ରାତି ଅଧରେ ଓଲଟିଲା ଆମ୍ବ ଟ୍ରକ୍, ମଣିଷପଣିଆ ଦେଖାଇଲେ ଖାକି ବର୍ଦ୍ଦି ତଳେ ଥିବା ନରମ ହୃଦୟ

ଭୁବନେଶ୍ୱର : ରାତି ଅନେକ ଗଡ଼ି ଗଲାଣି। ତଥାପି ରାଜଧାନୀ ରାଜରାସ୍ତାରେ ସାଏଁ ସାଏଁ ଚାଲି ଥାଏ ଗାଡ଼ି ମୋଟର l ହେଲେ ରସୁଲଗଡ ଓଭର ବ୍ରିଜ ଉପରେ ଗାଡି ସବୁ ଅଟକି ରହିଥାଏ l କିଛି ପୋଲିସ ଗାଡି ମଧ୍ୟ ଠିଆ ହୋଇଥାଏ ସେଠି l କିଛି ଘଟିଛି ନିଶ୍ଚୟ । ନହେଲେ ପୋଲିସ୍ କାହିଁକି ଆସିଥାନ୍ତା ? କଣ ହୋଇଛି ଏଇଠି ? କାହିଁକି ଅଟକିଛି ଏହି ଗାଡ଼ି? ଆମେ ପହଞ୍ଚିଗଲୁ ଘଟଣଶ ସ୍ଥଳରେ । …

ଭୁବନେଶ୍ୱର ରସୁଲଗଡ ଓଭର ବ୍ରିଜ ପଳାଶୁଣୀ ପୂର୍ବରୁ ଦେଖିବାକୁ ମିଳିଲା ଗୋଟିଏ ମିନି ଟ୍ରକ ଓଲଟି ପଡିଛି ମିନି l ଡ୍ରାଇଭରଙ୍କ ସହ କଥା ହେଲୁ । ଜାଣିବାକୁ ମିଳିଲା କି ଅନ୍ୟ ଗୋଟିଏ ଗାଡିକୁ ବଞ୍ଚାଇବାକୁ ଯାଇ ନିଜେ ଦୁର୍ଘଟଣାର ଶିକାର ହୋଇଛନ୍ତି l ଗୋଟିଏ କ୍ରେନ୍ ଓ ଆଉ କିଛି ଲୋକ ମିଶି ମିନି ଟ୍ରକରେ ତାର ଲଗାଇ ସାଇଡ କରିବାରେ ଲାଗିଥାନ୍ତି l କେତେଜଣ ଟ୍ରାଫିକ ପୋଲିସ ଏବଂ ସହଯୋଗୀ ମିଶି ଗାଡ଼ି ମୋଟର ନିୟନ୍ତ୍ରଣ କରୁଥାନ୍ତି । ଯେମିତି କଟକ ଅଭିମୁଖେ ରାସ୍ତାରେ ଜାମ୍ ନରହିବ, ଟ୍ରାଫିକ ସମସ୍ୟା ଉପୁଯିବ ନାହିଁ ଏବଂ ଅନ୍ୟ ଗାଡ଼ିଗୁଡିକ କେମିତି ସୁରୁଖୁରୁରେ ଯାଇ ପାରିବ ସେଥିରେ ଲାଗି ପଡ଼ିଥାନ୍ତି । ….ତେବେ ଏଭଳି ଗାଡ଼ି ଓଲଟିଵା କିଛି ନୂଆ କଥା ନୁହେଁ l ହେଲେ ଆଉ ଯାହା ଦେଖିଲୁ ତାହା ହିଁ ସବୁଠାରୁ ଆଲୋଚନାର ବିଷୟ l

ଓଲଟି ପଡିଥିବା ମିନି ଟ୍ରକଟିରେ ଆମ୍ବ ବୋଝେଇ ହୋଇ ଗାଞ୍ଜାମରୁ କୁଆଖିଆ ଯାଉଥିଲା l ପାଖାପାଖି ମିନି ଟ୍ରକରେ ତିନି ଟନର ଆମ୍ବ ଥିଲା l ଟ୍ରକଟି ଓଲଟି ପଡ଼ିବା ଫଳରେ ଆମ୍ବ ସବୁ ବିଛେଇ ହୋଇ ପଡିଥାଏ l ଆଉ ପୋଲିସ ମଧ୍ୟ ଘଟଣା ସ୍ଥଳରେ ଥାଆନ୍ତି l ମିନି ଟ୍ରକ ଚାଳକଙ୍କୁ କହୁଥାନ୍ତି ଲୋକ ଡକାଇ ଶୀଘ୍ର ରାସ୍ତା ଖାଲି କରିବାକୁ l ହେଲେ ଚାଳକ ଜଣଙ୍କ ଅନେକ ଚେଷ୍ଟା କଲେ ଆଉ ଶେଷରେ ନିରୁପାୟ ହୋଇ ନିଜେ ଆମ୍ବ ସବୁ ଟ୍ରେ ଭିତରେ ରଖିବା ଆରମ୍ଭ କଲେ l ଏତେ ଗୁଡ଼ାଏ ଆମ୍ବ ଅନେକ ସମୟ ଲାଗିବ । ଏଣେ କିଛି ଲୋକଙ୍କ ନଜର ରହିଛି l ପୋଲିସ୍ ନଥିଲେ ହୁଏତ ଆମ୍ବ ଗାୟବ ହୋଇ ଯାଇଥାନ୍ତା । ତେଣୁ ପୋଲିସ ଏସଆଇ ଭାଇ ଜଣଙ୍କ ଚାଳକର ପରିସ୍ଥିତିକୁ ଦେଖି ଆଉ ସମ୍ଭାଳି ରହି ପାରିଲେ ନାହିଁ l ନିଜେ ସାଉଁଟିଵା ଆରମ୍ଭ କଲେ l ଥରକୁ ଥର ଆମ୍ବ ସବୁକୁ ରାସ୍ତା ଉପରୁ ଗୋଟାଇ ଗୋଟିଏ ଗୋଟିଏ ଟ୍ରେରେ ରଖୁଥାନ୍ତି l ତାଙ୍କ ଦେଖା ଦେଖି ଅନ୍ୟ ପୋଲିସ ଟ୍ରାଫିକ ଭାଇମାନେ ଏବଂ କିଛି ଲୋକ ସେମିତି ସାହାଯ୍ୟ କରିବା ଆରମ୍ଭ କରି ଦେଲେ l ତେବେ ଏତେ ଆମ୍ବ ତଳେ ପଡ଼ିଛି ଯେ ବହୁତ ସମୟ ଲାଗିବ କିନ୍ତୁ ସେମାନେ ଏକଥା ଚିନ୍ତା କରୁ ନଥାନ୍ତି l କେଵଳ ଗୋଟିଏ ଚିନ୍ତା କେମିତି ଆମ୍ବ ସବୁ ସାଉଁଟା ହୋଇ ଯତ୍ନରେ ରହିବ l ଏମିତି ଅନେକ ସମୟ ଯାଏ ଆମ୍ବ ଗୋଟାଇ ଚାଲିଲେ ପୋଲିସ ଭାଇ l … କହିଲେ ଦେଖି, ଏ ଦୃଶ୍ୟ ଆପଣଙ୍କ ମନକୁ କିଭଳି ଭାବନା ଆଣୁଛି ?

ଅନେକ ସମୟରେ ଲୋକେ ଖାକି ବର୍ଦ୍ଦିବାଲାଙ୍କୁ ନିର୍ଦ୍ଦୟ ବୋଲି କହିଥାନ୍ତି । ଭିନ୍ନ ନଜରରେ ଦେଖିଥାନ୍ତି । କିନ୍ତୁ ଏହି ଖାକି ତଳେ ବି ଲୁଚି ରହିଛି ମାନବିକତା । କାରଣ ପୋଷାକ ବଦଳି ଗଲେ ଯେ ଆମ ଭଳି ସେମାନେ ମଣିଷ ନୁହନ୍ତି ଭାବିବା ଭୁଲ । ବିପଦ ବେଳେ ଏହି ପୋଲିସ ହିଁ ଆମର ସହାୟତା କରିଥାଏ l ଏଇ ରାତି ସମୟରେ ଚାଳକଙ୍କର ଆଉ ଆମ୍ବର ଅବସ୍ଥା କଣ ଯେ ହୋଇଥାନ୍ତା ? ଯଦି ଏ ପୋଲିସ ଭାଇ ନଥାନ୍ତେ । ଖାଲି ସେତିକି ନୁହେଁ ଯେଉଁ ମହାନ ହୃଦୟର ପରିଚୟ ଦେଇଛନ୍ତି ଏମାନେ ତାକୁ ସମସ୍ତେ ବୁଝିବା ଦରକାର l ସେମାନେ ଦିନରାତି ଆମରି ସୁରକ୍ଷା ଓ ସେବାରେ ଲାଗିଛନ୍ତି । ତେଣୁ କିଛି କର୍ମଚାରୀଙ୍କ ପାଇଁ ପୂରା ବିଭାଗକୁ ଦାୟୀ କରିବା, ବଦନାମ ଦେବା ଠିକ୍ ନୁହେଁ । କାରଣ ସେହି ଖାକି ବର୍ଦ୍ଦି ତଳେ ରହିଛି ଏକ ମଣିଷର ହୃଦୟ । ଯାହା ଏହି ଦୃଶ୍ୟ ବୟାନ୍ କରୁଛି । ସେଥିପାଇଁ ଏହି ପୋଲିସ ଭାଇ ଏବଂ ସହଯୋଗୀମାନଙ୍କୁ କେନ୍ୟୁଜ ସଲାମ୍ କରୁଛି ଓ ଧନ୍ୟବାଦ ଦେଉଛି ।

Also Read:ପୂର୍ଣ୍ଣିମାଙ୍କ ମୃତ୍ୟୁର କାରଣ ଖୋଜୁଛି ପୋଲିସ, ଶ୍ବଶୁର ଘର ଲୋକେ ଥାନାରେ ଅଟକ

The post ରାତି ଅଧରେ ଓଲଟିଲା ଆମ୍ବ ଟ୍ରକ୍, ମଣିଷପଣିଆ ଦେଖାଇଲେ ଖାକି ବର୍ଦ୍ଦି ତଳେ ଥିବା ନରମ ହୃଦୟ appeared first on KNews Odisha.