ବୁମରାଙ୍କ ଟେଷ୍ଟ କ୍ୟାରିୟରର ସବୁଠୁ ଖରାପ ଦିନ...ମାଞ୍ଚେଷ୍ଟର ଟେଷ୍ଟକୁ କେବେ ଭୁଲି ପାରିବେନି

ନୂଆଦିଲ୍ଲୀ: ଯଶପ୍ରୀତ ବୁମରା ୨୦୧୮ରେ ଦକ୍ଷିଣ ଆଫ୍ରିକା ଗସ୍ତରୁ ଟେଷ୍ଟ ଡେବ୍ୟୁ କରିଥିଲେ । ଏହାପରେ ନିଜ ଚମକ ଛାଡ଼ି ଦୁନିଆର ଶ୍ରେଷ୍ଠ ବୋଲରଙ୍କ ମଧ୍ୟରେ ସାମିଲ ହୋଇଥିଲେ । ଆଜିର ସମୟରେ ବୁମରାଙ୍କୁ ଇଣ୍ଟରନ୍ୟାସନାଲ୍ କ୍ରିକେଟରେ ସର୍ବୋତ୍ତମ ବୋଲର ଭାବେ ବିବେଚନା କରାଯାଏ । ସବୁ ଫର୍ମାଟରେ ବ୍ୟାଟର ବୁମରାଙ୍କ ବଲ୍ ଖେଳିବାକୁ ଭୟ କରନ୍ତି । ତେବେ ମାଞ୍ଚେଷ୍ଟର ଟେଷ୍ଟରେ ଇଂଲଣ୍ଡ ବିପକ୍ଷରେ ଯାହା ହୋଇଛି, ତାହା ବୁମରାଙ୍କ କ୍ୟାରିୟରରେ କେବେ ଘଟି ନଥିଲା ।

ଯଶପ୍ରୀତ ବୁମରା ନିଜ ଟେଷ୍ଟ କ୍ୟାରିୟରେ ପ୍ରଥମ ଥର କୌଣସି ଇନିଂସରେ ୧୦୦ ରନ୍ ଦେଇଛନ୍ତି । ସେ ୩୩ ଓଭର ବୋଲିଂ କରି ୧୧୨ ରନ୍ ଖର୍ଚ୍ଚ କରିଛନ୍ତି । ଏହି ଇନିଂସରେ ସେ ୨ ୱିକେଟ୍ ନେଇଥିଲେ । ଏହା ପୂର୍ବରୁ ବୁମରାଙ୍କ ସବୁଠୁ ମହଙ୍ଗା ସ୍ପେଲ୍ ୯୯ ରନ୍ ଥିଲା । ଗତ ବର୍ଷ ଶେଷରେ ଅଷ୍ଟ୍ରେଲିଆ ବିପକ୍ଷରେ ବକ୍ସିଂ ଡେ ଟେଷ୍ଟରେ ବୁମରା ୨୮.୪ ଓଭରରେ ୯୯ ରନ୍ ଦେଇଥିଲେ । ଏହି ଇନିଂସରେ ସେ ଅଷ୍ଟ୍ରେଲିଆର ୪ ୱିକେଟ୍ ନେଇଥିଲେ ।

ଯଶପ୍ରୀତ ବୁମରା ତାଙ୍କ ଟେଷ୍ଟ କ୍ୟାରିୟରରେ କେବଳ ତୃତୀୟ ଥର ପାଇଁ ୩୦ କିମ୍ବା ତା’ଠାରୁ ଅଧିକ ଓଭର ବୋଲିଂ କରିଛନ୍ତି । ୨୦୨୧ରେ ଚେନ୍ନାଇରେ ଇଂଲଣ୍ଡ ବିପକ୍ଷରେ ସେ ୩୬ ଓଭର ବୋଲିଂ କରିଥିଲେ । ମାଞ୍ଚେଷ୍ଟର ଟେଷ୍ଟର ପ୍ରଥମ ଇନିଂସରେ ସେ ୩୩ ଓଭର ବୋଲିଂ କରିଥିଲେ । ୨୦୧୮ରେ ଇଂଲଣ୍ଡ ବିପକ୍ଷରେ ଖେଳାଯାଇଥିବା ଟେଷ୍ଟରେ ସେ ୩୦ ଓଭର ବୋଲିଂ କରିଥିଲେ ।

ମାଞ୍ଚେଷ୍ଟର ଟେଷ୍ଟ ସମୟରେ, ତାଙ୍କୁ ସିଡ଼ି ଚଢ଼ିବାରେ ମଧ୍ୟ ଅସୁବିଧା ହେଉଥିଲା । ଯଶପ୍ରୀତ ବୁମରା ଏହି ସିରିଜର ଶେଷ ମ୍ୟାଚ୍ ଖେଳୁଛନ୍ତି । ଓଭାଲରେ ହେବାକୁ ଥିବା ମ୍ୟାଚ୍ ଖେଳିବେ ନାହିଁ । ସିରିଜ୍ ଆରମ୍ଭ ହେବା ପୂର୍ବରୁ ଘୋଷଣା କରାଯାଇଥିଲା ଯେ ବୁମରା କେବଳ ତିନୋଟି ମ୍ୟାଚ୍ ଖେଳିବେ । ୱାର୍କଲୋଡ୍ ମ୍ୟାନେଜମେଣ୍ଟ ଯୋଗୁଁ ଏହି ନିଷ୍ପତ୍ତି ନିଆଯାଇଥିଲା ।