ଲୋମଟାଙ୍କୁରା କାହାଣୀ ବଖାଣିଲେ ବିମାନ ଦୁର୍ଘଟଣାରେ ବଞ୍ଚିଯାଇଥିବା ଏକମାତ୍ର ବ୍ୟକ୍ତି

ସାରା ଦେଶକୁ ସ୍ତବ୍ଧ କରିଛି ଅହମ୍ମଦାବାଦର ଭୟାବହ ବିମାନ ଦୁର୍ଘଟଣା । ମଙ୍ଗଳବାର ଅପରାହ୍ନରେ ଏୟାର ଇଣ୍ଡିଆର ବିମାନ- ବୋଇଂ ୭୮୭-୮ ଉଡ଼ାଣ ଭରିବାର ମାତ୍ର ୫ ମିନିଟ୍ ପରେ ଦୁର୍ଘଟଣାଗ୍ରସ୍ତ ହୋଇଥିଲା । ଜନବସତିପୂର୍ଣ୍ଣ ମେଘାନୀ ଅଞ୍ଚଳରେ ଥିବା ଏକ ମେଡିକାଲ କଲେଜ ହଷ୍ଟେଲ ଓ ଏହା ସଂଲଗ୍ନ ପରିସରରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା । ଅହମ୍ମଦାବାଦର ସର୍ଦ୍ଦାର ବଲ୍ଲଭଭାଇ ପଟେଲ ଅନ୍ତର୍ଜାତୀୟ ବିମାନ ବନ୍ଦରରୁ ଲଣ୍ଡନର ଗାଟୱିକ୍ ବିମାନବନ୍ଦର ଅଭିମୁଖେ ଏହି ବିମାନ ଅପରାହ୍ନ ୧ଟା ୩୮ମିନିଟ୍ ରେ ଉଡ଼ାଣ ଭରିଥିଲା । ଏହାର ୫ ମିନିଟ୍ ପରେ ଦୁର୍ଘଟଣାଗ୍ରସ୍ତ ହୋଇଥିଲା । ବିମାନଟି ଖଣ୍ଡ ଖଣ୍ଡ ହୋଇ ଜଳିଯାଇଥିବା ବେଳେ କେବଳ ଜଣକୁ ବାଦ୍ ଦେଲେ ଅନ୍ୟ କୌଣସି ଯାତ୍ରୀ ବଞ୍ଚିନଥିବା ସମ୍ଭାବନା ନଥିବା ଅହମ୍ମଦାବାଦ ପୋଲିସ୍ କମିସନର କହିଥିଲେ ।

ହେଲେ କଥାରେ ଅଛି ରଖେ ହରି ତ ମାରେ କିଏ? ଭାଗ୍ୟ ଯଦି ସାଥ୍ ଦିଏ ନା କେହି କିଛି ବିଗାଡି ପାରନ୍ତିନାହିଁ । ସେମାନଙ୍କ ଭାଗ୍ୟ ଏମିତି ଟାଣ ଥାଏ ଯେ ଯେତେ ବଡ ଧରଣର ବିପଦ ଆସିଲେ ବି ସେମାନେ ତରିଯାନ୍ତି । ମୃତ୍ୟୁ କୁ ଯେମିତି ଜୟ କରିଯାନ୍ତି । ଯାହା ଦେଖିବାକୁ ମିଳିଛି ଅହମ୍ମଦାବାଦର ଭୟାବହ ବିମାନ ଦୁର୍ଘଟଣାରେ । ବିମାନ ଦୁର୍ଘଟଣାରେ ୨୬୫ ଜଣଙ୍କର ମୃତ୍ୟୁ ହୋଇଥିବା ବେଳେ, ସୌଭାଗ୍ୟକ୍ରମେ ଜଣେ ମାତ୍ର ଯାତ୍ରୀ ବଞ୍ଚିଯାଇଛନ୍ତି । ଏନେଇ ଅହମ୍ମଦାବାଦ ପୋଲିସ୍ କମିସନର ଜିଏସ ମଲ୍ଲିକ ସୂଚନା ଦେଇଛନ୍ତି ।

ତେବେ ବର୍ତ୍ତି ଯାଇଥିବା ଯାତ୍ରୀଙ୍କ ନାଁ ରମେଶ ବିଶ୍ୱାସ କୁମାର ବଚୁରୱାଡ଼ା । ତାଙ୍କୁ ସିଟ୍ ନଂ 11Aରୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା । ତାଙ୍କ ଦେହରେ ସାମାନ୍ୟ ଆଘାତ ଲାଗିଛି । ଉଦ୍ଧାର ପରେ ସେ ନିଜେ ଚାଲି ଚାଲି ଦୁର୍ଘଟଣାସ୍ଥଳରୁ ବାହାରିଥିଲେ । ରାସ୍ତାରେ ତାଙ୍କୁ ଦେଖି ସଭିଏଁ ଚକିତ ହୋଇଯାଇଥିଲେ । ଏହାପରେ ଡାକ୍ତରଖାନାରେ ତାଙ୍କୁ ଭର୍ତ୍ତି କରାଯାଇ ଚିକିତ୍ସା କରାଯାଉଛି ।

ମିଳିଥିବା ସୂଚନା ଅନୁସାରେ, ୪୦ ବର୍ଷୀୟ ବିଶ୍ୱାସ କୁମାର ନୂଆ ଜୀବନ ପାଇବା ପରେ, ନିଜେ ଲୋକଟାଙ୍କୁରା କାହାଣୀ ବଖାଣିଛନ୍ତି । ସେ କହିଛନ୍ତି, ଉଡ଼ାଣ ଆରମ୍ଭ ହେବାର ୩୦ ସେକେଣ୍ଡ ପରେ ହଠାତ୍ ପ୍ରଚଣ୍ଡ ଶବ୍ଦ ହୋଇଥିଲା । ତା’ପରେ ବିମାନଟି ବ୍ଳାଷ୍ଟ ହୋଇଥିଲା । ଏସବୁ ଏତେ ଶୀଘ୍ର ଘଟିଥିଲା ଯେ କାହା ପାଖରେ ନିଜକୁ ବଞ୍ଚାଇବା ପାଇଁ ଟିକେ ସମୟ ବି ନଥିଲା । ବିଶ୍ୱାସ କୁମାର କହିଛନ୍ତି ଯେତେବେଳେ ସେ ଉଠିଲେ, ତାଙ୍କ ଚାରିପାଖରେ ମୃତଦେହ ସବୁ ପଡ଼ିରହିଥିଲା । ଯାହାକୁ ଦେଖି ସେ ଭୟଭୀତ ହୋଇ ସେଠାରୁ ଦୌଡ଼ି ପଳାଇ ଆସିଥିଲେ । ତେବେ ବ୍ରିଟିଶ ନାଗରିକ ବିଶ୍ୱାସ କିଛି ଦିନ ପାଇଁ ତାଙ୍କ ପରିବାରକୁ ଭେଟିବାକୁ ଭାରତ ଆସିଥିଲେ । ତାଙ୍କ ଭାଇ ଅଜୟ କୁମାର ରମେଶଙ୍କ ସହିତ ବ୍ରିଟେନ ଫେରୁଥିଲେ । ବିଶ୍ୱାସ କହିଛନ୍ତି,ସେ ୨୦ ବର୍ଷ ଧରି ଲଣ୍ଡନରେ ରହୁଛନ୍ତି । ତାଙ୍କ ସ୍ତ୍ରୀ ଏବଂ ପିଲାମାନେ ମଧ୍ୟ ଲଣ୍ଡନରେ ରହୁଛନ୍ତି ।

ସେପଟେ ଏଆଇ -୧୭୧ ବିମାନ କ୍ରାସ୍ ଘଟଣାରେ ଗଭୀର ଦୁଃଖ ବ୍ୟକ୍ତ କରିଛି ଏୟାର ଇଣ୍ଡିଆ । ଏୟାର ଇଣ୍ଡିଆ ପାଇଁ ଏହା ଏକ ଘଡ଼ିସନ୍ଧି ଓ କଠିନ ସମୟ ବୋଲି କହିଛନ୍ତି କମ୍ପାନୀର ଏମଡି ଓ ସିଇଓ କ୍ୟାମ୍ପବେଲ ୱିଲସନ । ବିମାନରେ ଥିବା ଯାତ୍ରୀ, କ୍ରିୟୁ ସଦସ୍ୟ ଓ ସେମାନଙ୍କ ପରିବାରକୁ ସହାୟତା କରିବା ଆମର ବଡ଼ ଦାୟିତ୍ୱ ବୋଲି ସେ କହିଛନ୍ତି ।

ଆହୁରି ପଢନ୍ତୁ: ଅହମ୍ମଦାବାଦ ବିମାନ ଦୁର୍ଘଟଣା : ଅଧାରେ ରହିଗଲା ସୁଖ, ସ୍ବାମୀଙ୍କ ପାଖରେ ପହଞ୍ଚିବା ପୂର୍ବରୁ ଚାଲିଗଲା ନବ ବଧୂଙ୍କ…

The post ଲୋମଟାଙ୍କୁରା କାହାଣୀ ବଖାଣିଲେ ବିମାନ ଦୁର୍ଘଟଣାରେ ବଞ୍ଚିଯାଇଥିବା ଏକମାତ୍ର ବ୍ୟକ୍ତି appeared first on KNews Odisha.