ବିମାନ ଯାତ୍ରୀଙ୍କ ପାଇଁ ଖୁସି ଖବର ! ପୁଣି ଖୋଲିଲା ବନ୍ଦ ହୋଇଥିବା ଦେଶର ୩୨ ଏୟାରପୋର୍ଟ

ନୂଆଦିଲ୍ଲୀ: ବିମାନ ଯାତ୍ରୀମାନଙ୍କ ପାଇଁ ଖୁସି ଖବର। ଭାରତ ଏବଂ ପାକିସ୍ତାନ ମଧ୍ୟରେ ସାମରିକ ଉତ୍ତେଜନା ଯୋଗୁଁ ବନ୍ଦ ହୋଇଥିବା ଦେଶର ୩୨ଟି ବିମାନବନ୍ଦରକୁ ପୁଣି ଥରେ ଉଡ଼ାଣ ପାଇଁ ଖୋଲାଯାଇଛି। ସୋମବାର ଏକ ପ୍ରେସ୍ ବିଜ୍ଞପ୍ତିରେ ଭାରତୀୟ ବିମାନବନ୍ଦର କର୍ତ୍ତୃପକ୍ଷ (AAI) ଏହି ସୂଚନା ଦେଇଛନ୍ତି। ତତ୍କାଳ ଏହି ବିମାନବନ୍ଦରଗୁଡ଼ିକରେ ବିମାନ ଚଳାଚଳ ପୁନଃ ଆରମ୍ଭ କରିବା ପାଇଁ ଆନୁଷ୍ଠାନିକ ଭାବରେ ଘୋଷଣା କରିଛି ଏଏଆଇ।

ଭାରତ ଏବଂ ପାକିସ୍ତାନ ମଧ୍ୟରେ ସାମରିକ ସଂଘର୍ଷ ଯୋଗୁଁ ଶ୍ରୀନଗର ଏବଂ ଅମୃତସର ଭଳି ପ୍ରମୁଖ ବିମାନବନ୍ଦର ସମେତ ଦେଶର ଉତ୍ତର ଏବଂ ପଶ୍ଚିମ ଭାଗରେ ଅବସ୍ଥିତ ୩୨ଟି ବିମାନବନ୍ଦରରୁ ବେସାମରିକ ବିମାନ ଚଳାଚଳକୁ ମେ ୯ ରୁ ମେ ୧୫ ପର୍ଯ୍ୟନ୍ତ ଅସ୍ଥାୟୀ ଭାବରେ ସ୍ଥଗିତ ରଖାଯାଇଥିଲା।

ଭାରତୀୟ ବିମାନବନ୍ଦର କର୍ତ୍ତୃପକ୍ଷ (AAI) ଏବଂ ଅନ୍ୟାନ୍ୟ ବିମାନ ଚଳାଚଳ କର୍ତ୍ତୃପକ୍ଷ ଏହି ବିମାନବନ୍ଦରଗୁଡ଼ିକୁ ଅସ୍ଥାୟୀ ଭାବରେ ବନ୍ଦ କରିବା ବିଷୟରେ ସୂଚନା ଦେଇ NOTAM (ବିମାନ କର୍ମଚାରୀଙ୍କୁ ନୋଟିସ୍) ଜାରି କରିଥିଲେ। ଏବେ ପରିସ୍ଥିତିରେ ଉନ୍ନତି ଆସିବା ପରେ ପର୍ଯ୍ୟାୟକ୍ରମେ ଏହି ବିମାନବନ୍ଦରଗୁଡ଼ିକୁ ପୁନଃଖୋଲିବା ପ୍ରକ୍ରିୟା ଆରମ୍ଭ କରାଯାଇଛି।

ଭାରତୀୟ ବିମାନବନ୍ଦର ପ୍ରାଧିକରଣ (AAI)ର ନୋଟିସ ଅନୁଯାୟୀ, ସମସ୍ତ ୩୨ଟି ବନ୍ଦ ବିମାନବନ୍ଦରରେ ବିମାନ ଉଡ଼ାଣ ପୁଣି ଆରମ୍ଭ ହୋଇଛି। ଏହି ବିମାନବନ୍ଦରଗୁଡ଼ିକରେ ଉଦାମପୁର, ଅମ୍ବାଲା, ଅମୃତସର, ଅବନ୍ତୀପୁର, ବଥିଣ୍ଡା, ଭୁଜ, ବିକାନେର, ଚଣ୍ଡିଗଡ଼, ହାଲୱାରା, ହିନ୍ଦନ, ଜମ୍ମୁ ଏବଂ ଜୈସଲମେର, ଜାମନଗର, ଯୋଧପୁର, କାନ୍ଦଲା, କାଙ୍ଗ୍ରା, କେଶୋଡ। ଏହା ବ୍ୟତୀତ ଲୁଧିଆନା, ମୁଣ୍ଡ୍ରା, ନାଲିଆ, ପଠାନକୋଟ, ପଟିଆଲା, ପୋରବନ୍ଦର, ରାଜକୋଟ, ଶିମଲା, ଶ୍ରୀନଗର ଏବଂ ଉତ୍ତରାଖଣ୍ଡରେ ମଧ୍ୟ ଆରମ୍ଭ ହୋଇଛି।