ଭାରତ ଉପରେ ରାଗିକି ନିଆଁବାଣ ପାକିସ୍ତାନ: କଶ୍ମୀରକୁ ନେଇ କହିଲା ଏମିତି

ଇସଲାମାବାଦ୍‌,୧୯।୪: ପାକିସ୍ତାନ ପିଓକେ (ପାକ ଅଧିକୃତ କଶ୍ମୀର) ଖାଲି କରିବା ଉଚିତ ବୋଲି ଭାରତର ବୟାନ ଉପରେ ପାକିସ୍ତାନ ଅସନ୍ତୋଷ ପ୍ରକାଶ କରିଛି। ପାକିସ୍ତାନର ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତି ଜାରି କରି କହିଛି, ଭାରତର ଏହି ବିବୃତ୍ତି ମିଥ୍ୟା।

ପାକିସ୍ତାନ କହିଛି, ଏପରି ବୟାନ ଦେବା ପରିବର୍ତ୍ତେ, ଭାରତ ସେଠାକାର ଲୋକଙ୍କ ଇଚ୍ଛା ଅନୁଯାୟୀ କଶ୍ମୀର ସମସ୍ୟାର ସମାଧାନ ଖୋଜିବାକୁ ଚେଷ୍ଟା କରିବା ଉଚିତ।

ପାକିସ୍ତାନ ତାର ବିବୃତ୍ତିରେ ଜମ୍ମୁ-କଶ୍ମୀରକୁ ଏକ ବିବାଦୀୟ ଅଞ୍ଚଳ ବୋଲି କହିଛି। ଏହାର ନିଷ୍ପତ୍ତି ଜାତିସଂଘ (ୟୁଏନ)ର ନିଷ୍ପତ୍ତି ଏବଂ କଶ୍ମୀରବାସୀଙ୍କ ମତାମତ ଉପରେ ଆଧାରିତ ହେବା ଉଚିତ। ଜମ୍ମୁ ଏବଂ କଶ୍ମୀର ଏପରି ଏକ ଅଞ୍ଚଳ ଯାହାକୁ ସମଗ୍ର ବିଶ୍ୱ ବିବାଦୀୟ ବୋଲି ବିବେଚନା କରେ ଏବଂ ଏହାର ଚୂଡ଼ାନ୍ତ ନିଷ୍ପତ୍ତି ଜାତିସଂଘର ପ୍ରସ୍ତାବ ଏବଂ କଶ୍ମୀର ଲୋକଙ୍କ ଇଚ୍ଛା ଅନୁସାରେ ହେବା ଉଚିତ।

ପାକିସ୍ତାନ ସେନା ମୁଖ୍ୟ ଜେନେରାଲ ଅସୀମ ମୁନିର କଶ୍ମୀରକୁ ପାକିସ୍ତାନର ‘ବେକ ଶିରା’ ବୋଲି ବର୍ଣ୍ଣନା କରିଥିଲେ। ଭାରତର ବୈଦେଶିକ ମନ୍ତ୍ରଣାଳୟ ଏହାର ଜବାବ ଦେଇଛି। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସ୍ବାଲ କହିଛନ୍ତି, କୌଣସି ବିଦେଶୀ ଜିନିଷ କାହାର ‘ବେକ ଶିରା’ କିପରି ହୋଇପାରେ? ଭାରତର ଆଭ୍ୟନ୍ତରୀଣ ମାମଲାରେ କୌଣସି ବିଦେଶୀ ରାଷ୍ଟ୍ରର କୌଣସି ଅଧିକାର ନାହିଁ। ଜମ୍ମୁ ଏବଂ କଶ୍ମୀର ଭାରତର ଏକ ଅଂଶ ଏବଂ ଏକ କେନ୍ଦ୍ରଶାସିତ ଅଞ୍ଚଳ। ପାକିସ୍ତାନ ସହିତ ଆମର ଏକମାତ୍ର ସମ୍ପର୍କ ହେଉଛି, ସେ ପିଓକେ (ପାକିସ୍ତାନ ଅଧିକୃତ କଶ୍ମୀର) ଖାଲି କରିବା ଉଚିତ, ଯାହାକୁ ସେ ଅବୈଧ ଭାବରେ କବଜା କରିଛି।

The post ଭାରତ ଉପରେ ରାଗିକି ନିଆଁବାଣ ପାକିସ୍ତାନ: କଶ୍ମୀରକୁ ନେଇ କହିଲା ଏମିତି appeared first on Dharitri Odia News.