ବିଶ୍ୱର ସବୁଠୁ ଓଜନଦାର ବ୍ୟକ୍ତି: ୬ ମାସ ତଳେ ଓଜନ ଥିଲେ ୬୧୦ କିଲୋ, ଏବେ ଖଲିଦ ହୋଇଯାଇଛନ୍ତି ୬୩

ମୁମ୍ଵାଇ ୧୬।୦୮: ସବୁଠୁ ଓଜନଦାର ବ୍ୟକ୍ତି ଭାବେ ପରିଚିତ ଖଲିଦ ବିନ ମୋହସେନ ଶାରି। ସେ ଏବେ  ୫୪୨ କିଲୋ ଓଜନ କମାଇଛନ୍ତି । ଏଥିପାଇଁ ସାଉଦି ଆରବର ପୂର୍ବତନ ରାଜା ଅବଦୁଲ୍ଲା ତାଙ୍କୁ ଆର୍ଥିକ ସାହାଯ୍ୟ ପ୍ରଦାନ କରିଛନ୍ତି । ୨୦୧୩  ମସିହାରେ, ଖଲିଦଙ୍କ ଓଜନ ଥିଲା ୬୧୦ କିଲୋ । ତାହା ତାଙ୍କ ଜୀବନ  ପ୍ରତି ବଡ଼ ବିପଦ ଥିଲା । ଏଥିପାଇଁ ସେ ଦୀର୍ଘ ୩ ବର୍ଷରୁ ଉଦ୍ଧ୍ୱର୍ ସମୟ ଧରି ବିଛଣାରେ ପଡ଼ି ରହିଥିଲେ । ନିଜର  ଦୈନନ୍ଦିନ କାର୍ଯ୍ୟ ପାଇଁ ମଧ୍ୟ ତାଙ୍କୁ ପରିବାର ଓ ପରିଜନଙ୍କ ଉପରେ ନିର୍ଭର କରିବାକୁ ପଡୁଥିଲା । ତାଙ୍କର ଏହି ଅବସ୍ଥା ଦେଖି ସାଉଦି ରାଜା ଆବଦୁଲ୍ଲା ତାଙ୍କ  ଜୀବନ ବଞ୍ଚାଇବାକୁ ଯୋଜନା କଲେ।

ସେ ଖଲିଦଙ୍କ ପାଇଁ  ମାଗଣାରେ ସର୍ବୋତ୍କୃଷ୍ଟ ଚିକିତ୍ସା ବନ୍ଦୋବସ୍ତ କଲେ । ଖଲିଦଙ୍କୁ  ଜଜାନ ସ୍ଥିତ ନିଜ ଘରୁ ରିୟାଧ ସ୍ଥିତ ଫହାଦ ମେଡିକାଲ  ସିଟିକୁ ଫୋର୍କଲିଫ୍ଟ ଜରିଆରେ ସ୍ୱତନ୍ତ୍ର ରୂପେ ଡିଜାଇନ୍‌   ହୋଇଥିବା ଖଟିଆରେ ନିଆଗଲା । ମେଡିକାଲର ୩୦ ଜଣ  କର୍ମଚାରୀଙ୍କର ଏକ ଟିମ୍‌ ଖଲିଦଙ୍କ ଚିକିତ୍ସା ଓ ଖାଦ୍ୟପେୟ ବ୍ୟବସ୍ଥାରେ ନିୟୋଜିତ ହେଲେ । ଖଲିଦଙ୍କ ଚିକିତ୍ସାରେ ଗ୍ୟାସ୍‌ଟ୍ରିକ ବାଇପାସ୍‌ ସର୍ଜରି, ଅନୁକୂଳ ଖାଦ୍ୟ ଓ   ବ୍ୟାୟାମ ସହିତ ପୁଣି ଥରେ ଚଲାବୁଲା କରିବା ଲାଗି କଠିନ ଶାରୀରିକ  କାର୍ଯ୍ୟକଳାପ ଉପରେ ଧ୍ୟାନ ଦିଆଯାଇଥିଲା । ଅଗ୍ରଣି ମଧ୍ୟପ୍ରାଚ୍ୟ  ବୈଜ୍ଞାନିକଙ୍କ ସମର୍ଥନରେ ଖଲିଦଙ୍କଠାରେ ଚମତ୍କାର ଫଳ ଲକ୍ଷ୍ୟ କରାଗଲା । ଦିନେ ବିଶ୍ୱର ସବୁଠୁ ଓଜନଦାର ଜୀବିତ ବ୍ୟକ୍ତି ତାଲିକାରେ   ସ୍ଥାନ ପାଇଥିବା ଖଲିଦଙ୍କ ଶାରୀରିକ ଗଠନରେ ଉଲ୍ଲେଖଯୋଗ୍ୟ  ପରିବର୍ତ୍ତନ ହେଲା। 

ମାତ୍ର ୬ ମାସରେ ନିଜ ଓଜନର ପ୍ରାୟ ଅଧା ସେ  ହ୍ରାସ କଲେ । ୨୦୨୩ ମସିହା ସୁଦ୍ଧା ଖଲିଦଙ୍କ ଓଜନ ଆଶ୍ଚର୍ଯ୍ୟଜନକ ଭାବେ ୫୪୨  କିଲୋ ହ୍ରାସ ପାଇଥିଲା। ଫଳରେ ତାଙ୍କ ଓଜନ ୬୩.୫ କିଲୋ ହେଲା,  ଯାହା ଜଣେ ସୁସ୍ଥ ବ୍ୟକ୍ତିର ଓଜନ ସହ ସମାନ । ଶାରୀରିକ ପରିବର୍ତ୍ତନ   ଲାଗି ତାଙ୍କୁ ଅନେକ ତ୍ୱଚା ଅପସାରଣ ସର୍ଜରିର ସମ୍ମୁଖୀନ ହେବାକୁ  ପଡ଼ିଥିଲା । ଏହା ଲୋକଙ୍କ ଓଜନ ହ୍ରାସ ପାଇଁ କରାଯାଉଥିବା ଏକ  ସାଧାରଣ ପ୍ରକ୍ରିୟା । ଖଲିଦ ଏବେ ନିଜକୁ ବିଶ୍ୱର ସବୁଠୁ ସୁଖୀ ବ୍ୟକ୍ତି  ବୋଲି କହୁଛନ୍ତି । ତାଙ୍କ ଖୁସି ଦେଖି ମେଡିକାଲ କର୍ମଚାରୀ ତାଙ୍କ ନାଁ  ଦେଇଛନ୍ତି ‘ଦ ସ୍ମାଇଲିଂ ମ୍ୟାନ୍‌’ ।