ରାଜ୍ୟ ସଭାରେ ମୋଦିଙ୍କ ଭାଷଣ ସମୟରେ ଗୃହ ତ୍ୟାଗ କଲେ ବିରୋଧୀ, ପଛରୁ ମୋଦି କହିଲେ…

ନୂଆଦିଲ୍ଲୀ,୩।୭: ରାଷ୍ଟ୍ରପତିଙ୍କ ଅଭିଭାଷଣରେ ଧନ୍ୟବାଦ ଅର୍ପଣ ଉପରେ ବୁଧବାର ରାଜ୍ୟ ସଭାରେ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ ମୋଦି। ଗୋଟିଏ ଦିନ ପୂର୍ବରୁ ସେ ଲୋକସଭାରେ ଧନ୍ୟବାଦ ଅର୍ପଣ ଉପରେ ଆଲୋଚନା କରିଥିଲେ। ରାଜ୍ୟସଭାରେ ମୋଦି କହିଛନ୍ତି, ତୃତୀୟ ଥର ପାଇଁ ସୁଯୋଗ ପାଇବା ଐତିହାସିକ। ଏମପିମାନେ ଗୃହର ସମ୍ମାନ ବୃଦ୍ଧି କରିଛନ୍ତି।

ରାଜ୍ୟ ସଭାରେ ଧନ୍ୟବାଦ ଅର୍ପଣ ଉପରେ ପ୍ରଧାନମନ୍ତ୍ରୀ କଂଗ୍ରେସ ଉପରେ କଡ଼ା ଆକ୍ରମଣ କରିଛନ୍ତି। ଏହି ସମୟରେ ସେ କହିଛନ୍ତି, ଯେଉଁମାନେ ସମ୍ବିଧାନର ଏକ ନକଲ ସହିତ ଡେଉଁଛନ୍ତି ସେମାନେ ସମ୍ବିଧାନ ଦିବସ ପାଳନ ଉପରେ ବିରୋଧ କରୁଛନ୍ତି। ମୋଦିଙ୍କ ଏହି ମନ୍ତବ୍ୟରେ ବିରୋଧୀ ଏମପିମାନେ ହଙ୍ଗାମା କରିଥିଲେ। ଏହାପରେ ବିରୋଧୀଦଳ ଏମପିମାନେ କକ୍ଷ ତ୍ୟାଗ କରିଥିଲେ।

ବିରୋଧୀଙ୍କ କକ୍ଷ ତ୍ୟାଗ ସମୟରେ ମୋଦି କହିଛନ୍ତି, ଦେଶ ଦେଖୁଛି ଯେ ମିଥ୍ୟା ପ୍ରଚାର କରୁଥିବା ବ୍ୟକ୍ତିଙ୍କ ପାଖରେ ସତ ଶୁଣିବାକୁ ମଧ୍ୟ ଶକ୍ତି ନାହିଁ। ନିଜେ ଉଠାଇଥିବା ପ୍ରଶ୍ନର ଉତ୍ତର ଶୁଣିବାକୁ ସାହସ ମଧ୍ୟ କରୁ ନାହାନ୍ତି। ବିରୋଧୀମାନେ ରାଜ୍ୟ ସଭାକୁ ଅପମାନ କରୁଛନ୍ତି। ଦେଶର ଲୋକମାନେ ସେମାନଙ୍କୁ (ବିରୋଧୀ) ଏପରି ପରାଜିତ କରିଛନ୍ତି ଯେ ରାସ୍ତାରେ ଚିତ୍କାର କରିବା ଛଡା ସେମାନଙ୍କର ଆଉ କିଛି ବାଟ ନାହିଁ। ନାରାବାଜି କରିବା, ଉତ୍ତେଜନା କରିବା ଏବଂ ମଇଦାନ ଛାଡି ପଳାୟନ କରିବା ସେମାନଙ୍କ ଭାଗ୍ୟରେ ଲେଖାଯାଇଛି।

ଏଥିସହ ମୋଦି ସମ୍ବିଧାନ ବିଷୟରେ ଉଲ୍ଲେଖ କରି କହିଛନ୍ତି, ମୋ ଭଳି ଅନେକ ଲୋକ ଅଛନ୍ତି, ଯେଉଁମାନେ ବାବା ସାହେବ ଆମ୍ବେଦକର ଦେଇଥିବା ସମ୍ବିଧାନ ହେତୁ ଏଠାକୁ ଆସିବାର ସୁଯୋଗ ପାଇଛନ୍ତି। ଯେତେବେଳେ ଆମ ସରକାର ଲୋକ ସଭାରେ କହିଥିଲେ ଯେ, ଆମେ ନଭେମ୍ବର ୨୬କୁ ସମ୍ବିଧାନ ଦିବସ ଭାବରେ ପାଳନ କରିବୁ, ବିରୋଧୀ ଏମପି ଏହାକୁ ବିରୋଧ କରିଥିଲେ। ସେତେବେଳେ ମୁଁ ଆଶ୍ଚର୍ଯ୍ୟ ହୋଇଥିଲି ଯେ, ଯେଉଁମାନେ ଆଜି ସମ୍ବିଧାନର ଏକ ନକଲ ନେଇ ବୁଲୁଛନ୍ତି ସେମାନେ ଏହାକୁ ବିରୋଧ କରିଥିଲେ।

The post ରାଜ୍ୟ ସଭାରେ ମୋଦିଙ୍କ ଭାଷଣ ସମୟରେ ଗୃହ ତ୍ୟାଗ କଲେ ବିରୋଧୀ, ପଛରୁ ମୋଦି କହିଲେ… appeared first on Dharitri Odia News.