‘ସବୁ ଟ୍ରେନରେ ଲାଗିବ କ୍ୟାମେରା’, ଟ୍ରେନ ଚାଇନଚ୍ୟୁତ କରିବା ଷଡ଼ଯନ୍ତ୍ର ଭିତରେ ଅଶ୍ୱିନୀ ବୈଷ୍ଣବଙ୍କ ଘୋଷଣା

ନୂଆଦିଲ୍ଲୀ: ରେଳ ଯାତ୍ରୀଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ଟ୍ରାକ୍ ଏବଂ ଆଖପାଖ କ୍ଷେତ୍ରରେ କ୍ୟାମେରା ଲଗାଯିବ । କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ବୁଧବାର ଏହି ଘୋଷଣା କରିଛନ୍ତି । ସେ କହିଛନ୍ତି ଯେ ଏଥିପାଇଁ ଟ୍ରେନର ଇଞ୍ଜିନ ଏବଂ ବଗିରେ ମଧ୍ୟ କ୍ୟାମେରା ଲଗାଯିବ ।

ଅଶ୍ୱିନୀ ବୈଷ୍ଣବଙ୍କ ଏହି ଘୋଷଣା ଏପରି ସମୟରେ ହୋଇଛି, ଯେତେବେଳେ ନିକଟରେ କିଛି ଟ୍ରେନକୁ ଲାଇନଚ୍ୟୁତ୍ କରିବା ନେଇ ଷଡ଼ଯନ୍ତ୍ରର ଖୁଲାସା ହୋଇଛି । ସେହିପରି ଅନେକ ମାମଲା ସାମନାକୁ ଆସିଛି, ଯେଉଁଠି ଟ୍ରେନ ଦୁର୍ଘଟଣା ପଛରେ ଷଡ଼ଯନ୍ତ୍ରର ସନ୍ଦେହ କରାଯାଉଛି ।

କେନ୍ଦ୍ରମନ୍ତ୍ରୀ କହିଛନ୍ତି ଯେ ଟ୍ରେନର ଇଞ୍ଜିନ ଏବଂ ଗାର୍ଡ କୋଚ୍‌ର ଆଗ-ପଛ ଏବଂ ଉଭୟ କୋଣରେ କ୍ୟାମେରା ଲଗାଯିବ । ବଗି ଏବଂ ଇଞ୍ଜିନର ସମ୍ମୁଖରେ ଜୀବଜନ୍ତୁଙ୍କଠାରୁ ସୁରକ୍ଷା ପାଇଁ କ୍ୟାଟଲ ଗାର୍ଡ ଉପରେ ମଧ୍ୟ କ୍ୟାମେରା ଲଗାଯିବ । ରେଳ ମନ୍ତ୍ରୀ କହିଛନ୍ତି ଯେ କ୍ୟାମେରା ଲଗାଯିବା ପାଇଁ ତିନି ମାସ ଭିତରେ କନଟ୍ରାକ୍ଟ ଜାରି କରାଯିବ । ସେ କହିଛନ୍ତି ଯେ ସବୁ ଟ୍ରେନରେ କ୍ୟାମେରା ଲଗାଯିବ । ଏକ ମିଳିତ ଡାଟା ସେଣ୍ଟର ମଧ୍ୟ ସ୍ଥାପନ କରାଯିବ, ଯେଉଁଠାରେ କ୍ୟାମେରାରେ ରେକର୍ଡ ଭିଡିଓ ଫୁଟେଜ ରହିବ ।

ଟ୍ରେନକୁ ଚାଇନଚ୍ୟୁତ୍ କରିବା ଷଡଯନ୍ତ୍ରକୁ ଅତ୍ୟନ୍ତ ଗମ୍ଭୀର କହିବା ସହ କେନ୍ଦ୍ରମନ୍ତ୍ରୀ କହିଛନ୍ତି ଯେ ରେଲୱେ ପ୍ରଶାସନ ଅଲଗା ଅଲଗା ରାଜ୍ୟର ପୁଲିସ ମୁଖ୍ୟଙ୍କ ସହ ଯୋଗାଯୋଗ କରି ସୁରକ୍ଷା ବଢାଇବା ପାଇଁ ଅପିଲ୍ କରିଛି ।