ରାସନ୍ କାର୍ଡ଼ ପାଇଁ ଲମ୍ବା ଲାଇନ୍, ଅଧରାତିରୁ ଭଦ୍ରକ ବ୍ଲକ କାର୍ଯ୍ୟାଳୟରେ ଲୋକଙ୍କ ପ୍ରବଳ ଭିଡ଼

ବାପ୍ ରେ ଏତେ ଲମ୍ବା ଲାଇନ୍ ? ଦେଖିଲେ ଆଖି ପାଉନି । ରାତି ୩ଟାରୁ ଆସି ଧାଡ଼ିରେ ଠିଆ ହୋଇଛନ୍ତି ଲୋକେ । ପୁଣି ମହିଳାମାନେ ନିଜ ଛୋଟ ଛୋଟ ଛୁଆଙ୍କୁ ଧରି ତଳେ ବସି ରହିଛନ୍ତି । ହେଲେ ରାତି ଅନିଦ୍ରା ହୋଇ ଏ ଲମ୍ବା ଲାଇନ୍ କଣ ପାଇଁ? ଆସନ୍ତୁ ଜାଣିବା ସମ୍ପୂର୍ଣ୍ଣ ଘଟଣା । ଦର୍ଶକ ବନ୍ଧୁ ଏ ଲାଇନ୍ ଲାଗିଛି ରାସନ କାର୍ଡ ପାଇଁ । ରାତି ଉଜାଗର ହୋଇ ରାସନ କାର୍ଡ ପାଇଁ ଧାଡ଼ି ଲଗାଇଛନ୍ତି ଲୋକେ । ନୂଆ ରାସନ କାର୍ଡ ଆବେଦନ ପାଇଁ ଭଦ୍ରକ ବ୍ଲକ ସମ୍ମୁଖରେ ଲୋକଙ୍କ ଅସମ୍ଭାଳ ଭିଡ଼ ।

କିଏ ରାତି ୩ଟାରୁ ଆସିଛନ୍ତି ତ କିଏ ରାତି ୪ ଟାରୁ ଆସି ଲାଇନରେ ଛିଡା ହୋଇଛନ୍ତି । ମନରେ ଡର ରହିଛି, ନୂଆ କାର୍ଡ଼ ନକଲେ କାଳେ ନାଁ କଟିଯିବ ? ତେବେ ନିକଟରେ ଯୋଗ୍ୟ ଗରିବ ଲୋକଙ୍କୁ ସରଜମିନ ତଦନ୍ତ କରି ରାସନ କାର୍ଡ ଦେବା ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଥିଲେ । ଯାହାପରେ ଯୋଗାଣ ବିଭାଗ ଅଧିକାରୀ ଓ ପଞ୍ଚାୟତ ନିର୍ବାହୀ ଅଧିକାରୀମାନେ ବିଭିନ୍ନ ଗାଁକୁ ଯାଇ ଯୋଗ୍ୟ ହିତାଧିକାରୀଙ୍କୁ ଚୟନ କରିଥିଲେ । ଆଉ ସେମାନଙ୍କୁ ଟୋକନ ଦେଇଥିଲେ କେୱାଇସି କରିବା ପାଇଁ ।

ଯାହାଫଳରେ ଆଜି ଯୋଗ୍ୟ ହିତାଧିକାରୀମାନେ ଆସିଥିଲେ ନୂଆ ରାସନ କାର୍ଡ ପାଇଁ । ଯୋଗ୍ୟ ହିତାଧିକାରୀଙ୍କ ବ୍ୟତୀତ ଅନେକ ଲୋକ ନୂଆ ରାସନ କାର୍ଡ ଆବେଦନ ପାଇଁ ମଧ୍ୟ ଆସିଛନ୍ତି । ଫଳରେ ଭଦ୍ରକ ବ୍ଲକ କାର୍ଯ୍ୟାଳୟ ସମ୍ମୁଖରେ ଲୋକଙ୍କ ଅସମ୍ଭାଳ ଭିଡ଼ ଦେଖିବାକୁ ମିଳିଛି । ତେବେ ଦୀର୍ଘ ଦୁଇ ବର୍ଷ ହେବ ନୂଆ ରାସନ କାର୍ଡ ବନ୍ଦ ଥିଲା । ଏବେ ପୁଣିଥରେ ନୂଆ ରାସନ କାର୍ଡ ପାଇଁ ଆବେଦନ ଆରମ୍ଭ ହୋଇ ଥିବାରୁ ଲୋକମାନେ ଅଧିକ ଭିଡ଼ ଲଗାଉଛନ୍ତି ।

ଅନ୍ୟପଟେ ଭିଡ଼ ନିୟନ୍ତ୍ରଣ କରିବାର କିଛି ବ୍ୟବସ୍ଥା ନଥିବାରୁ ଲୋକେ ହଇରାଣ ହେଉଛନ୍ତି । ବିଶେଷ କରି ମହିଳାମାନେ ନିଜ ଛୋଟ ଛୋଟ ପିଲାମାନଙ୍କୁ ସାଙ୍ଗରେ ଆଣି ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି । ତେବେ ତୁରନ୍ତ ଏହି ସମସ୍ୟାର ସମାଧାନ କରାଯିବ ବୋଲି କହିଛନ୍ତି BDO ।

Also read: ଅଭିନବ ପ୍ରତିବାଦ, ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପଖାଳ ଖାଇଲେ ଗ୍ରାମବାସୀ

The post ରାସନ୍ କାର୍ଡ଼ ପାଇଁ ଲମ୍ବା ଲାଇନ୍, ଅଧରାତିରୁ ଭଦ୍ରକ ବ୍ଲକ କାର୍ଯ୍ୟାଳୟରେ ଲୋକଙ୍କ ପ୍ରବଳ ଭିଡ଼ appeared first on KNews Odisha.