ରଙ୍ଗର ପର୍ବ ହୋଲି, ଉତ୍ସବ ମୁଖରେ ସାରା ଓଡିଶା

ଭୁବନେଶ୍ୱର ୨୬।୦୩ : ଆଜି ହେଉଛି ରଙ୍ଗର ପର୍ବ ହୋଲି । ଗାଁଠୁ ସହର ସବୁଠି ଚାଲିଥାଏ ରଙ୍ଗର ଖେଳ । ଜଣେ ଜଣଙ୍କ ରଙ୍ଗ ବୋଳି ଦିଅନ୍ତି ହୋଲି ଶୁଭେଚ୍ଛା । ଅବିର ଓ ରଙ୍ଗର ତାଳେ ତାଳେ ସଭିଙ୍କ ମନରେ ଖେଳିଯାଏ ଆନନ୍ଦ ଉଲ୍ଲାସ । 

ତେବେ ହୋଲିରେ କିଛି ଅଘଟଣ ରୋକିବାକୁ ପୋଲିସ ଓ  ଅଗ୍ନିଶମ ବାହନୀ ପୁରା ସଜାଗ । ଭୁବନେଶ୍ୱରର ସମସ୍ତ ଥାନା ଅଞ୍ଚଳରେ ବ୍ୟାପକ ପୋଲିସ ଫୋର୍ସ ମୁତୟନ ରହିବେ । ହୋଲିରେ ଅମାନିଆଙ୍କୁ ସାବାଡ କରିବାକୁ ପ୍ରସ୍ତୁତ ରହିଛନ୍ତି । ହୋଟେଲରେ ହୋଲି ପାର୍ଟି ଉପରେ ରହିବ କମିଶନରେଟ୍ ପୋଲିସର ତୀକ୍ଷ୍ନ  ନଜର ।  ରାସ୍ତାରେ ପାଟ୍ରୋଲିଂକୁ ବଢ଼ାଯିବ ।   ଡିଏସପି ରାଙ୍କର ଅଧିକାରୀ ନେତୃତ୍ୱରେ ଟିମ୍ ଗଠନ ହୋଇଛି ।  ଭୁବନେଶ୍ୱରରେ ୧୫ ପ୍ଲାଟୁନ ପୋଲିସ ଫୋର୍ସ ମୁତୟନ ହେବେ ବୋଲି ସିପି ସଞ୍ଜୀବ ପଣ୍ଡା  କହିଛନ୍ତି । 

ସେପଟେ ରାଜଧାନୀ ଉପକଣ୍ଠ ନଦୀ ଗୁଡିକରେ ମୁତୟନ ହେବ ଅଗ୍ନିଶମ କର୍ମଚାରୀ । ୫ଟି ସ୍ଥାନରେ ଥିବା ଗାଧୁଆ ତୁଠରେ ମୁତୟନ ହେବେ ଲାଇଫ ବୟ । ଲାଇଫ ଜ୍ୟାକେଟ, ମେସିନ ରବର୍ ବୋଟ୍ ରଖି କର୍ମଚାରୀ ରହିବେ । କୁଆଖାଇ, ଦୟା, ଧଉଳି ପୁରୀ କେନାଲ, ବାଲିପାଟଣା, ବାଲିଅନ୍ତା ବାଙ୍କୁଆଳ ନଦୀ ଭଳି ୫ଟି ନଦୀର ପ୍ରତି ତୁଠରେ ୬ଜଣ ଲେଖାଏଁ ଅଗ୍ନିଶମ କର୍ମଚାରୀ ମୁତୟନ ରହିବେ ବୋଲି ଡେପୁଟି ଫାୟର ଅଫିସର ଅବନୀ କୁମାର ସ୍ୱାଇଁ କହିଛନ୍ତି ।

ଲିଙ୍ଗରାଜ ସ୍ଥିତ ବିନ୍ଦୁସାଗରେ ଓଡ୍ରାଫ ଟିମ୍ ମୁତୟନ ହେବେ । ହୋଲି ରଙ୍ଗରେ  ଗାଧୋଇବାକୁ ଯାଉଥିବା ଲୋକଙ୍କ ପାଇଁ ଲଗାଯାଇଛି ସର୍ତକ ସୂଚନା ଫଳକ । ବିଭିନ୍ନ ସ୍ଥାନରେ ହେଉଥିବା ଇଭେଣ୍ଟ ଗୁଡ଼ିକରେ ନଜର ରଖିବ ପୋଲିସ । ହୋଲିରେ ଯୁବତୀ ମାନଙ୍କୁ କମେଣ୍ଟ କିମ୍ବା ଅସଦାଚରଣ ଘଟଣାକୁ ରୋକିବା ପାଇଁ ଟିମ୍ ଗଠନ ହୋଇଛି ।

ସେପଟେ କଟକରେ ହୋଲି ବେଳେ ଶାନ୍ତିଶୃଙ୍ଖଳା ରକ୍ଷା ପାଇଁ କମିଶନରେଟ ପୋଲିସର ବ୍ୟାପକ ପ୍ରସ୍ତୁତି କରାଯାଇଛି । ସହରକୁ ଜଗିବେ ୧୫ ପ୍ଲାଟୁନ ପୋଲିସ ଫୋର୍ସ । ସହରରେ ବୁଲିବ ବାଇକ୍ ପିସିଆର । ରାସ୍ତା ଅବରୋଧ କରି ରଙ୍ଗ ଖେଳିଲେ କାର୍ଯ୍ୟାନୁଷ୍ଠାନ ହେବ । ନିଶା ସେବନ ଓ ବେଆଇନ ନିଶା କାରବାର ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କଟକ ଡିସିପି ଡକ୍ଟର କନୱର ବିଶାଲ ସିଂ କହିଛନ୍ତି । ନିଶା ସେବନ କରି ରଙ୍ଗର ପର୍ବ ହୋଲି ନ ଖେଳିବାକୁ ପରାମର୍ଶ ଦେଇଛି ପୋଲିସ ଯାହା ଫଳରେ ଅଘଟଣ ରୋକା ଯାଇପାରିବ ।