ବିଦେଶୀ ଗଣମାଧ୍ୟମରେ ଧରାପଡ଼ିଲା ପାକିସ୍ତାନର ମିଛ, ସାମ୍ନାକୁ ଆସିଲା ଅନେକ ଗୁପ୍ତ ତଥ୍ୟ

ନୂଆଦିଲ୍ଲୀ/ଓ୍ବାଶିଂଟନ,୧୫ା୫: ଭାରତ-ପାକିସ୍ତାନ ଯୁଦ୍ଧ ସମୟରେ ଭାରତୀୟ ସେନା ପାକିସ୍ତାନରେ ଅନେକ କ୍ଷତି ଘଟାଇଛନ୍ତି। ତଥାପି ପାକିସ୍ତାନ ଏହାକୁ ମାନିବାକୁ ନାରାଜ। ପାକିସ୍ତାନ ଏହି ସତ୍ୟକୁ ଯେତେ ଲୁଚାଇବାକୁ ଚେଷ୍ଟା କଲେ ମଧ୍ୟ ଏବେ ବିଦେଶୀ ଗଣମାଧ୍ୟମ ମଧ୍ୟ ପାକିସ୍ତାନର ମିଛକୁ ପ୍ରକାଶ କରିବା ଆରମ୍ଭ କରିଦେଲାଣି। ଆମେରିକୀୟ ଖବରକାଗଜ ଓ୍ବାଶିଂଟନ ପୋଷ୍ଟ ସାଟେଲାଇଟ୍‌ ଚିତ୍ର ସାହାଯ୍ୟରେ ଭାରତୀୟ ବାୟୁସେନା ଦ୍ୱାରା ହୋଇଥିବା କ୍ଷୟକ୍ଷତିର ଆକଳନ କରିଛି।

ଓ୍ବାଶିଂଟନ ପୋଷ୍ଟର ଏକ ବିଶ୍ଳେଷଣ ଅନୁଯାୟୀ, ଶନିବାର ପାକିସ୍ତାନ ଉପରେ ଭାରତୀୟ ଆକ୍ରମଣ ଅତି କମରେ ୬ଟି ବିମାନବନ୍ଦରର ରନଓ୍ବେ ଏବଂ ଗଠନକୁ କ୍ଷତିଗ୍ରସ୍ତ କରିଛି। ବିଶେଷଜ୍ଞଙ୍କ ମତରେ, ଦକ୍ଷିଣ ଏସୀୟ ପ୍ରତିଦ୍ୱନ୍ଦ୍ୱୀମାନଙ୍କ ମଧ୍ୟରେ ଦଶନ୍ଧି ଧରି ଚାଲିଥିବା ସଂଘର୍ଷ ମଧ୍ୟରେ ଏହା ସବୁଠାରୁ ବଡ଼ ଆକ୍ରମଣ। ଏହି ଯୁଦ୍ଧ ପରେ ଭାରତୀୟ ବାୟୁସେନାକୁ ସବୁଠି ପ୍ରଶଂସା କରାଯାଉଛି। ଆପଣଙ୍କୁ କହିରଖୁଛୁ ଯେ, ପାକିସ୍ତାନୀ ଆକ୍ରମଣର ଜବାବରେ ଭାରତୀୟ ସେନା ଦ୍ୱାରା ଏହି ଆକ୍ରମଣ କରାଯାଇଥିଲା। ଭାରତୀୟ ସୁରକ୍ଷା ମନ୍ତ୍ରଣାଳୟ କହିଛି, ପାକିସ୍ତାନର ଏହି ଆକ୍ରମଣଗୁଡ଼ିକୁ ଭାରତୀୟ ବାୟୁ ପ୍ରତିରକ୍ଷା ପଣ୍ଡ କରିଥିଲା।

ସାଟେଲାଇଟ ଚିତ୍ରରେ ସାମ୍ନାକୁ ଆସିଲା ପାକିସ୍ତାନର ଅନେକ ଗୁପ୍ତ ତଥ୍ୟ …
ଆକ୍ରମଣ ପରେ ଦୁଇ ଡଜନରୁ ଅଧିକ ସାଟେଲାଇଟ ଚିତ୍ର ଏବଂ ଭିଡିଓ ସମୀକ୍ଷାରୁ ଜଣାପଡିଛି ଯେ, ଆକ୍ରମଣରେ ପାକିସ୍ତାନ ବାୟୁସେନା ଦ୍ୱାରା ବ୍ୟବହୃତ ତିନୋଟି ହ୍ୟାଙ୍ଗର, ଦୁଇଟି ରନୱେ ଏବଂ ଦୁଇଟି ମୋବାଇଲ କୋଠାକୁ ପ୍ରବଳ କ୍ଷତି ପହଞ୍ଚାଇଛି। ଭାରତ ଦ୍ୱାରା ଟାର୍ଗେଟ କରାଯାଇଥିବା କିଛି ସ୍ଥାନ ପାକିସ୍ତାନ ଭିତରେ ୧୦୦ ମାଇଲ ପର୍ଯ୍ୟନ୍ତ ଥିଲା। ଏଥିରୁ ଅନୁମାନ କରାଯାଇପାରେ ଯେ, ଯଦି ଯୁଦ୍ଧ ଆଉ କିଛି ଦିନ ଜାରି ରହିଥାନ୍ତା, ତେବେ ପାକିସ୍ତାନର ଅନେକ ବଡ଼ ସହର ଧ୍ୱଂସ ପାଇଯାଇଥାନ୍ତା।

ଯୁଦ୍ଧବିରତି ପରେ ପାକିସ୍ତାନ ସରକାର ନିଜ ଲୋକଙ୍କୁ ଭ୍ରମିତ କରୁଛି। ଅସ୍ତ୍ରବିରତି ପରେ, ପାକିସ୍ତାନରେ ବିଜୟ ଉତ୍ସବ ପାଳନ କରାଯାଉଛି। କିନ୍ତୁ ଶେହବାଜ ସରକାରଙ୍କ ମିଛ ଅଧିକ ସମୟ ପର୍ଯ୍ୟନ୍ତ ଚାଲିପାରିଲା ନାହିଁ ଏବଂ ଏବେ ଭାରତୀୟ ଗଣମାଧ୍ୟମ ସହିତ ଆମେରିକୀୟ ଗଣମାଧ୍ୟମ ମଧ୍ୟ ଏହାକୁ ପର୍ଦ୍ଦାଫାସ କରିବା ଆରମ୍ଭ କରିଛି।

ଆପଣଙ୍କୁ କହିରଖୁଛୁ ଯେ, ଏହି ଲଢ଼େଇ ପହଲଗାମ ଆକ୍ରମଣ ପରେ ଭାରତ ଦ୍ୱାରା କରାଯାଇଥିବା ‘ଅପରେଶନ ସିନ୍ଦୂର’ ପରେ ଆରମ୍ଭ ହୋଇଥିଲା, ଯେଉଁଥିରେ ଭାରତ ୯ଟି ଆତଙ୍କବାଦୀ ଆଡ୍ଡାକୁ ଟାର୍ଗେଟ କରିଥିଲା ଏବଂ ପ୍ରାୟ ୧୦୦ ଆତଙ୍କବାଦୀଙ୍କୁ ହତ୍ୟା କରିଥିଲା।

The post ବିଦେଶୀ ଗଣମାଧ୍ୟମରେ ଧରାପଡ଼ିଲା ପାକିସ୍ତାନର ମିଛ, ସାମ୍ନାକୁ ଆସିଲା ଅନେକ ଗୁପ୍ତ ତଥ୍ୟ appeared first on Dharitri Odia News.