‘ସବକା ସାଥ୍, ସବକା ବିକାଶ ନାରା ଦରକାର ନାହିଁ, ଯିଏ ଆମ ସହ, ଆମେ ତାଙ୍କ ସହ’: ଶୁଭେନ୍ଦୁ ଅଧିକାରୀ

ନୂଆଦିଲ୍ଲୀ: ପଶ୍ଚିମବଙ୍ଗ ବିଧାନସଭାରେ ବିରୋଧୀ ଦଳ ନେତା ତଥା ବିଜେପିର ବରିଷ୍ଠ ନେତା ଶୁଭେନ୍ଦୁ ଅଧିକାରୀ ବଡ଼ ବୟାନ ଦେଇଛନ୍ତି । ସେ କହିଛନ୍ତି ଯେ ସବକ୍ ସାଥ୍, ସବକା ବିକାଶ କଥା କହିବାର ଆବଶ୍ୟକତା ନାହିଁ । ଯେଉଁମାନେ ଆମ ପାଇଁ ରହିବେ, ଆମ ସେମାନଙ୍କ ପାଇଁ ରହିବୁ । ସେ ଏକ କାର୍ଯ୍ୟକ୍ରମରେ ଜୟ ଶ୍ରୀରାମ ନାରା ଦେଇ କହିଛନ୍ତି ଯେ ଆମେ ବିଜୟୀ ହେବୁ ଏବଂ ହିନ୍ଦୁଙ୍କ ରକ୍ଷା କରିବୁ । ଆମେ ସ୍ଥିର କରିବୁ ଯେଉଁମାନେ ଆମକୁ ସମର୍ଥନ ଦେବେ, ସେମାନଙ୍କୁ ସମର୍ଥନ କରିବୁ । ଯେଉଁମାନେ ଆମ ସାଙ୍ଗରେ ଅଛନ୍ତି, ଆମେ ସେମାନଙ୍କ ସାଙ୍ଗରେ ସବୁବେଳେ ରହିବୁ । ସବକା ସାଥ୍, ସବକା ବିକାଶ ବନ୍ଦ କର । ସଂଖ୍ୟାଲଘୁ ମୋର୍ଚ୍ଚାର କୌଣସି ଆବଶ୍ୟକତା ନାହିଁ । ଏହାକୁ ବନ୍ଦ କର । ଆମେ ସମ୍ୱିଧାନକୁ ବଞ୍ଚାଇବୁ ।

ବିଜେପି ନେତା ଶୁଭେନ୍ଦୁ ଅଧିକାରୀଙ୍କ ଏହି ବୟାନ ଗୁରୁତ୍ୱପୂର୍ଣ୍ଣ ଅଟେ କାରଣ ପିଏମ୍ ମୋଦୀ ନିଜେ ସବକା ସାଥ୍, ସବକା ବିକାଶ ଏବଂ ସବକା ବିଶ୍ୱାସର ନାରା ଦିଅନ୍ତି । ଏପରିସ୍ଥଳେ ତାଙ୍କର ଏହି ନାରାରୁ ଓହରିବା ପାଇଁ ଅପିଲ୍ କରିବା ଏକ ବଡ଼ ବୟାନ ବୋଲି କୁହାଯାଇଛି । ବିଜେପି ନେତା ଶୁଭେନ୍ଦୁ ଅଧିକାରୀଙ୍କ ଭାଷଣରୁ ସ୍ପଷ୍ଟ ହୋଇଛି ଯେ ବିଜେପି ଏବେ ବେଙ୍ଗଲରେ ହିନ୍ଦୁ ଭୋଟର ଧ୍ରୁବୀକରଣ ପାଇଁ କାମ କରିବ । ସନ୍ଦେଶଖାଲି ପରି ଘଟଣାରେ ମଧ୍ୟରେ ଏପରି ରଣନୀତି ଆପଣାଇଥିଲା, କିନ୍ତୁ ଏବେ ଏହି  ଏଜେଣ୍ଡା ଉପରେ ଆକ୍ରାମକ ହୋଇପାରେ । ବେଙ୍ଗଲ ବିଜେପି ଅନୁସାରେ ଲୋକସଭା ନିର୍ବାଚନରେ ମୁସଲିମ୍ ଭୋଟର ଏକଜୁଟ୍ ହୋଇ ଟିଏମସିକୁ ଭୋଟ୍ ଦେଇଛନ୍ତି । ଯାହାର ଲାଭ ସେ ପାଇଛି । ଅନ୍ୟପଟେ ହିନ୍ଦୁ ଭୋଟ ବିଭାଜନ ହୋଇଛି । ଏପରିସ୍ଥଳେ ଏବେ ହିନ୍ଦୁ ଭୋଟର ଧ୍ରୁବୀକରଣ ପାଇଁ ରଣନୀତି କରିବ ।

ଶୁଭେନ୍ଦୁ ଅଧିକାରୀ କହିଛନ୍ତି ଯେ ଆମେ ଜିତିଲେ ହିନ୍ଦୁଙ୍କୁ ବଞ୍ଚାଇବୁ ଏବଂ ସମ୍ୱିଧାନର ରକ୍ଷା କରିବୁ । ଆଜି ଯାଏ ଆମେ ରାଷ୍ଟ୍ରବାଦୀ ମୁସଲିମଙ୍କ କଥା କହୁଥିଲୁ ଏବଂ ସବକା ସାଥ୍, ସବକା ବିକାଶର କଥା କହୁଥିଲୁ । କିନ୍ତୁ ଏବେ ଏପରି ଆଉ କିଛି କହିବୁ ନାହିଁ । ପଶ୍ଚିମବଙ୍ଗ ବିଜେପିର ସାଂଗଠନିକ ବୈଠକରେ ଶୁଭେନ୍ଦୁ ଅଧିକାରୀ ଏହି ବୟାନ ଦେଇଛନ୍ତି । ଏହି ଅବସରରେ ପଶ୍ଚିମବଙ୍ଗ ବିଜେପିର ସମସ୍ତ ବରିଷ୍ଠ ନେତା ଉପସ୍ଥିତ ଥିଲେ ।

ବୈଠକରେ ଶୁଭେନ୍ଦୁ ଅଧିକାରୀ ବିଜେପିର ପରାଜୟର କାରଣ ମଧ୍ୟ ଉଲ୍ଲେଖ କରିଛନ୍ତି । ସେ କହିଛନ୍ତି ଯେ ଲୋକସଭା ନିର୍ବାଚନ ଏବଂ ବିଧାନସଭା ଉପନିର୍ବାଚନରେ ଟିଏମସିର ଆତଙ୍କ ଯୋଗୁଁ ଲକ୍ଷାଧିକ ହିନ୍ଦୁ ନିଜ ଭୋଟ ଦେଇପାରି ନଥିଲେ । ହିନ୍ଦୁଙ୍କୁ ଭୋଟ୍ ଦେବାରୁ ବଞ୍ଚିତ କରାଗଲା ।