ରାତି ଅଧରେ ମନ୍ଦିର ଗୁଡ଼ିକୁ ଟାଗେର୍ଟ କରିଥିଲା ଚୋର, ଜାରି ହେଲା ସିସିଟିଭି ଭିଜୁଆଲ

ସବୁ ଶୋଇଗଲା ପରେ ରାତି ଅଧରେ ମନ୍ଦିର ଗୁଡ଼ିକୁ ଟାଗେର୍ଟ କରିଥିଲା ଚୋର। ଗୋଟିଏ କି ଦୁଇଟି ନୁହେଁ ୫ଟି ମନ୍ଦିରରୁ ଚୋର ଚୋରି କରିଥିଲା । ଯାହାର ସିସିଟିଭି ଭିଜୁଆଲ ଏବେ ପୋଲିସ ଦ୍ବାରା ଜାରି ହୋଇଛି । ପ୍ରଥମେ ପାଚେରୀ ଡେଇଁ ମନ୍ଦିର ଭିତରେ ପଶିଥିଲା । ପରେ ତାଲା ଭାଙ୍ଗି ମନ୍ଦିରରେ ପଶିଥିଲା।  ସେହିପରି ମନ୍ଦିରର ହୁଣ୍ଡିରୁ ଟଙ୍କା ଚୋରି କରୁଥିବା ମଧ୍ୟ ଜଣାପଡ଼ିଛି । ଚୋରର ସାହସକୁ ମାନିବାକୁ ପଡ଼ିବ । ନା ପୋଲିସକୁ ଭୟ ଅଛି ନା ଆଇନ କାନୁନକୁ । ରାତି ଅଧରେ ମନ୍ଦିରରେ ପଶି କଳାକନା ବୁଲାଇ ଫେରାର ମାରିଛି । ତେବେ ସିସିଟିଭି ଭିଜୁଆଲକୁ ଆଧାର କରି ଚୋରକୁ ଖୋଜୁଛି ପୋଲିସ ।

ନୟାଗଡ ଜିଲ୍ଲାରେ ୨ ମାସ ମଧ୍ୟରେ ୫ଟି ମନ୍ଦିରରୁ ଚୋରି ହୋଇଛି । ଚୋରକୁ ଧରିବା ପାଇଁ ୪ଟି ଟିମ ଗଠନ କରାଯାଇଛି । ସୂଚନା ଥାଉ କି ପ୍ରଥମେ ଇଟାମାଟି ଥାନା ବଡପଣ୍ଡୁସର ଉଗ୍ରେଶ୍ୱର ମହାଦେବ ମନ୍ଦିରରୁ ରୁପା ମୂର୍ତ୍ତି ଓ ଟଙ୍କା ଚୋରି ହୋଇଥିଲା । ପରେ ଓଡଗାଁ ଥାନା ଦୁତୁକେଶ୍ବର ମହାଦେବ ମନ୍ଦିରରୁ ଚୋରି ହୋଇଥିଲା । ସମାନ ଭାବେ ନୂଆଗାଁ ଥାନା ଲୁଣିସରାର ଗୋପୀନାଥ ମନ୍ଦିରରୁ ଚୋରି ହୋଇଥିଲା । ନୟାଗଡ ପୁରୁଣା ସହର ଜଗନ୍ନାଥ ମନ୍ଦିର ଓ ଗୋପୀନାଥ ମନ୍ଦିରରୁ ଟଙ୍କା ଓ ଅଳଙ୍କାର ଚୋରି ହୋଇଥିଲା । ତେବେ ପୁରୁଣା ସହର ଦକ୍ଷିଣକାଳୀ ମନ୍ଦିରରୁ ଚୋର ଚୋରି ପାଇଁ ଉଦ୍ୟମ କରୁଥିବାବେଳେ ସିକ୍ୟୁରିଟି ଥିବାରୁ ଚୋରି କରିପାରିନଥିଲା । ନୟାଗଡ ଜିଲ୍ଲା ପୋଲିସ ଚୋର ଚୋରି କରୁଥିବା ସମୟର ସିସିଟିଭିକୁ ଜାରି କରିଛି । ଖୁବଶୀଘ୍ର ଚୋରକୁ ଧରାଯିବ ବୋଲି ନୟାଗଡ ଅତିରିକ୍ତ ଏସପି କହିଛନ୍ତି ।

ରାତି ଅନ୍ଧକାରରେ ବଢ଼ିଚାଲିଛି ଚୋରଙ୍କ ରାଜୁତି । ଘର ଦୋକାନ ବଜାରରେ ଲୋକ ରହୁଥିବାରୁ ମନ୍ଦିର ଭିତରେ ପଶି ଚୋରି କରି ଫେରାର ମାରୁଛନ୍ତି ଚୋର । ତେବେ ଏହି ସିସିଟିଭି ହିଁ ଚୋରକୁ ଧରିବାରେ ସାହାଯ୍ୟ କରିବ ।

Also Read: କୋଟିଏ ଟଙ୍କାର ଗାଡ଼ିରେ ଚୋରି ହେଉଥିଲା ୧୦ଲକ୍ଷ ଟଙ୍କାର ତେଲ ପାଇପ୍, ଧରିନେଲା ପୋଲିସ

The post ରାତି ଅଧରେ ମନ୍ଦିର ଗୁଡ଼ିକୁ ଟାଗେର୍ଟ କରିଥିଲା ଚୋର, ଜାରି ହେଲା ସିସିଟିଭି ଭିଜୁଆଲ appeared first on KNews Odisha.