ମହାକାଶରୁ ଫେରିବେ ସୁନୀତା ଓ ୱିଲମୋର, Spacex ଲଞ୍ଚ କଲା ମିଶନ

ନୂଆଦିଲ୍ଲୀ ୧୫/୦୩: ଶନିବାର ସକାଳେ ସ୍ପେସଏକ୍ସ ଅନ୍ତର୍ଜାତୀୟ ମହାକାଶ ଷ୍ଟେସନ (ISS)କୁ ଏହାର କ୍ରୁ-୧୦ ମିଶନ୍ ଲଞ୍ଚ କରିଛି । ଏହି ମିଶନ୍ ନାସାର ମହାକାଶଚାରୀ ସୁନିତା ୱିଲିୟମ୍ସଙ୍କ ପୃଥିବୀକୁ ଫେରିବା ଦିଗରେ ଏକ ବଡ଼ ପଦକ୍ଷେପ । କ୍ରୁ-୧୦ର ଚାରି ଜଣ ମହାକାଶଚାରୀ ଫସି ରହିଥିବା ସୁନିତା ୱିଲିୟମ୍ସ ଏବଂ ବୁଚ୍ ୱିଲମୋରଙ୍କ ସମେତ କ୍ରୁ-୯ ମହାକାଶଚାରୀଙ୍କୁ ସହାୟତା କରିବେ। 

ସପ୍ତାହର ଆରମ୍ଭରେ ଏହି ଉତ୍‌କ୍ଷେପଣ ହେବାର ଥିଲା, କିନ୍ତୁ ଯାନ୍ତ୍ରିକ ସମସ୍ୟା ଏବଂ ଉତ୍‌କ୍ଷେପଣ କ୍ଷେତ୍ରରେ ପ୍ରବଳ ପବନ ଯୋଗୁଁ ମିଶନରେ ବିଳମ୍ବ ହୋଇଥିଲା । କ୍ରୁ ଡ୍ରାଗନ୍ କ୍ୟାପସୁଲ୍ ବହନ କରୁଥିବା ସ୍ପେସଏକ୍ସ ଫାଲକନ୍ ୯ ରକେଟ୍ ଶନିବାର ଅର୍ଥାତ୍ ମାର୍ଚ୍ଚ ୧୫ ତାରିଖ ଭାରତୀୟ ସମୟ ଭୋର ୪.୩୩ ମିନିଟରେ ଉଡ଼ାଣ ଆରମ୍ଭ କରିଥିଲା। 

ଏହି ମିଶନ୍ ନାସାର ବାଣିଜ୍ୟିକ କ୍ରୁ କାର୍ଯ୍ୟକ୍ରମର ଏକ ଅଂଶ ଏବଂ ଏହା ଚାରି ଜଣ ନୂତନ ମହାକାଶଚାରୀଙ୍କୁ ISSକୁ ଆଣିବ। ଏଥିରେ NASAର ଆନ୍ ମ୍ୟାକକ୍ଲେନ୍ ଏବଂ ନିକୋଲ୍ ଆୟର୍ସ, JAXAର ଟାକୁୟା ଓନିଶି ଏବଂ ରୋସକସମୋସର କିରିଲ୍ ପେସକୋଭ୍ ସାମିଲ ଅଛନ୍ତି। ଫ୍ଲୋରିଡା ଉପକୂଳରେ ପାଗ ଅନୁକୂଳ ରହିବାକୁ ହେଲେ, କ୍ରୁ-୯ ଦଳ ବୁଧବାର, ମାର୍ଚ୍ଚ ୧୯ ପୂର୍ବରୁ ISS ଛାଡିବ ବୋଲି ଆଶା କରାଯାଉଛି। 

Dragon has separated from Falcon 9’s second stage pic.twitter.com/h3Mf9Q3s81— SpaceX (@SpaceX) March 14, 2025

ଆପଣଙ୍କୁ କହି ରଖୁଛୁ ଯେ ଜୁନ୍ ୨୦୨୪ ରେ ଉଡ଼ାଣ ହୋଇଥିବା ବୋଇଂ ଷ୍ଟାରଲାଇନର୍ ମହାକାଶଯାନରେ ସମସ୍ୟା ଯୋଗୁଁ ସୁନୀତା ୱିଲିୟମ୍ସ, ବୁଚ୍ ୱିଲମୋରଙ୍କ ସହିତ ଦୀର୍ଘ ସମୟ ଧରି ISSରେ ରହିଥିଲେ।

ମସ୍କଙ୍କୁ ଦାୟିତ୍ୱ ଦେଇଥିଲେ ଟ୍ରମ୍ପ:

ଦାୟିତ୍ୱ ଗ୍ରହଣ କରିବା ପରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଉଭୟ ମହାକାଶଚାରୀଙ୍କୁ ପୃଥିବୀକୁ ଫେରାଇ ଆଣିବାର ଦାୟିତ୍ୱ ଏଲୋନ ମସ୍କଙ୍କୁ ଦେଇଥିଲେ। ସେ ମସ୍କଙ୍କୁ ଯଥାଶୀଘ୍ର ଉଭୟ ମହାକାଶଚାରୀଙ୍କୁ ପୃଥିବୀକୁ ଫେରାଇ ଆଣିବାକୁ କହିଥିଲେ।

ସୁନିତା ୱିଲିୟମ୍ସ ଗତ ବର୍ଷ ଜୁନ୍ ୫ ତାରିଖରେ ଅନ୍ତର୍ଜାତୀୟ ମହାକାଶ ଷ୍ଟେସନକୁ ଯାଇଥିଲେ। 

ତାଙ୍କର ଗୋଟିଏ ସପ୍ତାହ ପରେ ଫେରିବାର ଥିଲା, କିନ୍ତୁ ବୋଇଂ ଷ୍ଟାରଲାଇନରରେ ସମସ୍ୟା ଯୋଗୁଁ ସେ ସେଠାରେ ଫସି ରହିଲେ। ଉଭୟ ମହାକାଶଚାରୀ ବୋଇଂ ଏବଂ ନାସାର ମିଳିତ କ୍ରୁ ଫ୍ଲାଇଟ୍ ଟେଷ୍ଟ ମିଶନରେ ମହାକାଶକୁ ଯାଇଥିଲେ।