ପ୍ରଥମ ଦିନରେ ୪୫ ମାମଲାର ଶୁଣାଣି...ସିଜେଆଇ ହେବା ପରେ ଆକ୍ସନରେ ଜଷ୍ଟିସ୍ ସଞ୍ଜୀବ ଖାନ୍ନା

ନୂଆଦିଲ୍ଲୀ: ଜଷ୍ଟିସ୍ ସଞ୍ଜୀବ ଖାନ୍ନା ଭାରତର ୫୧ତମ ପ୍ରଧାନ ବିଚାରପତି ଭାବେ ଦାୟିତ୍ୱ ସମ୍ଭାଳିଛନ୍ତି । ସିଜେଆଇ ହେବା ପରେ ପ୍ରଥମ ଦିନରେ ସେ ୪୫ ମୋକଦ୍ଦମାର ଶୁଣାଣି କରିଛନ୍ତି । ରାଷ୍ଟ୍ରପତି ଭବନରେ ସୋମବାର ଆୟୋଜିତ ଏକ ସମାରୋହରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ତାଙ୍କୁ ଶପଥ ପାଠ କରାଇଥିଲେ । ଏହାପରେ ସିଜେଆଇ ସଞ୍ଜୀବ ଖାନ୍ନା ଅପରାହ୍ଣ ସମୟରେ ସୁପ୍ରିମକୋର୍ଟ ସ୍ଥିତ ପ୍ରଧାନ ବିଚାରପତିଙ୍କ କୋର୍ଟ ରୁମରେ ପ୍ରବେଶ କରିଥିଲେ । ପୂର୍ବତନ ଅଟର୍ଣ୍ଣିଂ ଜେନେରାଲ୍ ତଥା ଆଇନଜୀବୀ ମୁକୁଲ ରୋହତଗୀଙ୍କ ସମେତ ବରିଷ୍ଠ ଅଧିକାରୀ ତାଙ୍କୁ ଭବ୍ୟ ସ୍ୱାଗତ କରିବା ସହ ଅଭିନନ୍ଦନ ଜଣାଇଥିଲେ ।

ବରିଷ୍ଠ ଆଇନଜୀବୀ ମୁକୁଲ ରୋହତଗୀ ଦିନର କାର୍ଯ୍ୟ ଆରମ୍ଭରେ କହିଥିଲେ ଯେ ପ୍ରଧାନ ବିଚାରପତି ଭାବେ ଆପଣଙ୍କ ସଫଳ କାର୍ଯ୍ୟକାଳର କମାନା କରୁଛି । ରୋହତଗୀ ଶୁକ୍ରବାର କହିଥିଲେ ଯେ ଏକ ଦଶନ୍ଧିରୁ ଅଧିକ ସମୟ ଏବଂ ସିଜେଆଇ ୱାଇକେ ସବରୱାଲ (ଦିବଙ୍ଗତ)ଙ୍କ ପରେ ଶୀର୍ଷ ଅଦାଲତରେ ଦିଲ୍ଲୀ ହାଇକୋର୍ଟରୁ ଜଣେ ସିଜେଆଇ ହେବେ । କୋର୍ଟ ପରିସରରେ ଉପସ୍ଥିତ ଅନ୍ୟ ଆଇନଜୀବୀ ମଧ୍ୟ ସିଜେଆଇ ସଞ୍ଜୀବ ଖାନ୍ନାଙ୍କୁ ଶୁଭେଚ୍ଛା ଜଣାଇଥିଲେ ।

ଅପରାହ୍ଣ ପରେ ଜଷ୍ଟିସ ସଞ୍ଜୟ କୁମାରଙ୍କ ସମେତ କୋର୍ଟ ରୁମ୍ ନମ୍ୱର ୧ରେ ଏକତ୍ରିତ ଆଇନଜୀବୀଙ୍କୁ ସିଜେଆଇ ଖାନ୍ନାଙ୍କୁ ଧନ୍ୟବାଦ ଜଣାଇଥିଲେ । ସିଜେଆଇ ପ୍ରଥମ ଦିନରେ ୨.୩୦ ସୁଦ୍ଧା କୋର୍ଟ ରୁମରେ ରହିଥିଲେ ଏବଂ ୪୫ ସୂଚୀବଦ୍ଧ ମାମଲାର ଶୁଣାଣି କରିଥିଲେ । ଏଥିରୁ ଅଧିକାଂଶ ମାମଲା ବାଣିଜ୍ୟ ସହ ଜଡ଼ିତ ଥିଲା ।