୍ୟାକେଜ୍ ପ୍ରଦାନ କରାଯାଇଥିବାବେଳେ ବିପର୍ଯ୍ୟୟ ପରିଚାଳନା ଉପରେ ଓଡିଶାର ପ୍ରକୃତ ଚାହିଦାକୁ ବିଚାର କରାଯାଇ ନାହିଁ। ତେଣୁ ଉଭୟ ମାମଲାରେ ଏହା ସ୍ୱତନ୍ତ୍ର ପ୍ୟାକେଜ୍ ହେଉ କିମ୍ବା କୋଇଲା ରୟାଲଟିର ସଂଶୋଧନ ହେଉ, ଓଡିଶା ଏନଡିଏ ଦ୍ୱାରା ଅବହେଳିତ ହୋଇ ଚାଲିଛି ।

ଆଜି ସାଧାରଣ ଜନତା ସମ୍ମୁଖୀନ ହେଉଥିବା ସବୁଠାରୁ ଗୁରୁତ୍ବପୂର୍ଣ୍ଣ ବିଷୟ ହେଉଛି ମୁଦ୍ରାସ୍ଫୀତି / ମୂଲ୍ୟ ବୃଦ୍ଧି ଏବଂ ବେକାରୀ । ଏହି ପ୍ରମୁଖ ସମସ୍ୟାର ସମାଧାନ ପାଇଁ ଏହି ବଜେଟରେ କୌଣସି ଯଥେଷ୍ଟ ହସ୍ତକ୍ଷେପ ହୋଇନାହିଁ। ନବୀନ ପୋଲାଭରମ ପ୍ରସଙ୍ଗ ଉଠାଇ କହିଛନ୍ତି ଯେ ଆମେ ପୋଲାଭାରାମ ପ୍ରସଙ୍ଗରେ ନ୍ୟାୟ ପାଇଁ ଲଢୁଛୁ। ଓଡ଼ିଶାର ଅସଲ ଅଭିଯୋଗକୁ ସମାଧାନ ନକରି ପୋଲାଭାରାମ ପାଇଁ ଅଧିକରୁ ଅଧିକ ପାଣ୍ଠି ଆବଣ୍ଟନ କରିବା ଓଡିଶା ବିରୋଧରେ କେନ୍ଦ୍ରର ଏ କିପରି ଷଡଯନ୍ତ୍ର ।  ଏନଡିଏ ସରକାର ବର୍ତ୍ତମାନ ୧୦ ବର୍ଷରୁ ଅଧିକ ସମୟ ଧରି କେନ୍ଦ୍ରରେ ରହିଆସିଛି ଏବଂ ଓଡିଶା ସମେତ ପୂର୍ବ ଭାରତ ଉପରେ ଧ୍ୟାନ ଦେବା ପାଇଁ ପ୍ରତ୍ୟେକ ବଜେଟରେ ଆଲୋଚନା ହେଉଛି। କିନ୍ତୁ କିଛି ହେଉ ନାହିଁ।

ଶେଷରେ ନବୀନ ଓଡିଶାର ପର୍ଯ୍ୟଟନ ଉପରେ କେନ୍ଦ୍ର ବଜେଟରେ ଘୋଷଣାକୁ ନେଇ ଖୁସି ବ୍ୟକ୍ତ କରିଛନ୍ତି।ସେ କହିଛନ୍ତି ଯେ ଓଡିଶା ପାଇଁ ପର୍ଯ୍ୟଟନ ଉପରେ ଏକ ଧ୍ୟାନ ଥିବାରୁ ମୁଁ ଖୁସି ଅଟେ । ମୁଁ ଆଶା କରେ ଏଥିରେ ଭଲ କାମ ହେବ। ସବିଶେଷ ତଥ୍ୟ ବାହାରକୁ ଆସିବା ପାଇଁ ଆମେ ଅପେକ୍ଷା କରିବୁ, ଯାହା ପରେ ଜଣାପଡିବ ଓଡିଶାର ପର୍ଯ୍ୟଟନକୁ ନେଇ କଣ ଯୋଜନା ରହିଛି। ଏଥି ସହିତ ନବୀନ କହିଛନ୍ତି ‘ମୁଁ କହିବି ଯେ ଓଡିଶାକୁ କେନ୍ଦ୍ର ବଜେଟରେ ଅବହେଳା ହେତୁ ମୁଁ ନିରାଶ ଅନୁଭବ କରୁଛି। ଯେତେବେଳେ ରାଜ୍ୟର ଦେଶକୁ ଏତେ ଅବଦାନ ରହିଛି, କିନ୍ତୁ ଓଡ଼ିଶା ବାରମ୍ବାର ଅବହେଳାର ଶିକାର ହେଉଛି।