ବିନା ଶାଢିରେ ଦେବୀ ସରସ୍ୱତୀଙ୍କ ମୂର୍ତିକୁ ନେଇ ହଙ୍ଗାମା, ସ୍ଥିତି ବିଗିଡିବାରୁ ମୁଣ୍ଡ ନୁଆଁଇଲା କର୍ତୃପକ୍ଷ

ଅଗରତାଲା: ତ୍ରିପୁରାର ଏକ ସରକାରୀ କଲେଜରେ ବସନ୍ତ ପଂଚମୀ ଉତ୍ସବ ହଙ୍ଗାମା ଓ ଉପଦ୍ରବରେ ପରିଣତ ହୋଇଛି । ଏଠାରେ ଉତ୍ସବରେ ଦେବୀ ସରସ୍ୱତୀଙ୍କ ଯେଉଁ ମୂର୍ତିର ପୂଜା କରାଯାଉଥିଲା, ସେଥିରେ ଶାଢି ପିନ୍ଧା ଯାଇ ନ ଥିଲା । ଏହାକୁ ଅଶ୍ଳୀଳ ଓ ଆପତିଜନକ ଦର୍ଶାଇ ଛାତ୍ର ସଂଗଠନ ଏବିଭିପି ଓ ବଜରଙ୍ଗ ଦଳର କାର୍ଯ୍ୟକର୍ତା ଖୁବ୍ ହଙ୍ଗାମା କରିଛନ୍ତି । ଏହି ବିବାଦ ତେବେ ବଡ ରୂପ ନେଇଥିଲା ଯେତେବେଳେ ମୂର୍ତିର ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ୍ ହୋଇଥିଲା । ଦେବୀ ସରସ୍ୱତୀଙ୍କୁ ବିନା ପାରମ୍ପରିକ ଶାଢୀରେ ଦେଖିବାକୁ ମିଳିଥିଲା । ଏହା ଦେଖି ଛାତ୍ର ସଂଗଠନ ଉତକ୍ଷୀପ୍ତ ହୋଇ ଉଠିଥିଲେ । ଆଉ ସେମାନଙ୍କ ସମର୍ଥନରେ ଆଗେଇ ଆସିଥିଲେ ଏବିଭିପି ଓ ବଜରଙ୍ଗ ଦଳର କାର୍ଯ୍ୟକର୍ତା ।

ତ୍ରିପୁରାର ଏବିଭିପିର ସାଧାରଣ ସଂପାଦକ ଦିବାକର ଆଚାର୍ଯ୍ୟ କହିଛନ୍ତି, ଏହି ରୂପରେ ଦେବୀ ସରସ୍ୱତୀଙ୍କୁ ପୂଜା କରିବା ବହୁତ ଆପତିଜନକ । ପୂରା ଦେଶରେ ଦେବୀ ସରସ୍ୱତୀଙ୍କୁ ପୂଜା କରାଯାଏ । ବିଶେଷ କରି ବସନ୍ତ ପଂଚମୀରେ ଦେବୀଙ୍କ ପୂଜା ଧୂମଧାମର ସହ କରାଯାଏ । ତେବେ ଗଭର୍ଣ୍ଣମେଂଟ ଆର୍ଟ ଆଣ୍ଡ କ୍ରାଫ୍ଟ କଲେଜରେ ଯେଉଁ ମୂର୍ତିର ପୂଜା କରାଯାଉଥିଲା ତାହା ଆପତିଜନକ ଥିଲା । ତାହା ସଭିଙ୍କୁ ବ୍ୟଥିତ କରିଥିଲା ।

ଏହା ପରେ ଅଗରତାଲା ସ୍ଥିତ କଲେଜ ବାହାରେ କାର୍ଯ୍ୟକର୍ତାଙ୍କ ଭିଡ ଜମିଥିଲା ଓ ପ୍ରଦର୍ଶନ ଜୋର ଧରିଥିଲା । ତ୍ରିପୁରାର ମୁଖ୍ୟମନ୍ତ୍ରୀ ମାନିକ ଶାହଙ୍କୁ ମାମଲାରେ କାର୍ଯ୍ୟାନୁଷ୍ଠାନ ନେବାକୁ ଦାବି କରାଯାଇଛି । କଲେଜକୁ କଡା ଶବ୍ଦରେ ନିନ୍ଦା କରାଯାଇଛି । ମାମଲା ବଢୁଥିବା ଦେଖି କଲେଜ କର୍ତୃପକ୍ଷ ବ୍ୟାକଫୁଟକୁ ଆସିଛନ୍ତି । କର୍ତୃପକ୍ଷ କହିଛି, କୌଣସି ଧାର୍ମିକ ଭାବନାକୁ ଆଘାତ ଦେବା ଆମର ଉଦ୍ଦେଶ୍ୟ ନ ଥିଲା । କଲେଜ ପ୍ରଶାସନ ତୁରନ୍ତ ଉକ୍ତ ମୂର୍ତିକୁ ହଟାଇ ଉକ୍ତ ସ୍ଥାନକୁ ପ୍ଲାଷ୍ଟିକରେ ଘୋଡା ଯାଇଛି । ପୂଜା ସ୍ଥଳରେ ନୂତନ ମୂର୍ତି ରଖାଯାଇଛି ।

The post ବିନା ଶାଢିରେ ଦେବୀ ସରସ୍ୱତୀଙ୍କ ମୂର୍ତିକୁ ନେଇ ହଙ୍ଗାମା, ସ୍ଥିତି ବିଗିଡିବାରୁ ମୁଣ୍ଡ ନୁଆଁଇଲା କର୍ତୃପକ୍ଷ appeared first on Odisha.News.