ଲଗାତାର ତୃତୀୟ ଦିନରେ ହ୍ରାସ ସହ ବନ୍ଦ ହେଲା ସେୟାର ବଜାର, ନିବେଶକଙ୍କ କ୍ଷତି ୨.୪ ଲକ୍ଷ କୋଟି ଟଙ୍କା

ନୂଆଦିଲ୍ଲୀ: ସେୟାର ବଜାର ଲଗାତାର ତୃତୀୟ ଦିନ ହ୍ରାସ ସହ ବନ୍ଦ ହୋଇଛି । ବିଏସଇ ସେନସେକ୍ସ ୫୦୨ ଖସି ବନ୍ଦ ହୋଇଛି । ଅନ୍ୟପଟେ ନିଫ୍ଟି ୨୪,୨୦୦ ସ୍ତର ତଳେ ବନ୍ଦ ହୋଇଛି । ଆଜିର ଏହି ହ୍ରାସ ଯୋଗୁଁ ନିବେଶକଙ୍କୁ ପ୍ରାୟ ୨.୩୮ ଲକ୍ଷ କୋଟି ଟଙ୍କା କ୍ଷତି ସହିବାକୁ ପଡ଼ିଛି । ଘରୋଇ ପୁଞ୍ଜି ବଜାର ଆଜି ବି ଚାପରେ ରହିଥିଲା । ମିଡ୍‌କ୍ୟାପ୍ ଏବଂ ସ୍ମଲ୍‌କ୍ୟାପ୍ ସୂଚକାଙ୍କରେ ଅଧା ପ୍ରତିଶତ ଯାଏ ହ୍ରାସ ରେକର୍ଡ ହୋଇଛି । ବଜାର ବିଶେଷଜ୍ଞଙ୍କ ମତରେ ଟ୍ରମ୍ପଙ୍କ ରେସିପ୍ରୋକାଲ ଟ୍ୟାକ୍ସ ଧମକ, ଫେଡେରାଲ ରିଜର୍ଭର ଗୁରୁତ୍ୱପୂର୍ଣ୍ଣ ବୈଠକକୁ ନେଇ ଅନିଶ୍ଚିତତା ନିବେଶକଙ୍କୁ ମନୋବଳ ଦୁର୍ବଳ କରିଛି । ବିଦେଶୀ ସଂସ୍ଥାଗତ ନିବେଶଙ୍କ ପୁଞ୍ଜି ପ୍ରତ୍ୟାହାର ମଧ୍ୟ ନିବେଶକଙ୍କ ସେଣ୍ଟିମେଣ୍ଟକୁ ଦୁର୍ବଳ କରିଛି । ଏବେ ସମସ୍ତଙ୍କ ନଜର ଫେଡେରାଲ ରିଜର୍ଭ ଅଧ୍ୟକ୍ଷ ଜେରୋପ୍ ପାୱେଲଙ୍କ ବୟାନ ଉପରେ ରହିଛି ।

ବୁଧବାର କାରବାର ଶେଷରେ ବିଏସଇ ୩୦ ସେୟାର ବିଶିଷ୍ଟ ସେନସେକ୍ସ ୫୦୨.୨୫ ଅଙ୍କ ବା ୦.୬୨ ପ୍ରତିଶତ ହ୍ରାସ ସହ ୮୦,୧୮୨.୨୦ ସ୍ତରରେ ବନ୍ଦ ହୋଇଛି । ଅନ୍ୟପଟେ ଏନ୍‌ଏସ୍ଇର ୫୦ ସେୟାର ବିଶିଷ୍ଟ ସୂଚକାଙ୍କ ନିଫ୍ଟି ୧୩୭.୧୫ ଅଙ୍କ ବା ୦.୫୬ ପ୍ରତିଶତ ହ୍ରାସ ପାଇ ୨୪,୧୯୮.୮୫ ସ୍ତରରେ ବନ୍ଦ ହୋଇଛି ।

ବିଏସ୍‌ଇରେ ସୂଚୀବଦ୍ଧ କମ୍ପାନିଗୁଡ଼ିକ ମୋଟ୍ ମାର୍କେଟ୍ କ୍ୟାପ୍ ଆଜି ଡିସେମ୍ୱର ୧୮ରେ ହ୍ରାସ ପାଇଁ ୪୫୨.୭୫ ଲକ୍ଷ କୋଟି ଟଙ୍କା ହୋଇଛି । ପୂର୍ବ କରାବର ଦିନ ଅର୍ଥାତ୍ ମଙ୍ଗଳବାର ଏହା ୪୫୫.୧୩ ଲକ୍ଷ କୋଟି ଟଙ୍କା ଥିଲା । ଏହିପରି ବିଏସ୍‌ଇରେ ସୂଚୀବଦ୍ଧ କମ୍ପାନିଗୁଡ଼ିକର ମାର୍କେଟ୍ କ୍ୟାପ୍ ଆଜି ପ୍ରାୟ ୨.୩୮ ଲକ୍ଷ କୋଟି ଟଙ୍କା ହ୍ରାସ ପାଇଛି । ଅନ୍ୟ ଶବ୍ଦରେ କହିବାକୁ ଗଲେ ନିବେଶକଙ୍କୁ ଆଜି ୨.୩୮ ଲକ୍ଷ କୋଟି ଟଙ୍କା କ୍ଷତି ହୋଇଛି । ବିଏସଇ ସେନସେକ୍ସର ୩୦ ସେୟାର ମଧ୍ୟରୁ ୨୨ ସେୟାର ଲାଲ୍ ସଂକେତରେ ବନ୍ଦ ହୋଇଛି । ଏଥିରେ ଟାଟା ମୋଟର୍ସର ସେୟାର ୨.୭୫ ପ୍ରତିଶତ ହ୍ରାସ ସହ ସବୁଠୁ ଅଧିକ ହ୍ରାସ ଦେଖିଛି ।