ଯେଉଁ ଝିଅକୁ ବାହା ହେବାକୁ ଚାହୁଁଥିଲା ମା ମନା କଲାରୁ ଜୀବନ ନେଇଗଲା ପୁଅ

ଇଏ ପୋଲିସ୍ ପାଖରେ ଜଣେ ପୁଅର ବୟାନ୍ । ଯେଉଁ ଝିଅକୁ ସେ ଭଲ ପାଉଥିଲା ଆଉ ବାହା ହେବାକୁ ଚାହୁଁଥିଲା ମାଆ ସେଥିରେ ରାଜି ହେଲାନି । ତେଣୁ କ୍ଷଣିକରେ ମାଆର ସ୍ନେହ ଭୁଲିଗଲା ଆଉ ସାଜିଲା ମାଆର ହତ୍ୟାକାରୀ । ଏଭଳି ଏକ ଛାତି ଥରାଇ ଦେଲା ଭଳି ଘୃଣ୍ୟ ଘଟଣା ଘଟିଛି ରାଜଧାନୀ ଦିଲ୍ଲୀରେ । ଦିଲ୍ଲୀର ଖ୍ୟାଲା ଥାନା ଅନ୍ତର୍ଗତ ରଘୁବୀର ନଗରରେ ଘଟିଛି ଏଭଳି ମର୍ମାନ୍ତିକ ଘଟଣା । ଗତ ଶୁକ୍ରବାର ରାତି ପ୍ରାୟ ୮.୩୦ ବେଳକୁ ଥାନାକୁ ଫୋନ୍ ଆସିଲା । ଏଥିରେ ସାବନ ନାମକ ଜଣେ ବ୍ୟକ୍ତି କହିଲା କି ଡକାୟତମାନେ ମୋ ମାଆକୁ ମାରି ଦେଇଛନ୍ତି । ଆଉ ମାଆର କାନଫୁଲ ଲୁଟି ନେଇଛନ୍ତି ।

ଖବର ପାଇ ତୁରନ୍ତ ପୋଲିସ୍ ଘଟଣା ସ୍ଥଳରେ ପହଞ୍ଚିଥିଲା । ହେଲେ ପାରିପାର୍ଶ୍ବିକ ପରିସ୍ଥିତି ଦେଖି ଲାଗିଲାନି କି ଡକାୟତି ହୋଇଛି । କାରଣ ଘରର ଅନ୍ୟ ସବୁ ଜିନିଷ ଠିକଠାକ୍ ଥିଲା । ତେବେ ପୋଲିସ ଏହି ଘଟଣାରେ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଦେଲା । ପରିବାର ଲୋକ ଏବଂ ପଡ଼ୋଶୀଙ୍କୁ ପଚରା ଉଚରା କଲା । ପୁଣି ଘଟଣା ପଛର କାରଣକୁ ଭଲ ଭାବେ ତର୍ଜମା କଲା । ଏହି ସମୟରେ ମୃତ ମହିଳାଙ୍କ ସାନ ପୁଅ ସାବନର ଆଚରଣ ସନ୍ଦେହଜନକ ଲାଗିଲା । ତା କଥାବାର୍ତ୍ତାରେ ତାଳମେଳ ରହିଲା ନାହିଁ । ତେଣୁ ପୋଲିସ୍ ତାକୁ ପଚରା ଉଚରା କଲା । ପ୍ରଥମେ ତ ସାବନ୍ ମିଛ କହିଲା ତେବେ ପୋଲିସ୍ ଯେତେବେଳେ ନାଲି ଆଖି ଦେଖାଇଲା ସେତେବେଳେ ସବୁ ମାନିଗଲା ସାବନ୍ ।

ରଘୁବୀର ନଗରରେ ରହୁଥିବା ସୁଲୋଚନା ନାମ୍ନୀ ଏହି ମହିଳାଙ୍କ ସ୍ବାମୀ ସେନାରେ ଜଣେ ଲେଫ୍ଯନାଣ୍ଟ ଥିଲେ । ୨୦୧୯ରେ ତାଙ୍କର ପରଲୋକ ହୋଇ ଯାଇଥିଲା । ସୁଲୋଚନା ଦୁଇ ପୁଅଙ୍କ ସହ ରହୁଥିଲେ । ତାଙ୍କ ବଡ଼ ପୁଅର କପିଲର ବାହାଘର ଠିକ୍ ହୋଇ ଯାଇଥିଲା । ୨୬ ବର୍ଷୀୟ କପିଲ ଏକ କମ୍ପାନୀରେ ଆକାଉଣ୍ଟାଣ୍ଟ ଭାବରେ କାମ କରେ । ଆଉ ୨୨ ବର୍ଷ ବୟସ୍କ ସାନ ପୁଅ ମାଲବୁହା ଗାଡ଼ି ଚଲାଏ । ବଡ଼ଭାଇର ବାହାଘର ଠିକ୍ ହେବା ପରେ ସାବନ ମାଆକୁ କହିଲା କି ସେ ଗୋଟେ ଝିଅକୁ ପସନ୍ଦ କରିଛି ତାକୁ ବାହା ହେବ । ହେଲେ ମାଆ ଏଥିରେ ରାଜିତ ହେଲେ ନାହିଁ ଓଲଟଣା ସାବନକୁ ଗାଳିମନ୍ଦ କଲେ । ପୁଅ ଯେତେ ବୁଝାଇଲା କିଛି ଫରକ ପଡ଼ିଲାନି । ଆହୁରି ମଧ୍ୟ ମାଆ ସୁଲୋଚନା ତାକୁ ଧମକ ଦେଲେ ଯେ ଯଦି ସେ ଝିଅକୁ ତୁ ବାହା ହେଉ ତାହାହେଲେ ତତେ ସମ୍ପତ୍ତିରୁ ବେଦଖଲ କରି ଦେବି । ତେଣୁ ସାବନ୍ ପୂରା ରାଗି ଗଲା । ଜନ୍ମକଲା ମାଆ ପ୍ରତି ତାର ରାଗ ଓ ଘୃଣା ଏତେ ବଢ଼ିଗଲା ଯେ ତାଙ୍କୁ ମାରି ଦେବା ପାଇଁ ଯୋଜନା କଲା । ଏହାପରେ ମାଆକୁ ଛୁରୀ ମାରି ହତ୍ୟା କରିଥିଲା । ତାଙ୍କ କାନରୁ କାନଫୁଲ ଛିଡ଼ାଇ ନେଇଥିଲା । ଆଉ ଘଟଣାକୁ ଡକାୟତିର ରୂପ ଦେବାକୁ ଚେଷ୍ଟା କରିଥିଲା ମାତୃହନ୍ତା । ହେଲେ ସାବନ ପେସାଦାର ଅପରାଧୀ ନଥିବାରୁ ଖୁବ୍ ଶୀଘ୍ର ପୋଲିସ୍ ଆଗରେ ସତ ମାନିଗଲା ।

ସାବନର କହିବା କଥା କି ସେ ଯାହା ରୋଜଗାର କରେ ସବୁ ଆଣି ମାଆକୁ ଦେଇଦିଏ । ତେଣୁ ଯେତେବେଳେ ତା କଥାରେ ମାଆ ରାଜି ହେଲେନି ତାକୁ ବହୁତ ବାଧିଲା ବୋଲି ସେ କହିଛି । ଏହାପରେ ମାଆକୁ ରାସ୍ତାରୁ ସଫା କରି ଦେବାକୁ ଯୋଜନା ବନାଇଲା ପାଷାଣ୍ଡ ପୁଅ । ଗତ ଶୁକ୍ରବାର ଦିନ ପ୍ରାୟ ଅପରାହ୍ନ ସାଢ଼େ ୪ଟା ପରେ ବଡ଼ ଭାଇ ଅଫିସରେ ଥିଲା ବେଳେ ମାଆକୁ ହତ୍ୟା କରିଥିଲା ସାବନ୍ । ହେଲେ କ୍ଷଣିକ ରାଗ ଏବଂ ଉତ୍ତେଜନାରେ ଯେଉଁ କାଣ୍ଡ ଘଟାଇଲା ମାତୃ ହତ୍ୟାକାରୀ ପୁଅ ଏବେ ଜୀବନ ସାରା ଜେଲରେ ସଢ଼ିବ । … ଦୁଇଦିନ ତଳେ ଦିଲ୍ଲୀର ନେବ୍ ସରାଇ ଅଞ୍ଚଳରେ ଗୋଟିଏ ୨୦ ବର୍ଷର ପୁଅ ତାର ବାପା ମାଆ ଓ ଭଉଣୀକୁ ହତ୍ୟା କରିଥିଲା ।… ସତରେ କିଭଳି ଅଘଟଣ ସବୁ ଘଟାଉଛନ୍ତି ଆମ ଯୁବ ପିଢ଼ି । ଭାବିଲେ ଛାତି ଥରି ଉଠୁଛି ।

The post ଯେଉଁ ଝିଅକୁ ବାହା ହେବାକୁ ଚାହୁଁଥିଲା ମା ମନା କଲାରୁ ଜୀବନ ନେଇଗଲା ପୁଅ appeared first on KNews Odisha.